23 قازان، 2013

اقىلى جول

263 رەت كورسەتىلدى

تولەم جۇيەسىندەگى تۇيتكىلدەردىڭ سىرى نەدە؟

ەلىمىزدە اۆتوجول سالاسىنىڭ رەفورمالانىپ جاتقانىن، سونىڭ ناتيجەسىندە «قازاۆتوجول» ۇك» اق قۇرىلعانىن بۇعان دەيىن جازعانبىز. بۇگىن وسى اكتسيونەرلىك قوعامنىڭ قىزمەتى مەن اقىلى جول تۋرالى اڭگىمەلەمەكپىز.

201102041204 1

 تولەم جۇيەسىندەگى تۇيتكىلدەردىڭ سىرى نەدە؟

ەلىمىزدە اۆتوجول سالاسىنىڭ رەفورمالانىپ جاتقانىن، سونىڭ ناتيجەسىندە «قازاۆتوجول» ۇك» اق قۇرىلعانىن بۇعان دەيىن جازعانبىز. بۇگىن وسى اكتسيونەرلىك قوعامنىڭ قىزمەتى مەن اقىلى جول تۋرالى اڭگىمەلەمەكپىز.

201102041204 1

راسىن ايتقاندا، اۆتوجولداردى زامان تالابىنا ساي رەفورمالاۋدى ۇكىمەت باستاپ، ەل قوستاعانىمەن جۇرتتىڭ ءبارىنىڭ كوڭىلىنەن شىقتى دەسەك قاتەلەسەمىز. ويتكەنى، اۋىل، اۋدانارالىق جولدار سول تاز قال­پىندا قالاتىن سىڭايلى. سەبەبى، «قازاۆتوجول» ۇك» اق تەك رەسپۋب­ليكالىق جانە حالىقارالىق جول­داردىڭ جاعدايىنا عانا جاۋاپتى. ال اۋىل، اۋدان جولدارى جەرگىلىكتى اتقارۋشى ورگانداردىڭ قۇزىرىندا قالا بەرمەك. دەسەك تە، جاڭا قۇرىلىمعا جۇكتەلىپ وتىرعان جاۋاپكەرشىلىك وتە ۇلكەن. ونى ۇلتتىق كومپانيانىڭ باسقارما توراعاسى ەرىك سۇلتانوۆتىڭ سوزىنەن اڭعاردىق.

قازاقستاننىڭ قازىرگى دامۋ كە­زەڭىندە ەلىمىزدىڭ اۆتوجولدارىن حالىقارالىق تالاپتارعا ساي قايتا قۇرىپ، جاڭاشا جابدىقتاۋ ۋاقىت تالابى بولىپ تۇر. ويتكەنى، ەۋرازيا كىندىگىنە ورنالاسقان جەرىمىز ءبىزدى ترانزيتتىك ەل بولۋعا ىڭعايلاۋدا. سوندىقتان، اۆتوجول قىزمەتتەرىن جو­عارى دارەجەدە جەتىلدىرۋدەگى باس­تى ماقسات باسەكەلەستىك قاعيدالارىن نەگىزگە الىپ، الەمدىك اۆتوجول جۇيەسىنە ينتەگراتسيالانۋ بولىپ تابىلادى، دەدى ە.سۇلتانوۆ.

مۇنىمەن قاتار، كومپانيانىڭ باستى مىندەتى – رەسپۋبليكالىق جانە حالىقارالىق اۆتوجولداردى سالۋدى، جوندەۋدى، بابىندا ۇستاۋدى ەل بيۋدجەتىنە سالماق سالماي، زامان تالابىنا ساي كوممەرتسيالىق جۇيەمەن ءوزى ۇيىمداستىرىپ، ءوزى اتقارۋى ءتيىس. سەبەبى، بۇرىنعى مەملەكەتتىك باسقارۋ جۇيەسىندە اۆتوجول سالاسى تەك رەسپۋبليكالىق بيۋدجەتتەن عانا قارجىلاندىرىلاتىن. بۇل كولىكتىك جۇيەنى ومىرگە قولايلى ەتىپ قۇرۋ مەن قامتاماسىز ەتۋگە عانا مۇمكىندىك بەرگەن. ال حالىقارالىق تالاپتارعا ساي جابدىقتاۋعا جەتكىلىكسىز ەدى.

