جىل باسىنان بەرى بەينەباقىلاۋ كامەراسىنىڭ كومەگىمەن 67 قىلمىس اشىلدى. بەينەباقىلاۋشىلار ازاماتتاردان كەلىپ تۇسكەن حابارلامالاردى قابىلداۋ جانە وڭدەۋ بارىسىندا بارلىق كۇدىكتى ارەكەتتەردى, ادامداردىڭ مىنەز-قۇلقىن جانە كامەراعا تۇسكەن كۇماندى ادامداردى جەدەل تەكسەرەدى.
مىسالى, 2020 جىلدىڭ 17 اقپانىندا قىزىلوردا قالالىق پب جەدەل باسقارۋ ورتالىعىنىڭ بەينەباقىلاۋ ينسپەكتورى ساعات 03:30-دا كافەنىڭ جانىندا بەلگىسىز بىرەۋ قىزدى ۇرىپ-سوعىپ, وقيعا ورنىنان قاشىپ كەتكەنىن بايقاعان. ساناۋلى سەكۋندتا جەلتوقسان كوشەسىندەگى كامەرالاردى شولۋ بارىسىندا, كافەلەردىڭ بىرىندە ءۇش ادام ءبىر-بىرىمەن توبەلەسىپ جاتقانىن بايقاپ, دەرەۋ كەزەكشى ينسپەكتور پاترۋلدىك پوليتسيا ناريادىن وقيعا ورنىنا جىبەرىپ, كۇدىكتى ۇستالدى. كەيىن قىزدى ۇرىپ-سوققان بۇزاقىنىڭ قازالى اۋدانىنىڭ 26 جاستاعى تۇرعىنى ەكەنى انىقتالدى.
8 تامىزدا "قۇقىقتىق ءتارتىبى" جەدەل پروفيلاكتيكالىق ءىس-شاراسى بارىسىندا بەينەكامەرا بويىنشا باقىلاۋ ينسپەكتورى تۇنگى ساعات 3-تە وبلىس ورتالىعىندا كۇدىكتى جاس جىگىتتى بايقايدى. تەكسەرۋ ءۇشىن پوليتسيا ناريادى جىبەرىلدى. كەلگەن پاترۋلدىك پوليتسەيلەردى كورىپ, ەشقانداي تۇسىندىرمەسىز قاشا جونەلگەن. ول ۇستالعاننان كەيىن سومكەسىندە تراۆماتيكالىق تاپانشا بولعاندىعى انىقتالدى. وقيعانىڭ ءمان-جايى انىقتالۋدا.
ايتا كەتەيىك, جىل باسىنان بەرى بەينەباقىلاۋ كامەرالارىنىڭ كومەگىمەن 10 مىڭعا جۋىق اكىمشىلىك قۇقىق بۇزۋشىلىق, ونىڭ ىشىندە 8 مىڭنان استام جول قوزعالىسى ەرەجەلەرىن بۇزۋ انىقتالعان.
