سينحۋا اگەنتتىگىنىڭ حابارلاۋىنشا, اقپان ايىندا اۋرۋعا شالدىعىپ, ۆيرۋستان ايىعۋىنا ايلاپ ۋاقىتى كەتكەن ايەل قايتادان ىندەتتىڭ قۇرىعىنا ىلىنگەن. ەلدىڭ ورتالىعىندا ورنالاسقان پروۆينتسيانىڭ تۇرعىنى 9 تامىزدا تەكسەرىلىپ, ناتيجەسىندە COVID-19 دياگنوزىمەن اۋرۋحاناعا جاتقىزىلعان.
بۇل جاعداي عالىمداردىڭ ىندەتپەن اۋىرعان ادامداردىڭ بويىندا انتيدەنە بىرنەشە اي عانا ساقتالادى دەگەن تۇجىرىمىنا سايكەس كەلىپ تۇر. سوندىقتان ءبىر اۋىرىپ تۇردىم عوي دەپ بەيعام جۇرۋگە بولمايدى.
* * *
كولۋمبياداعى ىندەتتىڭ ورشۋىنە قاراپ يتاليا ۇكىمەتى اۋە بايلانىسىن بەلگىسىز مەرزىمگە توقتاتا تۇراتىنى تۋرالى شەشىم قابىلداعان.
كولۋمبيا دەنساۋلىق ساقتاۋ مينيسترلىگىنىڭ Twitter-دەگى پاراقشاسىندا سوڭعى 24 ساعات ىشىندە 362 پاتسيەنتتىڭ تىنىسى توقتاعانى جاريا بولدى. الەمدە پاندەميا پاتشالىق قۇرعالى بۇل ەلدە 422 519 ادام COVID-19 ۆيرۋسىن جۇقتىرىپ, 13 837 كولۋمبيالىق ىندەتتىڭ قۇربانى بولعان. ال جالپى ەل كولەمىندە 239 785 جان جازىلىپ, 2 023 256 ادام تەست تاپسىرىپتى.
* * *
ۆەنەسۋەلانىڭ بايلانىس جانە اقپارات ءمينيسترى حورحە رودريگەس COVID-19 جۇقتىرعانىن Twitter-دەگى پاراقشاسىندا جازدى.
ەلدىڭ باس اقپاراتشىسى حورحە رودريگەس «مەن COVID-19-بەن اۋىرعانىم جايلى دياگنوز قويىلعانىن حابارلاۋعا مىندەتتىمىن. جاعدايىم جاقسى بولعانىمەن وقشاۋلانۋ رەجىمىن ساقتاپ, ۆيرۋستى جەڭىپ شىعۋعا ءتيىسپىن», دەپ جازىپتى.
شىلدە ايىندا اتالعان ەلدىڭ ەكونوميكا جانە مۇناي ۆيتسە-پرەزيدەنتى تارەك ەل-ايسسامي مەن ۇلتتىق قۇرىلتاي جيىنىنىڭ سپيكەرى ديوسدادو كابەلو دا اۋىرىپ تۇرعان-دى.
* * *
ارگەنتينا پرەزيدەنتى البەرتو فەرناندەس وكسفورد ۋنيۆەرسيتەتىندە جاسالعان كۆي-گە قارسى ۆاكتسينانى مەكسيكامەن بىرلەسىپ شىعارۋدى جوسپارلاپ وتىر. بۇل تۋرالى REGNUM اگەنتتىگى حابارلادى
پرەزيدەنت البەرتو فەرناندەس ارگەنتينالىق AstraZeneca مەن مەكسيكالىق كارلوس سليم اتىنداعى قور بىرلەسىپ, لاتىن امەريكاسىنداعى برازيليادان باسقا مەملەكەتتەردى تۇگەل ۆاكتسينامەن قامتيتىن ىرگەلى جۇمىس جۇرگىزەتىنىن, جوبانىڭ كوممەرتسيالىق ەمەس ەكەنىن مالىمدەدى. بارلىق تاجىريبەلىك جۇمىس اياقتالىسىمەن ۆاكتسينا شىعارۋ جولعا قويىلىپ, 2021 جىلدىڭ ءبىرىنشى جارتىسىندا قولجەتىمدى بولماق.
ارگەنتينادا پاندەميا باستالعاننان بەرى 268 574 ادام ۆيرۋس جۇقتىرىپ, 5213 ادام دۇنيە سالعان.
* * *
برازيليانىڭ دەنساۋلىق ساقتاۋ مينيسترلىگى ءبىر تاۋلىكتىڭ ىشىندە 55 155 ادامنىڭ اۋرۋ جۇقتىرعانىن حابارلاعان.
ونسىز دا قارا جامىلىپ, ءۇش كۇن ازا تۇتقان ەلدە وسىلايشا جامانات دەرت جاماعانداردىڭ قاتارى ارتىپ, جالپى ىندەتكە شالدىققانداردىڭ سانى 3 164 785 بولدى. بۇعان دەيىن COVID-19-دان كوز جۇمعاندار 104 201 بولسا, ەندى 1175 ادام اجال قۇشىپتى. دەگەنمەن 2 309 477 ناۋقاستىڭ اۋرۋدان جازىلىپ شىققانى ەلدىڭ ەڭسەسىن كوتەرۋگە سەپ بولىپ تۇر.
* * *
يتاليا ۇكىمەتى 12 تامىزدا ايماقتار باسشىلارىنىڭ قاتىسۋىمەن كەڭەس وتكىزىپ, ۆيرۋستىڭ ىقپالىن ازايتۋ جولدارىن قاراستىرعان جوبالاردى ورتاعا سالدى.
يتاليا دەنساۋلىق ساقتاۋ ءمينيسترى روبەرتو سپەرانتسا يسپانيا, گرەكيا, حورۆاتيا جانە مالتاعا بارىپ دەمالىپ قايتقان وتانداستاردان اۋەجاي باسىندا تەست الۋ كەرەك ەكەنىن ۇسىنعان. ونىڭ ايتۋىنشا, ەكسپرەسس-تەست ارقىلى ادامداردىڭ 14 كۇن وقشاۋلانۋى قاجەت بولمايدى.
وتىرىستا پاندەميانىڭ ەل ەكونوميكاسىنا تيگىزگەن سالقىنى دا ءسوز بولعان. ساراپشىلار يتالياداعى ءىجو جىل اياعىندا 10-15 پايىز دەڭگەيىنە دەيىن قۇلدىراۋى مۇمكىن ەكەنىن ايتسا, رەسمي بيلىك 8-9 پايىزدى قۇرايدى دەپ ۇمىتتەنەدى. ەكونوميكانى ۇيىققا باتىرماۋ ءۇشىن ۇكىمەتتىك جوبالارعا 75 ملرد ەۋرو قاراستىرىلدى, ونىڭ ءبىراز بولىگى كرەديتتىك قاراجاتتان قۇرالعان.
دايىنداعان
انار تولەۋحانقىزى,
«Egemen Qazaqstan»