ەندى سالانىڭ ەتەك-جەڭىن جيناپ، جولدى باسقارۋدىڭ جاڭا جۇيە­سىنە كوشكەن كومپانيا ۇلكەن جول­داردىڭ قۇرىلىسىن جۇرگىزۋگە، قايتا قۇرىلىمداپ جاڭعىرتۋعا جاڭا ءتا­سىلدەر ەنگىزەدى. سونداي-اق، اقىلى جول جۇيەسىن ەندىرۋدىڭ قۇقىقتىق مەحانيزمدەرىن رەتتەيدى. قازىرگى تاڭدا، وسى جۇمىستار جۇزەگە اسىرىلىپ جاتىر. ءوز كەزەگىندە اقىلى اۆتوجول جۇيە­سى ومىرىمىزگە بىرتىندەپ ەنىپ كەلەدى.

ادام بالاسىنىڭ كوپشىلىگى جاڭا­لىققا كۇمان-كۇدىكپەن قاراپ، ۇدەرىپ تۇراتىنى بار. اۋەلى يگىلىگىنەن گورى كەمشىلىكتەرىنە كوپ ءمان بەرەدى. وسى جىلدىڭ 31 مامىرىندا تۇڭعىش اقىلى اۆتوجول ىسكە قوسىلدى. ودان بەرى ءبىرشاما ۋاقىت ءوتتى. ەلدەگى جولدارعا قاتىستى زاڭ زامان تالابىنا ساي جەتىلدىرىلىپ، تولىقتىرىلدى. دەي تۇرعانمەن، قوعامدا، اسىرەسە، جۇرگىزۋشىلەر اراسىندا كوپتەگەن تۇسىنىسپەۋشىلىكتەر پايدا بولدى. داۋدىڭ كوبى تولەم قابىلدايتىن پوست-تەرمينالدارعا قاتىستى.

تولەم تەرمينالدارىن ىسكە قوس­قاندا بىرقاتار قيىندىقتارعا تاپ بول­عانىمىز راس. سولاردىڭ نەگىزگىلەرىنە عانا توقتالايىن. جۇرگىزۋشى ءجۇرۋ ەرەجەسىن دۇرىس ساقتاماعاندىقتان كەزدەيسوق قاتەلىكتەر ورىن الادى. ماسەلەن، اۆتوكولىكتەر اقى ءتو­لەۋ بەكەتىنە جاقىنداعاندا ارا-قاشىقتىقتى دۇرىس ۇستاماسا كولىكتىڭ گاباريتى دۇرىس انىقتالماۋى مۇمكىن. مۇنىمەن بىرگە، اۆتوكولىكتەر لاس، جۋىلماعان بولسا دا تولەماقى جۇيەسى مەملەكەتتىك تىركەۋ ءنومىرىن دۇرىس كورە المايدى. وسىنداي جاعدايلاردا ارنايى وپەراتورلار مەن ينجەنەرلەر كومەككە كەلىپ، ورىن العان قاتەلىكتەردى تۇزەتەدى. ءسويتىپ، جۇرگىزۋشىگە ءمان-جايدى تۇسىندىرەدى، دەيدى ە.سۇلتانوۆ.

ال پوست-تەرمينالداردىڭ كەيدە بۇزىلىپ قالۋىنا، جۇرگىزۋشىلەردىڭ كەيبىرەۋلەرى قاعاز بانكنوتتىڭ ورنىنا تەمىر اقشا نەمەسە ءتىپتى، باسقا زات سالىپ جىبەرۋى سەبەپ بولادى. اقىلى ماگيسترالدەگى اۆتوكولىك جۇرگىزۋشىلەرىنىڭ ءتۇرلى تارتىپسىزدىكتەرى مەن بىلىكسىزدىكتەرى تۋرالى ەستىگەن سوڭ، ولارمەن كەزدەسىپ، سويلەسۋدى ءجون سانادىق. اقىلى اۆتوماگيسترالمەن كۇندەلىكتى ءجۇرىپ جاتقان اۆتوكولىكتەر نەگىزىنەن استاناداعى تەمىر جول ۆوكزالى مەن ساپارجايعا كەلىپ ايالدايتىنى ءمالىم. راسىن ايتقاندا، ءبىزدىڭ كىم ەكەنىمىزدى جانە اقىلى اۆتوجول تۋرالى ماتەريال دايىنداپ جۇرگەنىمىزدى ەستىگەن جۇرگىزۋشىلەر جان-جاقتان جامىراپ قويا بەردى. سەبەبى، ولارعا كوپ جاعداي تۇسىنىكسىز.

