23 قازان، 2013

شيرەك فينالدىق شايقاستار شەڭبەرى شاقتالدى

154 رەت كورسەتىلدى

01-ديچكو 001كەشە الماتىدا ءوتىپ جاتقان بوكستان XVII الەم چەمپيوناتىنىڭ 1/8 فينالدىق جەكپە-جەكتەرى اياقتالىپ، شيرەك فينالعا شىققان 80 بوكسشىنىڭ اتى-جوندەرى بەلگىلى بولدى. بۇگىن وسىلاردىڭ تاعى تەڭ جارتىسى قىسقارىپ، چەمپيوناتتىڭ جۇلدەسىن الاتىن 40 بوكسشىنىڭ اتتارى انىقتالادى.

كەشە الماتىدا ءوتىپ جاتقان بوكستان XVII الەم چەمپيوناتىنىڭ 1/8 فينالدىق جەكپە-جەكتەرى اياقتالىپ، شيرەك فينالعا شىققان 80 بوكسشىنىڭ اتى-جوندەرى بەلگىلى بولدى. بۇگىن وسىلاردىڭ تاعى تەڭ جارتىسى قىسقارىپ، چەمپيوناتتىڭ جۇلدەسىن الاتىن 40 بوكسشىنىڭ اتتارى انىقتالادى.

01-ديچكو 001ءبىز مۇنىڭ الدىنداعى بولىپ وتكەن 1/8 فينالدىق ايقاستىڭ ءبىرىنشى كۇنىندە شارشى الاڭعا شىققان 5 بوكسشىمىزدىڭ 4-ءى قارسىلاستارىن جەڭىپ، شيرەك فينالعا جولداما العانىن ايتقان ەدىك. بۇل كۇنى ءبىزدىڭ قاتاردان تەك انتون پينچۋك قانا ساتسىزدىككە ۇشىرادى. ال كەشە كەلەسى كەزەڭگە جول تارتقاندار قاتارىن تاعى 5 بوكسشىمىز تولىقتىردى. دەمەك، بىزدەن ەندىگى جولى شىعىن بولعان جوق. مۇنىڭ ەسەسىنە، كۋبانىڭ ەكى بىردەي ۇكىلى ءۇمىتى جارىس جولىنان شىعىپ قالدى. ولاردىڭ ءبىرىنشىسى – اسا اۋىر سالماقتاعى يوحاندي ورتەگا كۇندىزگى سەسسيادا بولىپ وتكەن رەسەيلىك ماگومەد وماروۆپەن ايقاسىن 0:3 ەسەبىمەن ءبىتىردى. ال كەشكى سەسسيادا اسا جەڭىل سالماقتاعى گەراردو تەجەريا ۋەلستىك تارلان ەندريۋ سەلبيگە ءدال وسىنداي ەسەپپەن ەسە جىبەرىپ الدى.

ءالحام شۇكىر، بۇلارعا قاراعاندا ازىرگە ءبىزدىڭ جاعدايىمىز جاقسى. توعىز بىردەي بوكسشىسىمەن ىلگەرى قاراي قادام باسقان قۇرامانىڭ كەشەگى تابىستى جولىن 60 كيلوعا دەيىنگى سالماقتاعى اقتاۋلىق اقبەرەن بەرىك ءابدىراحمانوۆ گەرمانيالىق ارميان روبەرت ارۋتيۋنيانمەن كەسكىلەسكەن ۇرىس ۇستىندە جالعاستىردى. ايقاستىڭ العاشقى ەكى راۋندىندا قارسىلاستار ءبىر-ءبىرىن قايتپاي سوقتى. نەگىزىنەن رينگتىڭ ورتاسىندا وتكەن تەكەتىرەستە ولار جاقىن قاشىقتىقتا شايقاستى. دەگەنمەن، ءۇشىنشى راۋندتا الاڭ يەسىنىڭ ارتىقشىلىعى بايقالا بەردى. بەرىك بۇعان وزىنە بۇرىنعى كەزدەسۋلەردە باسىمدىق الىپ بەرگەن ءتاسىلى – اياقتى كوبىرەك ويناتىپ، ورتا جانە الىس قاشىقتىقتان سوققىلار جاساۋ ارقىلى جەتتى. سوندىقتان ءۇش تورەشى دە ونىڭ جەڭگەنىنە ءشۇبا كەلتىرگەن جوق. ال بۇگىن وتەتىن شيرەك فينالدا قازاقستاندىق اتلەت كەشە جاپون دايسيكە ناريماتسۋدى تىزە بۇكتىرگەن ۆەنەسۋەلانىڭ بەلدى سايىسكەرى لۋيس دياسپەن ايقاسقا تۇسەدى.

