كارانتين كەزىندە 10 كۇندە قىتايدىڭ ۋحان قالاسىندا سالىنعان اۋرۋحانا جايلى ەستىگەندە قاراپايىم حالىق قۇرىلىستىڭ ساپاسىنا كۇمانمەن قارادى. كوپ ۇزاماي BI-Group كومپانياسى نۇر-سۇلتان قالاسىنان 12, شىمكەنتتەن 25 كۇندە ينفەكتسيالىق اۋرۋحانا سالدى. ادامدار تاعى دا سەنىمسىزدىك تانىتتى. سەبەبى مەملەكەتتىك باسقارۋ جۇيەسىندە جوبالىق مەنەدجمەنت ارقىلى جىلدام ءارى ساپالى قۇرىلىستى اياقتاۋعا بولاتىنىنان بەيحابار ەدى. ال, ءبىز تاڭدانىسپەن قاراپ جۇرگەندە انگليا, جاپونيا, اقش, اۆستراليا, كانادا, وزبەكستان سەكىلدى الەم ەلدەرى مەملەكەتتىك باسقارۋ بويىنشا ارنايى ۇلتتىق اگەنتتىك قۇرىپ, جوعارى ناتيجەگە قول جەتكىزىپ ۇلگەردى. ەندى قازاقستان دا وسى تاجىريبەگە سۇيەنىپ, ەلىمىزدىڭ بارلىق ايماعىنان جوبالىق كەڭسەلەر اشۋدى جوسپارلاپ وتىر.
بۇل باستاما شىمكەنت قالاسىنىڭ اكىمى مۇرات ايتەنوۆتىڭ قولداۋىمەن العاشقىلاردىڭ ءبىرى بولىپ شىمكەنتتە قولعا الىندى. 2019 جىلدىڭ قاراشا ايىندا «Shymkent» الەۋمەتتىك-كاسىپكەرلىك كورپوراتسياسى» اكتسيونەرلىك قوعامىنىڭ نەگىزىندە جۇمىس ىستەيتىن شىمكەنت قالاسى اكىمدىگىنىڭ جوبالىق كەڭسەسى قۇرىلدى.
2017 جىلدان بەرى قازاقستاننىڭ باسقارۋ جۇيەسىنە جوبالىق مەنەدجمەنتتى ەنگىزۋ جونىندە باعىت-باعدار كورسەتىپ كەلە جاتقان مەملەكەتتىك باسقارۋداعى جوبالىق مەنەدجمەنتتى دامىتۋ ورتالىعىنىڭ جەتەكشىسى ارمان ەۆنيەۆتىڭ ايتۋىنشا, شىمكەنت قالاسىندا مەملەكەتتىك باسقارۋ جۇيەسى جولعا قويىلا باستادى.
"ەڭ الدىمەن, شىمكەنت قالاسى اكىمدىگىنىڭ جوبالىق كەڭسەسىنىڭ جۇمىسىنا توقتالىپ وتەيىن. كەڭسە 4 باعىت بويىنشا جۇمىس ىستەيدى. العاشقىسى – ادامي كاپيتال. بۇل سەكتور دەنساۋلىق, ءبىلىم بەرۋ, جۇمىسپەن قامتۋ سالالارىنا جاۋاپ بەرەدى. ەكىنشىسى – ينفراسترۋكتۋرا. ياعني, قالا اۋماعىنداعى قولعا الىنعان قۇرىلىستار, ولاردىڭ جۇرگىزىلۋى سىندى ماسەلەلەردى قامتيدى. ءۇشىنشىسى – كاسىپكەرلىك جانە يندۋستريا. وڭىرگە ينۆەستيتسيا تارتۋ, ەكسپورت كولەمىن ۇلعايتۋ, تۋريزم سالاسىن كۇشەيتۋ سەكىلدى ماسەلەلەرگە ماڭىز بەرىلەدى. ءتورتىنشى باعىت – مەملەكەتتىك جاعداي. ياعني, توتەنشە جاعداي, مەملەكەتتىك قىزمەتتەردىڭ جۇمىسى باقىلاۋعا الىنادى. بۇگىندە جوبالىق كەڭسە وسى ءتورت باعىت بويىنشا جۇمىس ىستەپ, باسقارۋ جۇيەسىن قاداعالاپ, ماسەلەلەردى دەر كەزىندە شەشىپ وتىر.