7faaa5c6b5c44f2d425b775bfa96dfd6

الىس-جاقىن شەتەلدەردەگى اقىلى اۆتوجولدار تۋرالى ءبىز دە ەستىپ، ءساتى تۇسكەندە ءتۇرلى باسىلىمداردان وقىپ تا جۇرەمىز. سودان بىلەتىنىمىز، ولاردا اقىلىمەن قاتار اقىسىز بالاما جولدار دا بار. سونداي-اق، اقىلى جولدارى تاقتايداي تەگىس، كورسەتىلەتىن قىزمەتتەرىنىڭ ساپاسى دا جاقسى. ال، بىزدە بالاما جول بىلاي تۇرسىن، اقىلى اۆتوبانىمىزدىڭ اشىلعانىنا 3-4 اي عانا بولعانىنا قاراماي، كەي تۇستارىنىڭ كۇيى كەتە باستاعان. كۇن ساناپ جولداعى جارىلعان ويىقتار سانى ارتىپ كەلەدى. وعان جول جوندەۋشىلەر قارا مايدى، ياعني گۋدروندى قۇيا سالادى. ونىڭ كوپكە شىدامايتىنى بەلگىلى. ارالىقتاعى ەلدى مەكەن تۇرعىندارىنا كۇندە اقىلى جولدا ءجۇرۋ دە وڭايعا سوقپايدى. مەن ءوزىم دە اۋىلدانمىن، بالاما جول بولماعاندىقتان اقىلى ماگيسترالدە جۇرۋگە ءماجبۇرمىن، دەدى Mersedes-Sprinter كولىگىنىڭ جۇرگىزۋشىسى ساكەن تالاسباەۆ.

تولەم جۇيەسى رەتتەلمەي-اق قويدى. ءار وتكەندە ءارتۇرلى باعا كورسەتەدى. ونىڭ ءمان-جايىن تۇسىندىرەدى دەگەن وپەراتورلاردىڭ ءوزى تولەم جۇيەسى تۋرالى دىم بىلمەسە كەرەك. ويتكەنى، ءجون سۇراساڭ، يىعىن قيقاڭداتىپ، باعان قانداي باعانى كورسەتسە سونى تولەۋگە ءتيىسسىز، دەپ قاراپ تۇرادى. ال، ول باعا كەيدە 2000 تەڭگە كورسەتسە، كەيدە 200-300، ءتىپتى 10 تەڭگە دە كورسەتەتىن كەزى بولادى. بىردە كوز الدىمدا ەكى كاماز جۇك كولىگى تولەم بەكەتىنە قاتار كەلدى. مەن كورىپ وتىرمىن. سولاردىڭ بىرەۋى 3060، ەكىنشىسى 2500 تەڭگە تولەدى. سونداي-اق، مەنىڭ الدىمدا ءجۇرىپ كەلگەن جەڭىل اۆتوكولىك – 200، ال 12 جولاۋشىعا شاقتالعان شاعىن اۆتوبۋسپەن كەلگەن مەن 10 تەڭگە عانا اقى بەردىم. بۇل جەردە ماعان ارزان تۇسكەنى جاقسى بولدى، ارينە. بىراق، بۇل دالەلدى وقيعا اقىلى جولداعى تولەم جۇيەسىنىڭ رەتتەلمەگەنىن كورسەتىپ تۇر ەمەس پە، دەدى Ssang-Yong اۆتوكولىگىنىڭ جۇرگىزۋشىسى ورىنباي وماروۆ. ول ءتىپتى، دالەلىن دەرەكتى ايعاقپەن ۇستەمەك ءۇشىن ءوز كولىگىنە تولەگەن ەكى تولەم تۇبىرتەگىن قولىمىزعا ۇستاتتى. ونىڭ بىرىندە – 310، ەكىنشىسىندە 2000 تەڭگە كورسەتىلگەن.

