ءالى ەسىمدە, ءشامشى اعامەن العاشقى تانىستىعىم قازاق راديوسىنىڭ قارا شاڭىراعىندا باستالدى. سوناۋ 64-65-جىلدارى باس رەداكتورىمىز كومپوزيتور مانسۇر ساعاتوۆ بار, نۇرعالي ءنۇسىپجانوۆ ەكەۋمىز مۋزىكالىق رەداكتسيادا قىزمەت ەتەمىز. بىردە ء«شامشى كەلە جاتىر» دەپ ەلەڭ ەتە قالدىق. دالىزگە شىعىپ, تاعات تاپپاي كۇتىپ ءجۇرمىز. قاسىنا جاس اقىن تولەگەن ايبەرگەنوۆتى ەرتە كەلگەن ەكەن. جالىنداپ تۇرعان جاس اقىن تانىمال كومپوزيتوردىڭ جانىنان جاراسىم تاپقانداي. جۇزىنەن جىلىلىق ەسكەن ءشامشى اعامىزدى كورگەندە كىشىپەيىل, قاراپايىمدىلىعى باسىم جاننىڭ جانىنان تابىلعانىمىزعا قۋانىشىمىزدى جاسىرمادىق. بۇل نۇرعالي ەكەۋمىزدىڭ ەندى-ەندى تانىلا باستاعان كەزىمىز. ءشامشى اعا «ەكەۋىڭە ارناپ ءان الىپ كەلدىم», دەدى. ءشامشى ءانىن ورىنداۋ, ارينە ەكىنىڭ-بىرىنە بۇيىرا بەرمەيتىن باقىت قوي. ماعان «اقەركە-اقجايىق» ءانىن ۇسىنىپ, پيانينومەن اۋەنىن تىڭداتىپ كوردى. ءسوزى – ت.ايبەرگەنوۆتىكى. مىنەزىمە دە, داۋىسىما دا ساي ەكەن, ورىندايمىن دەپ ۋادە ەتتىم. ال نۇرعالي ەكەۋمىز «ارىس جاعاسىندا» ءانىن ورىندايتىن بولدىق. كوپ ۇزاماي قوس داۋىستا جازىلعان ءان قازاق راديوسىنىڭ «جاڭا اندەر» ايدارىمەن تىڭدارمانعا جول تارتتى. تابيعاتى وزگەشە وسىناۋ ەرەكشە اۋەن تىڭدارمانىن ەلىتىپ, راديو قورجىنى حاتتاردان كورىنبەي قالدى. ول كەزدە راديو قۇرامىندا مىقتى دەگەن اقىندار, كومپوزيتورلار بار. كوركەمدىك كەڭەس جۇمىس ىستەيتىن. ءبىز وسى ەكى ءاندى كەڭەس تالقىسىنا ۇسىندىق. ءتۇرلى پىكىرلەر ايتىلدى. الايدا ءشامشى اندەرى ۆالس ىرعاقتى كەلەدى دەگەن پىكىردەن كەيىن تاسپاعا تۇسكەن ءان كەيىنگە قالىپ قويدى. ءان نۇرعالي ەكەۋمىزگە ۇناپ-اق تۇر. سودان تاۋەكەلگە بەل بۋىپ, باس رەداكتوردىڭ ماقۇلداۋىنسىز راديونىڭ كونتسەرتتىك باعدارلاماسىنا قوسىپ جىبەردىك. ءان ەفيردەن اۋەلەپ كەتتى. ەكەۋىمىز باسشىلىقتان ەسكەرتۋ العانىمىزدى كەيىننەن ۇمىتىپ تا كەتتىك. «ارىس جاعاسىندا» ءانىن سۇراعان تىڭدارماننىڭ حاتى تولاستاماي, لەك-لەگىمەن كەلىپ جاتتى. وسىلايشا تالاي جاننىڭ كوكىرەگىنە ۇيالاپ, ءسۇيىپ تىڭدايتىن انىنە اينالعان ءشامشى اندەرى, ونىڭ ىشىندە «ارىس جاعاسىندا» ومىرشەڭدىگىمەن قۇندى ەكەنىن ۋاقىت ءوزى دالەلدەپ بەردى.
ەسكەندىر حاسانعاليەۆ,
قازاقستاننىڭ حالىق ءارتىسى,
مەملەكەتتىك سىيلىقتىڭ لاۋرەاتى,
ءانشى-كومپوزيتور