ال, شىمكەنت قالاسى اكىمدىگىنىڭ جوبالىق كەڭسەسى مەملەكەتتىك باسقارۋ جۇيەسىنە جوبالىق مەنەدجمەنتتى ەنگىزگەننەن نە ۇتادى؟ ەڭ الدىمەن قاعازباستىلىقتى جويىپ, زاماناۋي پلاتفورمالاردى پايدالانۋ ارقىلى اتقارىلىپ جاتقان جۇمىستاردى تۇتاس باقىلاپ وتىرادى. بۇرىن جوبالاردى جۇزەگە اسىرۋ ءۇشىن بيۋدجەتتەن اقشا بولىندىرۋدەن باستاپ جوبا اياقتالعانعا دەيىنگى جۇمىستاردىڭ بارلىعى قۇجات بويىنشا جۇرگىزىلەتىن. سوندىقتان قاجەتتى قۇجاتتاردى ءبىر مەكەمەدەن ءبىر مەكەمەگە جەتكىزۋ, وعان جاۋاپ الۋ ايلاپ كۇتۋدى قاجەت ەتەتىن.
قازىر جوباعا قاتىستى مەكەمە, قىزمەتكەر, كاسىپكەر نەمەسە جەكە تۇلعا ونى پلاتفورما ارقىلى كەز كەلگەن ۋاقىتتا كورە الادى. دەمەك, ءار جاۋاپتى مامان ۋاقىتى جەتكىلىكتى بولعاندىقتان ساپاعا جۇمىس ىستەيدى. باسشىلىق تاراپ, اكىم, باسقارمالار جوسپارداعى جۇمىستىڭ قالاي جۇرگىزىلىپ جاتقانىن كەز كەلگەن ۋاقىتتا پلاتفورماعا قوسىلۋ ارقىلى باقىلاي الادى", – دەيدى ارمان قايرات ۇلى.
ال, "Shymkent" الەۋمەتتىك-كاسىپكەرلىك كورپوراتسياسى" اكتسيونەرلىك قوعامى باسشىسىنىڭ ورىنباسارى عاني قارابەكوۆ مەملەكەتتىك باسقارۋ جۇيەسىنىڭ جوبالىق مەنەدجمەنتى بويىنشا ارنايى پلاتفورمانى مەملەكەتتىك ورگاندار, ياعني باسقارمالار, ۆەدومستۆالىق ۇيىمدار مەن "نۇر وتان" پارتياسىنىڭ فيليالى جانە ارنايى ماماندار ءبىر ۋاقىتتا باقىلاپ وتىرا الاتىنىن ايتادى.
"بۇگىندە شىمكەنت قالالىق جوبالىق كەڭسەسىندە 250 اكىمدىكتىڭ قىزمەتكەرى, 23 باسقارما مەن ۆەدومستۆالىق ۇيىم, "Shymkent" الەۋمەتتىك-كاسىپكەرلىك كورپوراتسياسى" اكتسيونەرلىك قوعامى, نۇر وتان پارتياسىنىڭ فيليالى جالپى 1400 جوبا بويىنشا جۇمىس ىستەپ جاتىر. بۇل جۇيەنىڭ ەڭ ۇتىمدى تۇسى – جوعارىدا ايتقان بارلىق ورگاندار ءبىر ۋاقىتتا ارنايى پلاتفورمادا جۇرگىزىلىپ جاتقان جوبالاردى باقىلاپ, وزدەرىنىڭ كوزقاراستارىن ءبىلدىرىپ, پىكىر الماسا الادى. ەڭ قۋاناتىنى, قالا اكىمى مۇرات اتەنوۆتىڭ ءوزى بۇل جۇيەنى ءتۇسىنىپ, جۇمىس ىستەپ, جىبەرىلگەن قاتەلىكتەرگە ۋاقىتىندا تۇزەتۋ ەنگىزىپ وتىر. ءدال 100 ءجۇز پايىز جاڭا جۇيەگە كوشىپ, تەك قانا قاشىقتىقتان جۇمىس ىستەۋگە دايىنبىز دەۋگە بولا قويماس. بىراق 80 پايىز قاعازباستىلىقتان ارىلدىق دەۋگە بولادى", – دەيدى ول.
