ءشامشى انىمەن تاربيەلەنگەن قانشاما بۋىن ماحاببات پەن ساعىنىشتىڭ, ىزگىلىك پەن مەيىرىمنىڭ قۇدىرەتىن ساز ارقىلى بويىنا ءسىڭىردى.
ايتۋلى اقىندارىمىزدىڭ قۋاتتى جىرلارى ءشامشى انىمەن جىمداسقاندا, ءان مەن جىر ءبىر-بىرىمەن جاراسىپ-جامىراسىپ تۇلا بويدى شىمىرلاتار تاڭعاجايىپ تۋىندىعا اينالدى. ءشامشى ءانى تالاي ورىنداۋشىنىڭ جۇلدىزىن جارقىراتىپ, حالىقتىڭ جۇرەگىنە جول اشتى. قانشاما وسكىندى ونەر الەمىنە ىڭكار ەتتى.
كۇنى بۇگىنگە دەيىن كەز كەلگەن دۋماندى كەشتەر مەن قۋانىش داستارقاندارىنىڭ تورىندە ءشامشىنىڭ ءانى شىرقالادى. بولاشاقتا دا سولاي بولاتىنى ايقىن. سۇلۋ سازدى سەرىك ەتكەن كومپوزيتورلارىمىز ءۇشىن اينىماس ۇلگى, جول سىلتەيتىن تەمىرقازىق بولىپ ءشامشى اعامىز تۇر.
قازاقتىڭ قاي توپىراعىنا بارساڭ دا ءشامشى اعا شالقىعان شالقار ءان بولىپ الدىڭنان شىعادى. جاس تا, كارى دە ونىڭ ءانىن ءسۇيىپ ايتادى. ارىستىڭ جاعاسى مەن كاسپيدىڭ تولقىنى ءان بولىپ كەۋدەڭدى شىمشىلايدى, باقىت قۇشاعىنا تارتادى, سىر سۇلۋى بولىپ جانىڭدى شۋاققا بولەيدى. ءبىر سوزبەن ايتقاندا, ونىڭ شىعارمالارى ماڭگىلىك مۇرا, ونىڭ ءانى جۇرەكتەردىڭ داۋاسى.
وسىناۋ مەرەيتويعا وراي, الداعى ۋاقىتتا ءوزىم ەڭبەك ەتىپ جۇرگەن جامبىل اتىنداعى مەملەكەتتىك فيلارمونيانىڭ ۇجىمى جاقسى جوبالاردى جۇزەگە اسىرۋدى كوزدەپ وتىر. باسقا دا ونەر ۇجىمدارى ءشامشى اندەرىنە ارنالعان ءتۇرلى ونلاين كونتسەرتتەر وتكىزىپ جاتىر. مۇنىڭ ءبارى حالىقتىڭ ۇلى دارىن يەسىنە دەگەن شەكسىز قۇرمەتى.
نۇرعالي ءنۇسىپجانوۆ,
قازاقستاننىڭ حالىق ءارتىسى,
مەملەكەتتىك سىيلىقتىڭ لاۋرەاتى
