ايماقتار • 10 تامىز، 2020

تالدىقورعان قالاسىنداعى ەكى پروۆيزورلىق ورتالىق جابىلدى

34 رەت كورسەتىلدى

الماتى وبلىسىندا جۇقپالى ىندەتپەن كۇرەسۋ شاراسى وڭ ناتيجە بەرە باستادى. وڭىردەگى ەپيدەميالىق جاعداي كۇن سايىن جاقسارىپ كەلەدى. ونىڭ دالەلىن ىندەت جۇقتىرعاندار سانىنىڭ كەمىپ، ەمدەلىپ شىققان ناۋقاستاردىڭ ۇلەسى ارتقانىنان بايقاۋعا بولادى، - دەپ حابارلايدى egemen.kz.

ماسەلەن، بۇگىن تالدىقورعان قالاسىنداعى  ەكى پروۆيزورلىق ورتالىق جابىلدى. وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ پروۆيزورلىق ستاتسيونارلاردى كەزەڭ-كەزەڭمەن كونسەرۆاتسيالاۋ باستالعانىن ايتتى. جالپى وبلىستاعى ستاتسيونارلار جۇكتەمەسىنىڭ تومەندەۋىنە بايلانىستى ينفەكتسيالىق توسەك سانى 520 ورىننان 490 ورىنعا،  پروۆيزورلىق توسەك سانى 3560 ورىننان 2541 ورىنعا دەيىن  قىسقارتىلعان.

"ايماقتا ىندەتپەن كۇرەس جۇمىسى ءبىر ساتكە دە تولاستاعان جوق. دارىگەرلەردىڭ جانقيارلىق ەڭبەگى ارقاسىندا ەمدەلىپ شىققان ناۋقاستار سانى ارتىپ، دەرت جۇقتىرعاندار ۇلەسى تومەندەدى. وسىنداي وڭ وزگەرىستەن كەيىن تالدىقورعان قالاسىنداعى اسكەري گوسپيتالدا اشىلعان پروۆيزورلىق ورتالىقتى جابۋ تۋرالى شەشىم قابىلدادىق. ەندى گوسپيتال قالىپتى جۇمىسىن باستايدى. سونىمەن قاتار وبلىس ورتالىعىنداعى ايماقتىق تەرى-ۆەنەرولوگيالىق ديسپانسەر دە پروۆيزورلىق قابىلداۋدى توقتاتىپ، جوسپارلى تۇردە ناۋقاستاردى قابىلداۋعا دايىن"، - دەيدى وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ باسقارما باسشىسى.

ايتپاقشى، وسى ساتتە الماتى وبلىسىنىڭ اۋرۋحانالارىنىڭ نەگىزىندە اشىلعان پروۆيزورلىق ورتالىقتاردا  1043 ادام ەم قابىلداپ جاتىر. جالپى، بۇگىنگە دەيىن 4048 ناۋقاس دەرتتەن ايىعىپ، جازىلىپ شىققان ەكەن.

سوڭعى جاڭالىقتار

ۇقساس جاڭالىقتار