ەڭبەك جانە الەۋمەتتىك قورعاۋ مينيسترلىگى "ەڭبەك" باعدارلاماسى اياسىندا جىل باسىنان بەرى جۇمىسپەن قامتۋ شارالارىمەن 335 مىڭ قازاقستاندىق قامتىلعانىن حابارلادى.
دەگەنمەن, بىرقاتار وڭىرلەردە باعدارلامانى ىسكە اسىرۋدىڭ قارقىنى تومەن ەكەندىگى بايقالادى: نۇر-سۇلتان قالاسىندا — ميكروكرەديتتەر, گرانتتار بەرۋ, جاستار پراكتيكاسى بويىنشا; الماتى قالاسىندا — جاستار پراكتيكاسى جانە قوعامدىق جۇمىستار بويىنشا; اتىراۋ وبلىسىندا — تۇراقتى جۇمىس ورىندارىن قۇرۋ بويىنشا.
سونداي-اق "جۇمىسپەن قامتۋدىڭ جول كارتاسى" باعدارلاماسى اياسىندا 6,3 مىڭ جوبا ىسكە اسىرىلا باستاپ, 153 مىڭ جۇمىس ورنى اشىلعانى باياندالدى.
قوستاناي وبلىسىندا جۇمىسقا ورنالاستىرۋ بويىنشا تومەن قارقىن تىركەلدى; باسقا اۋدانداردان كەلگەندەرگە كوتەرمە اقى تولەۋ بويىنشا الماتى قالاسىندا, تۇركىستان جانە اقمولا وبلىستارىندا ورىندالماي وتىر.
پرەمەر-ءمينيستردىڭ ورىنباسارى وڭىرلەردىڭ اكىمدىكتەرىنىڭ ەسەپتەرىن تىڭداپ, حالىقتى جۇمىسپەن قامتۋ بويىنشا جۇمىستى جانداندىرۋ جونىندە جەدەل شارالار قابىلداۋ قاجەتتىگىن اتاپ ءوتتى.
سونداي-اق وتىرىستا "جۇمىسپەن قامتۋدىڭ جول كارتاسى" جوبالارىنىڭ تيىمدىلىك ولشەمدەرى بەكىتىلدى.
"مەملەكەت باسشىسىنىڭ تاپسىرماسى بويىنشا ءبىزدىڭ الدىمىزدا باعدارلاماعا بولىنگەن 1 ترلن تەڭگەنى بارىنشا ءتيىمدى پايدالانۋ مىندەتى تۇر. ءاربىر جوبا بويىنشا الەۋمەتتىك-ەكونوميكالىق تيىمدىلىك مۇقيات باعالاناتىن بولادى: قانشا جاڭا جۇمىس ورنى قۇرىلدى, سالىق تۇسىمدەرىنىڭ ءوسۋ قارقىنى, ادامداردىڭ تۇرمىس ساپاسىنا اسەرى جانە ت. ب. باعدارلامانىڭ تيىمدىلىگىن ۇكىمەت ەرەكشە باقىلاۋدا ۇستايدى", — دەپ قورىتىندىلادى ە. توعجانوۆ.