وسى ورايدا, بۇل جۇيەنىڭ قاراپايىم تۇرعىندار ءۇشىن قانداي پايداسى بار دەگەن سۇراقتىڭ تۋىنداۋى زاڭدى. ەڭ الدىمەن مەملەكەتتىك ورگاندار قۇرىلىسىن جۇرگىزەتىن تۇرعىن-ۇيلەر, اۋرۋحانالار, مەكتەپ پەن جولدار تەز ءارى ساپالى اياقتالىپ, كوپشىلىككە ۋاقتىلى بەرىلەدى. سونداي-اق تۇرعىندار دا جۇرگىزىلىپ جاتقان جوبالاردى باقىلاپ, ءتىپتى قۇرىلىسقا قاتىسى بار ارحيتەكتور سەكىلدى مامان رەتىندە جوبالاردى جۇزەگە اسىرۋعا قاتىسا الادى.
شىمكەنت قالاسى اكىمدىگىنىڭ جوبالىق كەڭسەسى اتقارىپ جاتقان جۇمىستىڭ جاي-جاپسارىمەن تانىسۋ ءۇشىن كەڭسەنىڭ جەتەكشىسىمەن تىلدەسۋدى ءجون كوردىك.
ء"بىز ەڭ الدىمەن بىردەن جۇمىسقا كىرىسپەي تۇرىپ, ساۋاتتى قىزمەتكەرلەر جاساقتاۋعا تىرىستىق. الدىمەن ورتالىقتاعى مامانداردى ەكسپەرت رەتىندە دايارلاپ, سوسىن ولار ارقىلى قالا, اۋدانداردا اشىلعان ارنايى كەڭسەلەردە جەرگىلىكتى اكىمدىكتەردىڭ باسشىلارىنا, ماماندارى مەن ساراپشىلارىنا جوبالىق مەنەدجمەنت قاعيدالارى, ۇستانىمدارى جايلى ترەنينگتەر وتكىزىپ, ءتۇسىندىرۋ جۇمىستارىن جۇرگىزدىك. ناتيجەسىندە, جوبالىق كەڭسەگە قاتىستى ورگاندار, باسقارمالار, ۇيىمدار مەن ماماندار جۇزەگە اسىرىلىپ جاتقان بارلىق جوبالاردى مۇقيات قاداعالاپ, كەيبىر تۇيتكىلدەردىڭ دەر كەزىندە ءتۇيىنىن تارقاتىپ وتىر. ەگەر پروبلەمانى ەرتە بىلسەڭ, دەر كەزىندە شەشىلەدى. ءدال وسى جوبالىق كەڭسە قۇرىلعانعا دەيىن مۇنداي وڭتايلى باسقارۋ جۇيەسى بولعان جوق. قاتەلىكسىز جۇمىس ىستەپ جاتىرمىز دەپ ايتا المايمىن. قاتەلىكتەر بار. بىراق سونى تۇزەتۋ, ءتۇسىنۋ ارقىلى الداعى ۋاقىتتا باسقارۋ جۇيەسىن جۇيەلەپ, جوعارى دەڭگەيگە كوتەرەتىن بولامىز", – دەدى اسقار سۇلەيمەنوۆ.
بۇل جۇيە وركەنيەتتى ەلدەردە بۇرىننان قولدانىلىپ كەلەدى. ەندى قازاقستاننىڭ دا باسقارۋ جۇيەسىنە وسىنداي ەداۋىر وزگەرىس كەرەك. باستاۋ العان جۇمىستار اياقسىز قالماسا, بۇل جۇيەنىڭ جەمىسىن كورەتىن كۇن الىس ەمەس دەگەن ويدامىز.
