جەرگىلىكتى اتقارۋشى ورگانداردىڭ وكىلدەرى سەناتورعا وڭىردە كاسىپكەرلىك سالاسى قارقىندى دامىپ كەلە جاتقانىن ايتتى. ءوز كاسىبىن اشقان تۇرعىندار «اۋىل – ەل بەسىگى» جانە «جۇمىسپەن قامتۋدىڭ جول كارتاسى» مەملەكەتتىك باعدارلامالارىنىڭ يگىلىگىن كورىپ وتىر.
اتالعان جول كارتاسى اياسىندا اۋدان بويىنشا جيىرماعا جۋىق جوبا قولعا الىنعان. ولاردىڭ جالپى قۇنى ءبىر جارىم ميلليارد تەڭگەنى قۇرايدى. سونىڭ ىشىندە 15 جوبا ينفراقۇرىلىم سالاسىنا تيەسىلى بولسا, قالعانى ينۆەستيتسيالىق باستامالار. قازىرگى تاڭدا اۋداندا مەكتەپ قۇرىلىسى جانە جول جوندەۋ جۇمىستارى جۇرگىزىلۋدە. سونداي-اق كوشەلەرگە جارىق شامدارى ورناتىلىپ جاتىر.
ساپار بارىسىندا سەنات دەپۋتاتى كوروناۆيرۋس ىندەتىنە قاتىستى ايماقتاعى احۋالعا ەرەكشە كوڭىل ءبولىپ, ورتالىق اۋداندىق اۋرۋحاناعا ارنايى باردى. جەرگىلىكتى مامانداردىڭ ايتۋىنشا, پاندەميا باستالعالى بەرى اۋداننىڭ 1700-گە جۋىق ازاماتىنان سىناما الىنعان. سونىڭ 246-سىنان دەرت جۇقتىرعانى انىقتالعان. دەگەنمەن, بۇگىندە ناۋقاستاردىڭ 90 پايىزى ەمدەلىپ شىققان.
ءوز كەزەگىندە سەناتور ەمدەۋمەن بىرگە, اۋرۋدى انىقتاۋ, الدىن الۋ شارالارىن ۇنەمى باستى نازاردا ۇستاۋ كەرەكتىگىن ايتتى. وسى رەتتە مەملەكەت باسشىسىنىڭ تاپسىرماسىمەن ناۋقاستاردىڭ ۇيلەرىنە بارىپ مەديتسينالىق قىزمەت كورسەتەتىن ەكى بىردەي ءموبيلدى بريگادا قۇرىلعانىن ايتا كەتكەن ءجون.
سونىمەن قاتار سەناتور اۋداندىق پروكۋراتۋرانىڭ قىزمەتكەرلەرىمەن كەزدەستى. سونىڭ بارىسىندا رىسقالي ابدىكەروۆ ازاماتتاردىڭ تۇرمىس ساپاسىن ارتتىرۋ ءۇشىن ۇكىمەتتىڭ ارنايى باعدارلامانى قولعا العانىن جانە پارلامەنت وسى ماقساتپەن بىرقاتار زاڭ قابىلداعانىن جەتكىزدى. دەپۋتات پارلامەنتتىڭ قىلمىستىق كودەكسكە تۇزەتۋلەر ەنگىزگەنىن دە تىلگە تيەك ەتىپ, مۇنداي شارالار اۋىلدىق جەرلەردە قىلمىستى ازايتىپ, حالىقتىڭ ءال-اۋقاتىن ارتتىرۋعا ىقپال ەتەتىنىن اتاپ ءوتتى.