بۇل سالماقتا سونداي-اق، يتاليالىق ۆالەنتينو دومەنيكو – مەكسيكالىق ليندولفو دەلگادونى، ازەربايجان ەلۆين يساەۆ – يرلاند شون ماككومبتى، ءۇندى ۆيكاش ماليك – ۆەنگر ميكلوش ۆارگانى، تاي سايلوم اردي – كورەي سانگ-مين ءليدى، كۋبالىق لازارو ەسترادا – وزبەك فازليددين گايبنازاروۆتى، برازيليالىق روبسون كونسەيساو ۋكراين دميترو چەرنياكتى ۇتۋلارىمەن ەستە قالدى.

بۇدان كەيىن قازاقستان قۇراماسى ساپىنداعى ەڭ اتاعى زورى، تاعى ءبىر اقتاۋلىق اتلەت ادىلبەك نيازىمبەتوۆ 81 كيلوعا دەيىنگىلەردىڭ جەكپە-جەكتەرىن باس­تاپ بەردى. وزىنە ءوزى وتە سەنىمدى كورىنگەن ول كوسوۆولىق ارمەند حوحاجعا ءتىپتى ۇتىس تۋرالى ويلاۋعا دا مۇمكىندىك قالدىرعان جوق. وسىمەن ول قاتارىنان ەكىنشى مارتە ءوزىنىڭ بۇل چەمپيوناتتاعى شايقاسىن اسا ءبىر كۇش جۇمساماستان، ەمىن-ەركىن ءجۇرىپ ۇتىپ شىقتى. بىراق بۇگىن قايرات-قۋاتىن كوبىرەك ىسكە قوسۋىنا تۋرا كەلەتىن شىعار. سەبەبى، كەشە بەلورۋس سەرگەي نوۆيكوۆتى جولدان تايدىرعان ۇندىستاندىق سۋميت سانگۆانمەن «كۇن استىنان» ورىن الۋ جولىنداعى تالاس سونى تالاپ ەتەر ەدى.

بۇگىن بۇل سالماقتاعى تاپ وسىنداي جەكپە-جەكتەردى يتاليالىق سيمونە ءفيوريدى ۇتقان ورىس نيكيتا يۆانوۆ، ۆەنگر نوربەرت حارچانى جولدان شىعارعان يرلاند دجوزەف ۋارد، شوتلاند سكوتت فوررەستى تالقانداعان گوللانديالىق پەتەر مۋللەنبەرگ، ۋكراين ولەكساندر گانزۋلانى تىزە بۇكتىرگەن كۋبالىق حۋليو سەزار دە لا كرۋس سىندى ساڭلاقتار دا باستان كەشەدى. ال ەكى اراب جىگىتى – الجيرلىك ابدەلفاريد بەنچابلا مەن سيريالىق الاا چوسسوۋننىڭ ءپرينتسيپتى تالاستارىندا بۇلاردىڭ ءبىزدىڭ جانكۇيەرلەرگە دە اتى مەن زاتى جاقسى تانىس الدىڭعىسى باسىم شىقتى. سول سياقتى بيىل عانا ازيا چەمپيونى اتانعان وزبەك ويبەك مامازۋلۋنوۆ بوسنيالىق دجەمال بوشنياكتى ءسۇرىندىردى.

كۇندىزگى سەسسيانى اسا اۋىر سالماقتاعى قوستانايلىق يۆان دىچكو تياناقتادى. ول چەمپيونات باستالعالى بەرى ءبىرىنشى رەت تىركەلىپ وتىرعان بۇل ۇرىسىن ۆەنگر يشتۆان بەرناتپەن وتكىزدى. توبىل بويىنىڭ تۋماسى كەزدەسۋدى وتە ءابجىل، جەڭىل قيمىلمەن ءوربىتتى. ودان بۇدان مۇنداي ارەكەت كۇتپەگەن ماديار جىگىتى قاسىنا جاقىنداپ تا بارا الماي ءجۇردى. ال ەكىنشى راۋندتا ۆانيا الىستان وراعىتقاندى قويىپ، جاقىن قاشىقتىقتان سوققى جاساۋعا كوشتى. سولاردىڭ ءبىرى بۋداپەشتتىڭ بارىسىن ەسىنەن تاندىرا قۇلاتتى. ال شايقاستان كەيىن يۆاننىڭ ءوزى بۇل جولعى تاكتيكاسىن: «ءبىز تىم كوپ كۇش جۇمساماي، جەڭىل ۇتۋ مىندەتىن العا قويدىق. بۇل بۇدان دا اۋىر بولاتىن كەيىنگىگە كۇش ساقتاۋدان تۋدى»، – دەپ ءتۇسىندىردى. دەسە دەگەندەي، ونىڭ ەندىگى قارسىلاسى شىنىندا وڭاي بولمايدى. راس، يۆان ونى – ۇندىستاندىق ساتيش كۋماردى بيىلعى جازدا عانا يوردانيادا وتكەن ازيا چەمپيوناتىنىڭ 1/4 فينالىندا 3:0 ەتىپ جەڭگەن. ەندى، مىنە، تاعى دا ولاردىڭ جولدارى شيرەك فينالدا تۇيىسكەلى تۇر.

