تۋريزم • 13 تامىز، 2020

قاشقىن تاۋدىڭ قويناۋىنداعى قازىنا

517 رەت كورسەتىلدى

ءۇزىلىپ تۇسكەن مونشاقتاي كوگىلدىر كولدەر مەن قولدىڭ سالاسىنداي اق قايىڭدار، ماڭگى جاسىل قاراعايلار كومكەرگەن «كوكشەتاۋ» ۇلتتىق پاركىنىڭ اۋماعىندا 22 تۋريستىك مارشرۋت جۇمىس ىستەيدى. بۇل سوقپاقتاردا جەڭىل كولىكپەن، اتپەن، جاياۋ وتۋگە بولادى. سۋ مارشرۋتتارى دا بار. كوگىلدىر نۇرعا مالىنعان ولكەدە ساف اۋامەن تىنىستاپ، قازىنالى ءوڭىردىڭ ىلكىدەگى سىرىنا ۇڭىلگەن ادام كوپ نارسەگە قانىعار ەدى.

ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا «تۋعان جەر» باعدارلاماسىن ۇسىنىپ، جاس ۇرپاقتىڭ بويىنا سۇيىسپەنشىلىك، پاتريوتتىق سەزىمدى قالىپتاستىرۋ كەرەكتىگىن اتاپ وتكەن بولاتىن. ماقالانىڭ باستى بولىگى تۋعان جەردىڭ ۇلتتىق قۇندىلىقتارىن قادىرلەۋگە ارنالعان. ءيا، تۋعان جەرگە دەگەن سۇيىسپەنشىلىك تۋعان تاريحىڭدى تەرەڭنەن بىلۋدەن باستالادى. اقمولا وڭىرىندە ءار توبەسى، ءار بەلەسىمەن جاس ۇرپاقتىڭ بويىنا تۋعان جەرىن ءسۇيۋ سەزىمىن قالىپتاستىراتىن قۇنارلى ولكەنىڭ ءبىرى ءارى بىرەگەيى – «كوكشەتاۋ» ۇلتتىق تابيعي پاركى.

–تۋريستىك مارشرۋتتاردىڭ جالپى ۇزىندىعى 639،3 شاقىرىمدى قۇرايدى،–دەيدى «كوكشەتاۋ» ۇلتتىق پاركىنىڭ باسشىسى ەربول ساعديەۆ،–مىنە، وسى جولدىڭ بويىنداعى ءار بەلەس پەن ءار جوتانىڭ استىندا تۋعان ەلدىڭ تاريحى بۇعىپ جاتىر. جاي عانا سىرتقى سۇلۋ بەينە، قايتالانباس اجارلى كوركەمدىك قانا ەمەس، سانامەن سالماقتاعان ادامعا ايرىقشا اسەر ەتەتىن اڭىز ەرتەگىلەر دە جەتەرلىك.

شىنىندا دا، جالپى اۋماعى 1،3 گەكتار جەردى قۇرايتىن قاشقىن شوقىسىنا كوز سالىڭىزشى. وسى شوقى ارقىلى تۋعان جەردىڭ تاريحىن كەيىنگى ۇرپاقتىڭ ساناسىنا سىڭىرۋگە ارنالعان مارشرۋت وتەدى. ءمانى مول، مازمۇنى تەرەڭ ماقساتتى كوزدەگەن. تىلسىم تابيعاتتىڭ جەڭىل شىمىلدىعىن جەلپىپ اشىپ، شوقىنىڭ ۇستىنە شىقتىڭىز ەكەن دەلىك. ات شاپتىرىم ايماق قۇتتى الاقانىڭىزعا سالعانداي جانارىڭىزدىڭ الدىندا جارق ەتە تۇسەدى. ءبىر اۋىز ءسوزدى شوقى اتاۋىنا بايلانىستى ساباقتاي كەتەلىك. ەستە جوق ەسكى كەزەڭ. قۇبا قالماق قىرداعى ەلدى قاماعان. بەيبىت اۋىلدار قول جيىپ ۇلگەرمەسە كەرەك. قاپىدا باسىپتى. سول كەزدە ات جالىن جاڭا تارتىپ مىنگەن جاس باتىر امال جوق اتاۋسىز شوقىنىڭ يت تۇمسىعى وتپەيتىن قالىڭ ورمانىنا سۇڭگىپ كەتكەن. جاي جاتپاپتى، تورعايداي توزىپ بارا جاتقان، ساي-سالانى پانالاپ بوسىپ كەتكەن جالپاق جۇرتقا حابار سالىپتى. تۋعان جەرىن جاۋ تابانىندا تاپتاتپاۋعا بەكىنگەن، كەۋدەلەرىندە نامىس وتى جانعان ازاماتتار اتى جوق شوقىنىڭ باۋىرىندا باس قوسسا كەرەك. قول جيىپ، سەرتتەسىپ، داندايسىعان قۇبا قالماقتى قاقىراتا جۋساتىپ، تۇرە قۋعان. كىل قاشقىن باس ساۋعالاعان اتى جوق شوقى كەيىن قاشقىن شوقىسى اتانىپ كەتىپتى. مىنە، مىناۋ ءجۇز جىلدىق قاراعايلار، دىڭىنە قۇشاق جەتپەيتىن قارت قايىڭ ەسىل ەرلەردىڭ ەل قورعاعان ەرلىگىن  كەيىنگى ۇرپاقتىڭ قۇلاعىنا قۇيىپ، سىبدىرلاپ سىر شەرتىپ تۇرعان ءتارىزدى. ەلدىك پەن ەرلىككە باۋلايتىنداي، تۋعان جەردى سۇيە بىلۋگە شاقىراتىنداي.

كوز سالىپ قاراساڭىز، تابيعاتتىڭ شەبەرلىگىنە ءتانتى بولار ەدىڭىز. مىنە، جالپى اۋماعى 3،9 گەكتار جەردى قۇرايتىن قازان شوقىسى. قوزىكوش جەرگە تاياپ كەلىپ، ءسال جىتىرەك كوز سالساڭىز، سايىن دالاداعى جەل مەن جاڭبىردىڭ اسەرىنەن پايدا بولعان جاقپار تاستاردىڭ بۇرىلگەن الاقان ىسپەتتى ءبىرتۇتام اۋقىمى كادىمگى قازان بەينەسىنە قاتتى ۇقسايدى. جارتاستاردىڭ ءوزى وزگەشە ءپىشىندى. قىلقالام شەبەرى كەنەپتىڭ بەتىنە مايلى بوياۋمەن ورگەندەي انىق، اجارلى سيپاتقا يە بولىپتى. ءدال وسى جەردەن قاپىسىز شەبەرلىكتىڭ قارىمىن تانۋعا ابدەن بولادى. دالا قازانىنىڭ ءتورت قۇبىلاسى تەگىس قىلقاندى ورمان. يت مۇرىن، تاڭقۋراي، تاڭ شىعىمەن مولدىرەگەن قاراقات كوزدىڭ جاۋىن الادى.

 

اقمولا وبلىسى

 

سوڭعى جاڭالىقتار

اتىراۋدا 9 بالانى يت تالادى

ايماقتار • بۇگىن، 19:57

ۇقساس جاڭالىقتار