ساياسات • 14 تامىز، 2020

وڭىرلەردەگى جوبالار ەل يگىلىگىنە اينالۋى ءتيىس

10 رەت كورسەتىلدى

سەناتورلار ع.دۇيسەمباەۆ پەن ل.سۇلەيمەن اتىراۋ وبلىسىنا ساپار بارىسىندا ماحامبەت جانە يساتاي اۋداندارىنا باردى. سونىڭ اياسىندا ولار ايسارى ارناسىنىڭ جانە ماحامبەت اۋىلىندا جايىق وزەنىنىڭ ۇستىنەن سالىنىپ جاتقان جاڭا كوپىردىڭ قۇرىلىسىمەن تانىستى. سونداي-اق جەرگىلىكتى ءبىلىم وشاعىنا ارنايى ات باسىن بۇرىپ، مەكتەپتىڭ الداعى وقۋ جىلىنا، سونىڭ ىشىندە قاشىقتان وقىتۋ فورماتىنا دايىندىعىن پىسىقتادى.

بۇدان باسقا سەناتورلار قۇرىلىس ماتەريالدارىن شىعاراتىن زاۋىت جۇمىسشىلارىمەن كەزدەسىپ، قازىرگىدەي كۇردەلى كەزەڭدە زا­ۋىت، فابريكا جانە باسقا دا كاسىپورىن باسشىلارى جۇمىس ورىندارىن ساقتاپ، جۇمىسشىلارىنا جالاقىنى ۋاقتىلى بەرىپ وتىرۋدىڭ ماڭىزى زور ەكەنىن ايتتى. سونىمەن قاتار سەناتورلار يندەر-قاراباۋ-ميالى-ساعىز باعىتىنداعى جول قۇرىلىسىنىڭ جاي-كۇيىمەن تانىستى. قۇرىلىس جۇمىستارى جوسپار بويىنشا 2021 جىلدىڭ ەكىنشى جارتىسىندا اياقتالماق. سەناتورلار مۇنايلى ولكەدەگى ساپارىندا مەديتسينا قىزمەتكەرلەرىمەن دە كەزدەستى. دارىگەرلەر كوروناۆيرۋس ىندەتىنە قاتىستى جەرگىلىكتى جاعدايدى بايانداپ، ءدارى-دارمەكپەن قامتاماسىز ەتۋگە جانە اۋرۋدىڭ قايتا ءورشىپ كەتۋىنىڭ الدىن الۋعا ارنالعان شارالار جونىندە ايتتى.

 * * *

ءماجىلىس دەپۋتاتتارى ايماقتارعا ساپارى بارىسىندا پاندەميا سالدارىنان قيىن جاعدايدا قالعان تۇرعىندار ماسەلەسىنە ايرىقشا نازار اۋدارۋدا. Nur Otan، «اق جول»، «حالىق كوممۋنيستەرى» پارلامەنتتىك فراكتسيالارىنىڭ وكىلدەرى جانە قحا دەپۋتاتتارى بىرنەشە باعىت بو­يىنشا جۇمىس اتقارۋدا. ولار: الەۋمەتتىك ماسەلەلەر، تۇرعىندارعا تىكەلەي كومەك، ەڭبەكپەن قامتۋ، شاعىن جانە ورتا بيزنەستى قولداۋ. سونداي-اق دەپۋتاتتار ازاماتتاردىڭ دەنساۋلىعىن، ەكونوميكالىق ءال-اۋقاتىن جاقسارتۋ باعىتىنا باسا كوڭىل بولە وتىرىپ، قايىرىمدىلىق اكتسيالارىنا، الەۋمەتتىك جانە ەرىكتىلەر جوبالارىنا بەلسەنە قاتىسۋدا. «حالىق كوممۋنيستەرى» فراكتسياسىنىڭ مۇشەلەرى ا.قوڭىروۆ پەن ج.احمەتبەكوۆ قازىرگى ۋاقىتتا «شاپاعات» پارتيالىق قايىرىمدىلىق جوباسى اياسىندا شارالارعا قاتىسۋدا.

* * *

سەنات دەپۋتاتى ر.ابدىكەروۆ قاراعاندى وبلىسى نۇرا اۋدانىنا جاساعان ساپار بارىسىندا ايماقتاعى كوروناۆيرۋس ىندەتىنە قاتىستى احۋالعا ەرەكشە كوڭىل ءبولىپ، ورتالىق اۋداندىق اۋرۋحاناعا ارنايى باردى. جەرگىلىكتى مامانداردىڭ ايتۋىنشا، پاندەميا باستالعالى بەرى اۋداننىڭ 1700-گە جۋىق ازاماتىنان سىناما الىنعان. سونىڭ 246-سىنان دەرت جۇقتىرعانى انىقتالعان. دەگەنمەن، بۇگىندە ناۋقاستاردىڭ 90 پايىزى ەمدەلىپ شىققان. ءوز كەزەگىندە سەناتور ەمدەۋمەن بىرگە، اۋرۋدى انىقتاۋ، الدىن الۋ شارالارىن ۇنەمى باستى نازاردا ۇستاۋ كەرەكتىگىن ايتتى. سونىمەن قاتار سەناتور اۋداندىق پروكۋراتۋرانىڭ قىزمەتكەرلەرىمەن كەزدەستى. دەپۋتات پارلامەنتتىڭ قىلمىستىق كودەكسكە تۇزەتۋلەر ەنگىز­گەنىن، مۇنداي شارالار اۋىلدىق جەرلەردە قىلمىستى ازايتىپ، حالىقتىڭ ءال-اۋقاتىن ارتتىرۋعا ىقپال ەتەتىنىن اتاپ ءوتتى.

