– شىلدەنىڭ ءبىرىنشى كۇنى دەنەم اۋىرلاپ, بويكۇيەزدىك باسىپ, قىزۋىم كوتەرىلىپ كەتتى. سودان ۇيگە جەدەل جاردەم شاقىرتىپ ەدىك, بىردەن قالالىق اۋرۋحاناداعى ينفەكتسيالىق بولىمگە اپارىپ جاتقىزدى, – دەيدى قاراشاش تولەگەنوۆا.
وكپەسىنىڭ 67%-ىن ۆيرۋس جايلاپ العان زەينەتكەر جەتى كۇن بويى سۋ تۇگىلى ءبىر جۇتىم اۋاعا زار بولىپ جانساقتاۋ بولىمىندە ءنار تاتپاي جاتتى.
– ءبىر اپتا بويى باسىمدى كوتەرە المادىم. كۇن وتكەن سايىن جاعدايىم اۋىرلاپ, جانىم قينالعان ساتتەردە جاستىعىمدى تىستەلەپ تاستاپپىن. ساتۋراتسيا 80-گە دەيىن, تامىر سوعۋى 50-گە دەيىن ءتۇسىپ, دەنە قىزۋىم 38 گرادۋستان اسىپ كەتتى. ايتەۋىر دارىگەرلەر جابىلىپ ءجۇرىپ قۇتقارىپ قالدى. اسىرەسە جانۇشىرا جۇگىرىپ ءجۇرىپ, قاجەت كەزىندە ءتيىستى ەم شارالارىن جاساعان مەدبيكەلەرگە ريزاشىلىعىم شەكسىز. مەنى بىرتە-بىرتە ەمدەپ, اياققا تۇرعىزىپ, امان-ساۋ ۇيىمە شىعارىپ سالدى. بۇكىل جانساقتاۋ ءبولىمىنىڭ ۇجىمىنا ءدان ريزامىن. مۇنداعى دارىگەرلەردىڭ بارلىعى باسىن قاۋىپ-قاتەرگە تىگىپ, جانكەشتىلىك تانىتا ءجۇرىپ, جۇمىستارىنداعى قيىن جاعدايعا قاراماستان بار ءبىلىمى مەن ەرىك-جىگەرىن ادام ءومىرىن قۇتقارىپ قالۋعا جۇمساپ ءجۇر. مەن ول كىسىلەردىڭ ءتۇر-الپەتىنە انىقتاپ قاراي الاتىن حالدە ەمەس ەدىم. ەسىم كىرەسىلى-شىعاسىلى بولىپ جاتتىم. سوندىقتان تەك دارىگەرلەردىڭ اعاراڭداعان سۇلباسى مەن سۋسىلداعان سكافاندرلاردىڭ ءۇنى, الدەكىمدەردىڭ بىردە شۇعىل, بىردە جىلى سويلەگەن داۋىستارى عانا ەسىمدە قالىپتى. ولاردىڭ بەينەلەرى جادىمدا قالماسا دا, داۋىستارى جۇرەگىمدە ساقتالىپ قالدى. كەيىن ەسىمدى جيعان سوڭ, دارىگەرلەر ەكى ساعات سايىن جانىما كەلىپ جاعدايىمدى سۇراپ تۇردى. جاسىم – الپىس بەستە. ءبىراز جىلداردان بەرى جابىسقان باسقا دا سىرقاتتارىم بار. سوندىقتان جانساقتاۋ بولىمىنە تۇسكەندە, ميىمنان وسى جەردەن ەندى ءتىرى شىقپايتىن شىعارمىن دەگەن وي شىقپاي قويدى. بىراق ءدامىم تاۋسىلماپتى, ءالى دە كورەر جارىعىم بار ەكەن. وسىنىڭ بارلىعى قالالىق اۋرۋحانا دارىگەرلەرى مەن مەدبيكەلەرىنىڭ ارقاسى, – دەيدى زەينەتكەر.
ايتپاقشى, قاراشاش تولەگەنوۆا مەرەيلى 65 جاسىن ستاتسيوناردا قارسى الدى. دەرتىنەن قۇلان تازا ايىققان زەينەتكەر كەلەسى كۇنى ءوز وتباسىنا, بالا-شاعاسى مەن نەمەرەلەرىنىڭ ورتاسىنا ورالدى.
قوستاناي وبلىسى