استانا-ششۋچە اقىلى جولى مەنىڭ كوڭىلىمنەن شىعادى. ەسكى، جامان جولدا ءجۇرىپ كولىگىڭدى جىلىنا بالەنباي اقشاعا قايتا-قايتا جوندەتىپ، شار­شاپ-شالدىعىپ، ساعاتتاعان ۋاقى­تىڭدى جولدا وتكەرگەننەن گورى وسىلاي اقىلى اۆتوباندا جۇرگەن ءجۇز ەسە ءتيىمدى. كەيبىر كەمشىلىكتەر مەن تۇسىنىسپەۋشىلىكتەر بولىپ جاتقان شىعار. ونىڭ ءبارى ۋاقىتشا ەكەنىن ءبارىمىز بىلەمىز. اقىلى بولسا دا، كەڭ ءارى تەگىس جولدا جۇرگەندى بارلىق جۇرگىزۋشىلەر قالايدى، ال قىزمەت كورسەتۋ جاعىن تاعى جەتىلدىرە تۇسسە نۇر ۇستىنە نۇر، دەدى سوزگە ارالاسقان Toyota Camry كولىگىنىڭ يەسى تۇرار تولەباەۆ. راسىندا، اقىلى جولداعى كەيبىر كەلەڭسىزدىكتەرگە قاراماي، وندا تابىس تاۋىپ جۇرگەن اۆتوكولىك يەلەرىنىڭ كوپشىلىگى جول جاعدايىنا ءدان ريزا ەكەندىكتەرىن ءبىلدىردى.

1338814871 dorogi

ساپارجايعا بارعاندا ستەپنوگور قالاسىنىڭ اۆتوبۋس جۇرگىزۋشىلەرىنە جولىقتىق. سوڭعى ۋاقىتتا اقىلى جول ماسەلەسى قيىنداپ كەتكەندىكتەن بۇل جولى «ستەپنوگور-اۆتوترانس» جشس ديرەكتورىنىڭ ورىنباسارى دا ەلورداعا ارنايى كەلىپتى.

ەلدەگى زاڭ بويىنشا اۆتوبان بوي­ىنداعى ەلدى مەكەندەرگە قاتىنايتىن قوعامدىق كولىكتەرگە جولدى پايدالانۋ تەگىن ەدى. جول اقىلى جۇيەگە وتكەننەن كەيىن دە ەكى اي كولەمىندە سولاي بولدى. ەندى نە وزگەرگەنىن بىلمەيمىز. اۋەلى ستەپنوگوردان استاناعا دەيىن كەلەر جولدىڭ بويىنداعى كىرىپ-شىعاتىن ەلدى مەكەندەردىڭ بارىنەن انىقتاما اكەلىپ وتىرىڭىزدار دەدى. ىڭعايسىز ءارى قولايسىز بولسا دا بۇل تالاپتارىن ورىنداپ جۇردىك. ەندى ونىڭ دا كەرەگى بولماي قالدى. اقى تولەڭدەر دەيدى. ال ءبىز جاعدايدىڭ ءمان-جايىن تولىق بىلگەنشە اقى تولەۋدەن باس تارتىپ تۇرمىز. تولەمەۋىمىزدىڭ تاعى ءبىر سەبەبى، ءار وتكەنىمىزدە ءارتۇرلى باعا كورسەتەدى. ونىڭ قايسىسى دۇرىس، قايسىسى بۇرىس ەكەنىن ايىرا الماي جۇرگەن جاعداي بار. قازىر ءار وتكەنىمىزدە اقى تولەمەگەنىمىز ءۇشىن اكت تولتىرىپ، قولىمىزعا ۇستاتىپ جاتىر. ولاردىڭ ارقايسىسىندا ءارتۇرلى باعا بولۋمەن قاتار، ونىڭ ەشبىرىندە تىركەلگەن مەملەكەتتىك ءنومىرى دە، باسىلعان ءمورى دە جوق. كۇندەردىڭ كۇنىندە جولعا اقى تولەمەگەنىمىز ءۇشىن ءتيىستى مەكەمە ءبىزدى سوتقا شاقىرتۋى بەك مۇمكىن. سول كەزدە، ەشكىمنىڭ قويعان قولى مەن ءمورى جوق اكتىمەن قالاي سوتقا جۇگىنبەك دەگەن دە وي كەلەدى، دەدى پەتر ساۆكين. ول، سىزگە دە ايعاق بولسىن دەپ اكتىنىڭ كوشىرمەسىن بەردى. ونداعى بەرەشەك اقى – 21 856 تەڭگە.