 * * *

ماجىلىسمەندەر ەڭبەكپەن قامتۋ ماسەلەسىنە دە باسا نازار اۋدارۋدا. ماسەلەن، اقتوبە وبلىسىندا بولعان ءماجىلىس دەپۋتاتتارى گ.ششەگەلسكي، د.ەسپاەۆا جانە س. سيمونوۆ سالىنىپ جاتقان «يۋجنىي وبحود» نىسانىندا بولدى. بۇل نىسان ارقىلى بۇگىندە 600-دەن استام اقتوبەلىكتەر جۇمىسپەن قامتىلىپ وتىر. مەردىگەرلەردىڭ ايتۋىنشا، قۇرىلىسقا قولدانىلعان ماتەريالداردىڭ بارلىعى قازاقستاندىق ونىمدەر. ونىڭ دەنى وسى ايماقتا وندىرىلگەن.

 * * *

سەنات دەپۋتاتتارى ر.اكىموۆ پەن د.ادىلبەكوۆ جۇمىس ساپارىمەن اقمولا وبلىسىنا باردى. اقكول قالاسىندا سەناتورلار قازاندىق پەن جىلۋ جەلىلەرىن جوندەۋ جۇمىستارىنا ەرەكشە نازار اۋداردى. ويتكەنى شاھاردا كوپپاتەرلى ۇيلەردى جىلىتۋعا قاتىستى تۋىنداعان ماسەلە بار. بۇگىندە جاڭا قازاندىقتىڭ ىرگەتاسى قۇيىلىپ، مەتالل قاڭقاسى ورناتىلعان. ول الداعى جىلۋ ماۋسىمىندا ىسكە قوسىلادى دەپ جوس­پارلانىپ وتىر. سونىمەن قاتار سەناتورلار «جاڭا كولۋتون-اقكول-ازات-مينسك» باعىتىنداعى وبلىستىق ماڭىزى بار جولدىڭ جوندەۋ جۇمىستارىن جۇرگىزىپ جاتقان جۇمىسشىلارمەن كەزدەستى. جەرگىلىكتى بيلىك وكىلدەرىنىڭ سوزىنە قاراعاندا، سوڭعى بىرنەشە جىل بويى جولدىڭ اتالعان بولىگىنىڭ ساپاسى سىن كوتەرمەي، حالىقتى ابىگەرگە سالعان. سوعان بايلانىستى بيىل جوندەۋ جۇمىستارىنا ءتيىستى قاراجات ءبولىنىپ وتىر. بۇل جوبا كەلەسى جىلى اياقتالماق.

 * * *

ءماجىلىس دەپۋتاتى گ.بيجانوۆا قاراعاندى وبلىسى قارقارالى اۋدانىندا مەملەكەتتىك باعدارلاما جايىمەن تانىستى. بۇگىندە اۋداندا 10 مەملەكەتتىك باعدارلاما جۇزەگە اسىرىلۋدا. «جۇمىسپەن قامتۋ» جول كارتاسى» بويىنشا 18 جوبا قولعا الىنۋدا. بۇل ماقساتقا 998 ملن 944 مىڭ تەڭگە ءبولىنىپ، 250 جەرگىلىكتى تۇرعىن جۇمىسقا ورنالاستىرىلعان. ساپار بارىسىندا دەپۋتات ازاماتتاردى باسپانامەن قامتۋ جايىنا دا باسا نازار اۋداردى. كوپبالالى، الەۋمەتتىك از قامتىلعان جانە بيۋدجەتتىك سالا قىزمەتكەرلەرى ءۇشىن اۋداندا 18 پاتەرلى، 4 تۇرعىن ءۇي سالىنۋدا. جالپى «نۇرلى جەر» باعدارلاماسى بويىنشا 1 203،2 ملن تەڭگەگە تۇرعىن ءۇي سالىنۋدا. اۋداندا اۋىلدىق اۋماقتاردى جاڭعىرتۋعا باعىتتالعان «اۋىل – ەل بەسىگى» جوباسىنا باسا كوڭىل بولىنگەن. وسى ماقساتتا بىرقاتار نىساندارعا كۇردەلى جوندەۋ جۇرگىزىلۋدە.

* * *

ءماجىلىس دەپۋتاتى احمەت مۋرادوۆ قحا وكىلدەرىمەن، كاسىپكەرلەرمەن جانە ەرىكتىلەرمەن بىرگە اۋرۋحانالارعا قاجەت قۇرالدار جەتكىزدى. كومەككە مۇقتاج جاندارعا ازىق-ت ۇلىك باسقا دا زاتتاي كومەك كورسەتىلدى. دەپۋتاتتار ايماقتاعى جۇمىستارىن جالعاستىرا وتىرىپ، الداعى ۋاقىتتا ازاماتتاردىڭ الەۋمەتتىك احۋالىن قاتاڭ باقىلاۋدا ۇستاماق.

 

 

 

سوڭعى جاڭالىقتار

اقتوبەدە اباي ەسكەرتكىشى اشىلدى

ايماقتار • بۇگىن، 23:00

نامىسىن تۋ ەتكەن

رۋحانيات • بۇگىن، 22:18

كوروناۆيرۋستان قالاي قورعانامىز؟

كوروناۆيرۋس • بۇگىن، 21:33

تاراز قالاسىندا نان قىمباتتاعان

ايماقتار • بۇگىن، 19:15

جوعالعان بالا 12 ساعاتتا تابىلدى

ايماقتار • بۇگىن، 14:38

ۇقساس جاڭالىقتار