ودان بولەك, سەناتور وبلىس ورتالىعىندا سالىنىپ جاتقان نىسانداردى ارالادى. ناقتى ايتقاندا, پەتروپاۆل قالاسىنداعى 108 پاتەرلى كوپ قاباتتى تۇرعىن ءۇيدىڭ قۇرىلىسشىلارىمەن كەزدەستى. جوسپار بويىنشا اتالعان ءۇي ەكى جىلدان كەيىن عانا پايدالانۋعا بەرىلەدى. الايدا, دەپۋتات بۇل وتە ۇزاق مەرزىم ەكەنىنە نازار اۋداردى.
"تۇرعىن ءۇي قۇرىلىسىن تەزىرەك اياقتاپ, 2021 جىلى تاپسىرعان ءجون. بۇل ءۇي "5-10-20" باعدارلاماسى بويىنشا بەرىلەدى. ياعني, جىلدىق مولشەرلەمەسى 5 پايىز, العاشقى جارناسى 10 پايىز بولاتىن جانە 20 جىلعا بەرىلەتىن يپوتەكا وتە ءتيىمدى. مۇنداي باعدارلاما بۇرىن-سوڭدى بولعان جوق. مۇنىڭ ءبارى حالىق ءۇشىن جاسالىپ وتىر", – دەدى سەناتور.
ءوز كەزەگىندە قۇرىلىسشىلار ءۇي قۇرىلىسىن مەرزىمىنەن بۇرىن اياقتاۋعا دايىن ەكەندەرىن جانە ول جاعداي ساپاعا ەشقانداي كەرى اسەرىن تيگىزبەيتىنىن جەتكىزدى.
سونىمەن قاتار دەپۋتات 500 ورىندىق قازاق تەاترىنىڭ قۇرىلىس جۇمىسىن ارنايى بارىپ كوردى. بۇگىندە ءۇش قاباتتى عيمارات سالىنىپ بىتكەن. ەندى شاتىر جۇمىستارى قالعان. وسى رەتتە تەاتردىڭ ساۋلەتشىلەرى زالدا دىبىستىڭ تۇنىق ەستىلۋى ءۇشىن اكۋستيكا ماسەلەسىنە ەرەكشە كوڭىل ءبولىپ, شەتەلدىك مامانداردىڭ كەڭەسىنە جۇگىنگەنىن ايتا كەتكەن ءجون.
قازىرگى تاڭدا وبلىس ورتالىعىندا كوپتەگەن ينۆەستيتسيالىق جوبالار ءساتتى جۇزەگە اسىرىلىپ جاتىر. سولاردىڭ ءبىرى كالينين اتىنداعى بۇرىنعى زاۋىت. بىرنەشە جىل بويى 100 مىڭ شارشى مەترگە جۋىق جەر وندىرىستىك ورىن رەتىندە بوس تۇرعان. ەندى ينۆەستوردىڭ قولداۋىمەن بۇل ورىندا "Data center" ورتالىعى قۇرىلماق. وسى رەتتە سەناتور وڭىردەگى باسقا دا تۇرالاپ قالعان نىسانداردى ينۆەستورلار ارقىلى جانداندىرىپ, كادەگە جاراتۋدىڭ ماڭىزى زور ەكەنىن ايتتى. سونداي-اق, ول نۆەستيتسيا تارتۋ ءۇشىن قازاقستاندا ءتيىستى زاڭنامالىق بازا بار ەكەنىن دە تىلگە تيەك ەتتى.