وسىنشاما وكپە-نازدان كەيىن «قازاۆتوجول» ۇك» اق مەكەمەسىنە قاي­تا ورالماۋىمىز ورايسىز ەدى. باس­قارما توراعاسى ە.سۇلتانوۆ تۋىنداعان ساۋالدارعا ناقتى جاۋاپتار بەردى.

قازىر ءومىرىمىز قاربالاس شاققا تولى، دەپ باستادى ول ءسوزىن. اركىم، ءار جاققا اسىعادى دا جۇرەدى. ۋاقىت دەگەن وتە قات ءارى تىم قىمبات كەز. ايتپەسە، اقىلى جولدىڭ ءتارتىبى تۋرالى ءتۇسىندىرۋ جۇمىستارى ماگيسترال اشىلاردان بۇرىن باستالعانى بەلگىلى. سودان، ءالى كۇنگە دەيىن جولاقى جيناۋ بەكەتىندە كومپانيانىڭ شتاتىندا جوق ينسپەكتورلاردى ۇستاپ وتىرمىز. ويتكەنى، جۇرگىزۋشىلەردىڭ تالاي رەت كورسەتىپ، تۇسىندىرگەن قاراپايىم جۇيەنى ۇعىپ الۋى تىم قيىنعا سوعىپ تۇر. جولدىڭ تۇساۋكەسەر راسىمىندە بارلىق قاعيداتتى جۇيەلەپ ۇقتىردىق. ەلدەگى بۇكىل تەلەديدارلار مەن راديولار، باسقا دا بۇقارالىق اقپارات قۇرالدارى بويىنشا جەتكىلىكتى ماتەريالدار تاراتىلدى. تەلەديدارلار ارقىلى جۇيەنىڭ قالاي جۇمىس ىستەيتىنىن ۇڭعىل-شۇڭعىلىنا دەيىن تاپتىشتەپ ءتۇسىندىرىپ، كورسەتتىك. ودان كەيىن ينسپەكتورلارىمىزدى قاداپ قويىپ، ءاربىر جۇرگىزۋشىگە ءمان-جايدى ۇقتىرۋمەن كەلەمىز. بۇل جۇمىستارىمىزدان ناتيجە جوق ەمەس، بار. كۇننەن-كۇنگە كەلەڭسىز جاع­داي­لاردىڭ سانى دا ازايىپ كەلەدى. دەسەم دە، وسى مۇمكىندىكتى پايدالانىپ، اقى جيناۋ بەكەتىنە جاقىنداعانداعى ءجۇرۋ ەرەجەسىنىڭ ءتارتىبى مەن تالابىن تاعى ءبىر قايتالايىن. سوندا جوعارىدا تۋىن­داعان ساۋالداردىڭ جاۋابى دا شىعادى.

كوپتەگەن جۇرگىزۋشىلەر اقى جيناۋ بەكەتىنە جاقىنداعاندا ساسقالاقتاپ قالادى. اراقاشىقتىقتى دۇرىس ساق­تامادىم با، ايتپەسە شەتتەۋ كەلىپ قالدىم عوي دەپ قايتا شەگىنىپ جاتادى. وسى تۇستا ۇلكەن قاتەلىك بار. بەكەتكە تاياعان اۆتوكولىكتى بەينە­باقىلاۋ بىردەن ءتۇسىرىپ الادى. ول ساس­قالاقتاپ كەرى شەگىنىپ قايتا كەل­گەندە ەكىنشى رەت تاعى تۇسىرەدى. وسىدان كەلىپ تۇسىنىسپەۋشىلىك تۋادى. ويتكەنى، بەينەباقىلاۋ كامەراسى ادام ەمەس قوي. وعان اۆتوكولىك نەشە رەت جاقىنداسا سونشا رەت ءتۇسىرىپ، كومپانياداعى ورتالىق بازاعا جونەلتە بەرەدى. ونى ەشقانداي وپەراتور كەرى قايتارا المايدى. اۆتوكولىك باقىلاۋ مونيتورىنا ەكى رەت كەلگەن سوڭ باعاسى دا وزگەرەدى. ءبىرتالاي جۇرگىزۋشىلەرگە وسىنى ۇقتىرا الماي قويدىق.

