پرەزيدەنت ەڭبەگىندە اتاپ وتىلگەندەي, ابايدىڭ ۇلىلىعى بارشا ادامزات بالاسىنا ءۇن قاتۋىندا جاتسا كەرەك. ءوز مۇراسىندا ۇلى ويشىل بۇگىنگى قاۋىمعا عالامات قۇندى مۇرا قالدىردى.
اللانىڭ ادامدى, ادامنىڭ اللانى, ادامنىڭ ادامدى ءسۇيۋى ارقىلى ء(ۇش ءسۇيۋ ياعني يمانيگۇل) تولىق ادام تۇجىرىمداماسىن ۇسىندى. ەگەر ادامنىڭ اللا جاراتقان ون سەگىز مىڭ عالامنىڭ ىشىندەگى ەڭ جەتىلگەن, ەڭ قۋاتتى, اقىل-ساناعا, ويعا يە بولعان ەرەكشە جاراتىندى ەكەنىن ەسكەرسەك, ابايدىڭ سول ادام ارقىلى بارشا ادام بالاسىنا ءسوز ارناعانىن بايقايمىز. كوپۇلتتى قازاقستان حالقى ءۇشىن, جالپى الەم ءۇشىن اقىن ەڭبەكتەرى الەمنىڭ ون تىلىنە اۋدارىلىپ, باسپاعا ازىرلەنگەندىگى قۋانتارلىق جايت.
پرەزيدەنت اتاپ وتكەندەي, ءبىلىم يگەرۋ, تاربيە ماسەلەسى, جاڭا كاسىپتى مەڭگەرۋگە ۇمتىلىس, ىنتىماق پروبلەمالارى تۇنىپ تۇر. دەمەك, اباي ءوز ارناۋى ارقىلى تۋعان حالقىنىڭ ءتول توپىراعىنداعى رۋحاني-مادەني شۇيگىندىكتىڭ مولدىعىن, ايرىقشا قۋاتتى اقىل-وي, سانا اۋەلەتىن كورسەتىپ تۇر.
پرەزيدەنت ەڭبەگى ۇلى ابايدىڭ ماڭگىلىك مۇراسىنىڭ ۋاقىت اياسىنداعى ياعني كەشەگى, بۇگىنگى, بولاشاقتاعى تاعىلىمىنا سالماقتى سارالاۋ جۇرگىزۋمەن دارالانۋدا. راسىندا دا ادامزات قوعامىنىڭ دامۋىندا ماتەريالدىق يگىلىكتەر, ولاردىڭ جاعدايى, ءتۇرلى قيىندىقتار - ءبارى دە وتپەلى. ال, رۋحاني قازىنا ماڭگىلىك. سوندىقتان دا اباي مۇراسىنىڭ تاعىلىمىن تەك مەرەيتويلار تۇسىندا عانا ەمەس, بارشامىز بۇكىل بولمىسىمىزعا سىڭىرە ءبىلۋىمىز قاجەت. دالا دانىشپانىنىڭ وسيەتىن بويىما قالاي ءسىڭىردىم, نە اتقاردىم, ەندى نە ىستەگەنىم ابزال, مىنە, وزىمىزگە ءوزىمىز وسىلاي ەسەپ بەرسەك, ءومىر اتتى ۇعىمدى, ءومىر ءسۇرۋدىڭ ءمان-ماعىناسى مەن مازمۇن, ماڭىزىن جەكە تۇيسىنگەنىمىز بولماق.
ۇلى اباي الەمگە ءوز مۇراسى ارقىلى حالقىن تانىتقان قايتالانباس تۇلعا, ءبىزدىڭ ماقتانىشىمىز, رۋحاني بويتۇمارىمىز. قازاقتىڭ ۇلى دانىشپانىن ۇلىقتاعان ەل پرەزيدەنتىنە راقمەت.
قارلىعاش حامزينا
قارتۋ دوتسەنتى, فيلولوگيا عىلىمدارىنىڭ كانديداتى
