كوروناۆيرۋس • 06 تامىز، 2020

ۆيرۋسولوگيا پروفەسسورى: ىندەتتىڭ قاۋىپتى كوزى - سيمپتومسىز تاسىمالداۋشىلار

1659 رەت كورسەتىلدى

بۇل تۋرالى قازمۋنو ميكروبيولوگيا، ۆيرۋسولوگيا جانە جالپى يممۋنولوگيا كافەدراسىنىڭ پروفەسسورى راۋشان تيەسوۆا-بەردالينا، وڭىرلىك كوممۋنيكاتسيالار قىزمەتىنىڭ الاڭىنداعى ونلاين-سۇحبات بارىسىندا مالىمدەدى، - دەپ حابارلايدى Egemen.kz.

سۇحبات بارىسىندا سپيكەر جەڭىل دارەجەدەگى اۋرۋدى اۋىر تۇرىنەن قالاي اجىراتۋعا بولادى جانە قانداي بەلگىلەر بويىنشا مەديتسينالىق كومەككە جۇگىنۋ كەرەك دەگەن سۇراققا جاۋاپ بەردى.

"بۇگىندە جەڭىل جانە اۋىر تۇردەگى اۋرۋدىڭ ايىرماشىلىعى ايقىن. ادەتتە اۋرۋ ادامنىڭ ينتوكسيكاتسيا كۇيىن باستان كەشىرۋدەن باستالادى. بۇل - السىزدىك، ناشار ۇيقى، تابەتتىڭ ناشارلاۋى. بۇل سيمپتومدار اۋرۋدىڭ جەڭىل تۇرىندە ەلەۋسىز بولۋى مۇمكىن. بۇل بەلگىلەردىڭ كۇشەيۋى جانە دەنە قىزۋىنىڭ 38 گرادۋسقا دەيىن جوعارىلاۋى - پروتسەستىڭ شيەلەنىسىپ جاتقانىن جانە اۋرۋدىڭ اسقىنعاندىعىن كورسەتەدى"، - دەدى مامان.

ونىڭ ايتۋىنشا، بۇدان باسقا، جرۆي بەلگىلەرى ارتقان، ياعني تىنىس الۋ جولدارىندا: مۇرىننىڭ ءىسىنۋى، وروفارينس، قۇرعاق جوتەل، تەرلەۋ سەكىلدى بەلگىلەرى بايقالىپ جاتىر. سونداي-اق كەۋدەدە اۋىرسىنۋ، قوزعالۋ كەزىندە ەنتىگۋ پايدا بولۋى مۇمكىن. مۇنىڭ ءبارى جاعدايدىڭ ناشارلاپ بارا جاتقاندىعىن كورسەتەدى.

"دەنە قىزۋىنىڭ 38 گرادۋستان اسۋى، تىنىس الۋدىڭ قيىنداۋى، تابەت جوعالۋى، تىنىس الۋ سيندرومدارىنىڭ جوعارىلاۋى، مۇنىڭ ءبارى تەز ارادا اۋرۋحاناعا، مەديتسينالىق كومەككە جۇگىنۋ قاجەت ەكەندىگىن بىلدىرەدى. اۋرۋ بەلگىلەرى جەڭىل بولسا، ءسىز دارىگەردەن ونلاين رەجيمىندە كەڭەس الا الاسىز"، - دەيدى سپيكەر.

ادامدار اۋىرعان كەزدە، بۇرىننان بويىندا بار قانت ديابەتى، ارتەريالىق گيپەرتەنزيا، جۇرەك-تامىر اۋرۋلارى سەكىلدى اۋرۋلارى كۇشەيە تۇسەدى. كوۆيد-19 جانە تىنىس الۋ جولدارىنىڭ اۋرۋلارى، ناۋقاستىڭ جاعدايىن اۋىرلاتا تۇسۋىنە سەبەپكەر بولادى، ويتكەنى بۇل اۋرۋدىڭ ءوزى- وتە اۋىر بولىپ ەسەپتەلەدى. ادامنىڭ جالپى جاعدايىنىڭ ناشارلاي باستاۋى- مەديتسينالىق كومەككە جۇگىنۋدى قاجەت ەكەندىگىن كورسەتەدى.

"ينفەكتسيانىڭ ەڭ قاۋىپتى كوزى - بۇل سيمپتومى بىلىنبەيتىن تاسىمالداۋشىلار. ولاردا اۋرۋدىڭ كورىنىسى جوق، بىراق ولار قورشاعان ورتاعا ۆيرۋستى شىعارادى. سيمپتومى بىلىنبەۋىنىڭ نەگىزگى سەبەبى - يممۋندىق جۇيەدە، ادامداردا بولاتىن سوزىلمالى اۋرۋلاردا بولۋى مۇمكىن.

حالىقتىڭ مەديتسينالىق كومەككە جۇگىنۋ دەڭگەيى 14% قۇرايدى، سايكەسىنشە ناۋقاستاردىڭ 85%-ى مەديتسينالىق قىزمەت الۋدان تىس قالۋى مۇمكىن"، - دەدى پروفەسسور.

سيمپتومى بىلىنبەيتىن تاسىمالداۋشىلاردى تەك زەرتحانالىق زەرتتەۋلەر ارقىلى، ياعني باكتەريولوگيالىق داقىلدار ارقىلى انىقتاۋعا بولادى. تيىسىنشە، تاسىمالداۋ - اۋرۋدىڭ ەڭ قاۋىپتى كەزەڭى بولىپ تابىلادى. بۇل كوروناۆيرۋستىق ينفەكتسياعا، اسىرەسە تىنىس الۋ جولدارىنىڭ اۋرۋلارىنا ءتان. ورتاشا العاندا، اۋرۋ جۇقتىرعانداردىڭ 60-80%-ى جەڭىل تۇردە اۋىرىپ شىعادى. سوندىقتان قابىلدانعان بارلىق شارالار، ستاتيستيكالىق مالىمەتتەرگە سايكەس، ناقتى جانە ءتيىمدى بولىپ تابىلادى.

"ەگەر ءبىزدىڭ تۇرعىندار ۋاقتىلى مەديتسينالىق تەكسەرىستەن ءوتىپ، تىنىس الۋ جولدارىنىڭ سوزىلمالى اۋرۋلارىن انىقتاپ وتىرسا دۇرىس بولار ەدى. ويتكەنى ولار كوبىنەسە ينفەكتسيانى تاسىمالداۋشى جانە كوبەيۋىنە سەبەپكەر بولىپ جاتادى"، - دەپ تولىقتىردى ءسوزىن سپيكەر. "ماسكا تاعۋ - ينفەكتسيانىڭ تارالۋىن تەجەيتىن شارانىڭ ءبىرى".

سوڭعى جاڭالىقتار

ۇقساس جاڭالىقتار