مۇنىمەن قاتار، اقى جيناۋ بەكە­تىنە كەلگەن كولىك جۋىلعان، تازا بولۋى مۇمكىن. بىراق ونىڭ مەملەكەتتىك ءنومىرىنىڭ ءبىر سانىنىڭ ءبىر شەتى عانا تازا بولماسا دا اۆتوماتتى كامەرا دۇرىس تۇسىرمەيدى. تاعى قايتالايمىن، اۆتوماتتى جۇيە اۆتوكولىككە بارىپ ءنومىردى ءسۇرتىپ قارايتىن اياقتى ادام ەمەس. وعان نە كورىنەدى، سونى ءتۇسىرىپ الا بەرەدى. بۇل جاعدايدا دا تولەم كولەمى وزگەرىپ شىعا كەلەدى. سوندىقتان جۇرگىزۋشىلەرگە ايتارىمىز، جول بويىندا ءاربىر ۇساق-تۇيەككە زەر سالىپ، مۇقيات بولىڭىزدار. ال، وپەراتورلارىمىز بەن ينسپەكتورلارىمىز جۇيەنى بىلمەيدى دەگەن دۇرىس ەمەس. جۇيەنى ىسكە قوسۋعا كومەكتەسكەن فرانتسۋزدىق كومپانيانىڭ اۋەلى 7-8 مامانى ۇنەمى وسىندا بولىپ، ءبىزدىڭ وپەراتورلارمەن بىرگە جۇمىس ىستەدى. قازىر دە شەتەلدىك ەكى بىردەي بىلىكتى مامان بار. قاجەت بولسا اقىل-كەڭەسى مەن كومەك قولىن سوزادى.

اقىلى اۆتوبان بويىنداعى ەلدى مەكەندەردىڭ تۇرعىندارى جولدى كۇندەلىكتى پايدالاناتىن بولعاندىقتان قىمباتسىنىپ جۇرگەنىن بىلەمىز. ول ءۇشىن جول ۇستىندەگى بەس اۋداننىڭ تۇرعىندارىنا وسى قازان ايىنان باس­تاپ ارنايى ابونەنتتىك جۇيە ەنگىزىپ جاتىرمىز. ابونەنتتى اقى جيناۋ بەكەتىنەن ءبىر جىلعا ساتىپ الادى. قۇنى ءبىر مىڭ تەڭگە. بىراق اۆتوكولىك مىندەتتى تۇردە جول بويىنداعى اۋداندا تىركەلگەن بولۋى شارت. ايتپەسە، كەيبىرەۋلەر ءۇي كىتاپشامدى الىپ كەلەيىن، جول بويىنداعى پالەن اۋىلدا تۇرامىن دەپ دالەلدەگىسى كەلەدى. ال، كولىگى باسقا جاقتا، ماسەلەن، استانا قالاسىنا تىركەلگەن. بەكەتتەگى اۆتوماتتى ءتۇسىرۋ كامەراسى ول كىسىنىڭ ءۇي كىتاپشاسىن ەمەس، اۆتوكولىگىن جانە ونىڭ مەملەكەتتىك ءنومىرىن تۇسىرەدى.

ال، ستەپنوگوردىڭ اۆتوبۋسىنا كەلسەك، ول قالا اقىلى اۆتوباننىڭ بويىندا ەمەس. سوندىقتان تولەمدى سوزا بەرمەي تولەگەندەرى ءجون. ويتكەنى، سوتقا شاقىرعاندا بىزگە اكتىنىڭ ەش قاجەتى جوق. ولاردىڭ اقىلى جولعا قايسى اركادان نەشە رەت كىرىپ-شىققانىنىڭ ءبارى بەينەتاسپالارعا تۇسىرىلگەن. ەرتەڭگى كۇنى تولەمگە ايىپپۇل قوسىلعاندا بەرەشەك كولەمى تىم ۇلعايىپ كەتۋى ىقتيمال. مۇنىمەن بىرگە، اقىلى جول بويىنداعى اۋدان تۇرعىندارى دا ءوز شارۋاسىمەن اقىلى ارالىقتا ءجۇرىپ، ءبىر اي كولەمىندە اقى جيناۋ بەكەتىنە كەلمەگەن بولسا، ولارعا ەسكەرتۋ قاعازى جىبەرىلەدى. ايتپاعىم، جەرگىلىكتى تۇرعىندار دا ەسكەرتۋ قاعازىن العان سوڭ تەز ارادا تولەم جاساۋى ءتيىس. ايتپەسە، تولەمگە ۇستەمە ايىپپۇل قوسىلا بەرەدى. بۇل جاعدايدا ەشكىم دە كومەكتەسە المايدى. سەبەبى، اۆتوماتتى جينالعان مالىمەتتەر قاس-قاعىم ساتتە كومپانيانىڭ ورتالىق بازاسىنا بارىپ تۇسەدى. سوتقا دا سول جاقتان جول الادى.