ەندى يۆانمەن بىرگە بۇگىن جارىس جولىن جالعاستىراتىن ساڭلاقتارعا كەلسەك، ولاردىڭ قاتارىنان جانكۇيەر جۇرتشىلىق الەمنىڭ 2011 جىلعى چەمپيونى ازەربايجاندىق ماگومەدراسۋل مەدجيدوۆتى، ۋكراين ەگور پلەۆاكونى، نەمىس ەريك پفايففەردى، حورۆات فيليپپ حرگوۆيچتى، يتاليالىق كلەمەنتە رۋسسونى كورەر ەدى. ولار تيىسىنشە امەريكالىق لەنروي تومپسوندى، الجيرلىك حامزا بەگۋەرنيدى، رۋمىن ميحاي نەستوردى، وزبەك ميرزوحيدجون ابدۋللاەۆتى تاباندارىنان تايدىرىپ بارىپ، ءدۇربى جولعا ءتۇستى. ال رەسەيلىك ماگومەد وماروۆتىڭ كىمدى كۇرەپ كەتكەنىن جوعارىدا ايتىپ وتتىك. بۇعان قوساتىنىمىز، يۆاننىڭ ەندىگى قارسىلاسى كۋمار ساتيش ءوز كەزەگىندە بەلورۋس يان سۋدزيلوۆسكيدى ايقىن باسىمدىقپەن ۇتقان بولاتىن.

كەشكە سەسسيادا 52 جانە 69 كيلوعا دەيىنگى سالماقتار بويىنشا ۇرىستار ءوتتى. بۇل كوشتىڭ كەرۋەنىن الگىندە ايتىلعان ەندريۋ سەلبي مەن گەراردو تەجەريا ءتۇزىپ بەردى. سودان سوڭ الاڭعا شىققان ءبىزدىڭ ءىلياس سۇلەيمەنوۆ پەن قىرعىز ازات ۇسەناليەۆتىڭ ايقاسى باستان-اياق كۇرەسكە تولىپ ءوتتى. بۇعان دەيىن ءبىر-بىرىمەن ەكى رەت قولعاپ ءتۇيىستىرىپ، تەڭ ەسەپ جاعدايىندا تۇرعان شەبەرلەر وسى جولى تارازى باسىن قالايدا وزىنە اۋدارۋعا بارىن سالدى. باسىندا ازات بەلسەندىرەك كورىندى. وسى كەزدە ونىڭ دالدىگى دە ارتىقتاۋ بولعانىمەن، بارا-بارا ءىلياستىڭ تۋرالاي تيگەن سوققىلارىنا ۇرىنىپ قالىپ جاتتى. ءبىزدىڭ باعلان سوڭعى راۋندتا بىرنەشە ارتىق جۇدىرىق سىلتەپ ۇلگەردى. ناتيجەسىندە تورەشىلەردىڭ شەشىمى ەكىگە جارىلدى. ونىڭ باسىم جاعى سۇلەيمەنوۆتىڭ قانجىعاسىندا كەتتى. بۇل جەڭىس ونىڭ بۇگىن ەۋروپانىڭ 2011 جىلعى چەمپيونى ەندريۋ سەلبيمەن جۇلدە ءۇشىن تالاسۋىنا الىپ بارماقشى.

جاسىراتىنى جوق، ءبىز قۇراما كومان­دامىزدىڭ كاپيتانى، 69 كيلو سالماقتاعى دانيار ەلەۋسىنوۆتىڭ فرانتسيالىق سوۋ­لەمان سيسسوحودان اسىپ تۇسەتىنىنە كۇمان كەلتىرە المادىق. راسىندا سولاي بولىپ شىقتى. ول ءۇش راۋند بويى باپكەرلەر شتابى ويلاسا كەلە ۇسىنعان تاكتيكانى ۇستانىپ، قارسىلاسىن وتە ادەمى ۇتىپ شىقتى.

وسىلايشا، 1/8 فينالدىق ايقاستار اياقتالدى. بۇگىنگى شيرەك فينالدىق ايقاستار كىمدەردىڭ مەدال الاتىندارىن انىقتاپ بەرەدى.

«ەگەمەن قازاقستاننىڭ» الەم چەمپيو­ناتىنداعى كوشپەلى رەداكتسياسى.

RS. چەمپيوناتتىڭ تەحنيكالىق مالىمەتتەرىمەن گازەت سايتىنان

(http:/www.egemen.kz) تانىسا الاسىزدار.

––––––––––––––––––––

سۋرەتتى تۇسىرگەن

بەرسىنبەك سارسەنوۆ.

سوڭعى جاڭالىقتار

شىڭعىستاۋدىڭ شاكىرى

ادەبيەت • كەشە

جانى ىزگى جۋرناليست

ەگەمەن قازاقستان • كەشە

ۇقساس جاڭالىقتار