يتاليا دەنساۋلىق ساقتاۋ ءمينيسترى روبەرتو سپەرانتسا يسپانيا, گرەتسيا, حورۆاتيا جانە مالتاعا بارىپ دەمالىپ قايتقان وتانداستاردان اۋەجاي باسىندا تەست الۋ كەرەكتىگىن ۇسىنعان. ونىڭ ايتۋىنشا ەكسپرەسس- تەست ادامداردى 14 كۇن وقشاۋلاۋدان بوساتىپ, ولارعا سەنىمدىلىك اكەلەدى. سوڭعى 9 كۇننىڭ ىشىندە ۆيرۋستىڭ جاڭادان تىركەلۋىنىڭ ازايماي تۇرعانىنا قىنجىلعان مينيستر پاندەميانىڭ نە ەكەنىن ول باستالعالى بارلىعى 251 713 يتاليالىقتىڭ باستارىنان وتكەرىپ, سەزىنگەنىن ايتتى.
وتىرىستا SARS-CoV-2-ءنىڭ يتاليا ەكونوميكاسىنا سالعان سالقىنى دا ءسوز بولعان. ەلدەگى ءىجو جىلدىڭ اياعىندا 10-15 پايىز دەڭگەيىنە دەيىن قۇلدىرۋى مۇمكىن ەكەنىن ساراپشىلار جەتكىزسە, رەسمي بيلىك ول 8-9 پايىزدى قۇرايدى دەپ ۇمىتتەنەدى.
ەكونوميكانى ۇيىققا باتىرماۋ ءۇشىن ۇكىمەتتىك جوبالاردا 75 ملرد ەۋرو قاراستىرىلىپتى, ولاردىڭ ءبىراز مولشەرى كرەديتتىك قاراجاتتان ەكەنى كورسەتىلگەن. ال ەۋرووداق بولگەن كرەديتتەن يتاليالىق كومپانيالار 200 ملرد ەۋرو الاتىنى جانە ونىڭ ءبىرازى بولىنگەنى بەلگىلى بولدى. بۇدان بۇرىن يتاليانىڭ ەو-نىڭ باستى بەنەفيتسيارى ەكەنىن جازعان ەدىك.
ەكى ايعا سوزىلعان شەكتەۋدەن سوڭ مامىردىڭ باسىندا كارانتيندى بوساڭسىتقاندا 4 ملن ادام جۇمىسىنا ورالا الىپتى. قوعامدىق تاماقتاندىرۋ ورىندارى: مەيرامحانا, ءدامحانا, بارلار جۇمىسىنا جان كىرىپ, ساياباقتار ءىشى ادامدارمەن كورىكتەنىپ, قوعامدىق كولىكتەر جۇرە باستاعان. ال 18 مامىردا ەلدەگى بارلىق كاسىپورىندار مەن ءوندىرىس ورىندارى سانيتارلىق نورماالاردى ساقتاي وتىرا جۇمىستارىنا كىرىسكەن. وسىعان قاراماستان COVID-19 تىرناعىنىڭ ەكونوميكاعا سالعان تىرتىعىن يتاليا حالقى بىرازعا دەيىن سەزىنەتىن بولادى.