جاقىندا استانا-ششۋچە اۆتوجولىندا سەنات توراعاسىنىڭ ورىنباسارى اسقار بەيسەنباەۆ باستاعان سەنات جانە ءماجىلىس دەپۋتاتتارى بولىپ، اۆتوباننىڭ ەرەكشەلىكتەرىمەن تانىستى. ولار جولداعى اقى جيناۋ تەرمينالدارىنىڭ قىزمەتىنە ءدان ريزا بولدى. ويتكەنى، الەمدەگى دامىعان ەلدەردىڭ بىرقاتارىندا ءالى مۇنداي قىزمەت كورسەتۋ ۇلگىسى جوق. ەۋروپاداعى كەيبىر ەلدەردىڭ وزىندە تەرمينال جانىندا كاسسير دە بىرگە وتىرادى. ال استانا-ششۋچە جولىندا بۇل ءىستىڭ ءبارى اۆتوماتتى جۇيەمەن اتقارىلادى. سونداي-اق، ءبىزدىڭ اقىلى جول الەمدەگى ەڭ ارزان اۆتوبان ەكەن. سالىستىرار بولساق، ەڭ ارزان دەگەن كورشى رەسەيدە ءبىر شاقىرىمنىڭ اقىسى ءبىر رۋبل. ونى ءبىزدىڭ تەڭگەگە شاققاندا 5 تەڭگەگە جۋىق بولادى. مۇنىمەن قاتار، توقتاۋسىز قاشىقتىقتان تولەماقى جۇرگىزۋ قۇرىلعىسى – ترانسپوندەردى پايدالانۋ جۇيەسى ىسكە قوسىلدى. بۇيىرتسا، كەلەر جىلدىڭ كوكتەمىندە ترانسپوندەر تاعىلعان اۆتوكولىكتەرگە ارناپ اقىلى وتكىزۋ پۋنكتىندە تاعى ءبىر قوسىمشا جولاق سالامىز. سوندا ول جولاقتا كەزەك تە، ەشقانداي ىركىلىس تە بولمايدى. كولىكتەر بەلگىلەنگەن جىلدامدىقپەن توقتاۋسىز وتە بەرەدى. بىتكەن ىسكە سىنشى كوپ. دەسەم دە، اقىلى جۇيە كۇن سايىن جەتىلدىرىلىپ جاتىر، دەپ ءسوزىن اياقتادى ە.سۇلتانوۆ.

نەگىزى «قازاۆتوجول» ۇك» اق كەلەشەكتە جەكەلەگەن بىرقاتار اۆتوجول تەلىمدەرىن كەزەڭ-كەزەڭمەن اقىلى جۇيەگە وتكەرۋدى كوزدەپ وتىر. ونىڭ جالپى ۇزاقتىعى 6 982 شاقىرىمدى قۇرايدى. ول تۋرالى كەزى كەلگەندە ايتارمىز.

نۇرباي ەلمۇراتوۆ،

«ەگەمەن قازاقستان».

سوڭعى جاڭالىقتار

جانى جايساڭ جاز-اتا

قوعام • بۇگىن، 23:12

قۇمعا سىڭگەن سۋداي سۋبسيديا

قوعام • بۇگىن، 22:49

كۇلكىنى ازايتساق قايتەدى؟

قوعام • بۇگىن، 22:46

اكە اماناتتاعان ادىلدىك

قوعام • بۇگىن، 22:41

دۇبىردەن تۋعان ولەڭ

ادەبيەت • بۇگىن، 22:39

قىلقالام ۇشىنداعى قۇدىرەت

ونەر • بۇگىن، 22:35

اقتاۋدا شارشى الاڭعا كىمدەر شىعادى؟

كاسىپقوي بوكس • بۇگىن، 14:52

اتىراۋدا ەپيدجاعداي ءالى دە كۇردەلى

كوروناۆيرۋس • بۇگىن، 13:50

تۇركىستاندا ۇشەم دۇنيەگە كەلدى

ايماقتار • بۇگىن، 12:50

ۇقساس جاڭالىقتار