ايماقتار • 05 تامىز، 2020

بيىل ۇلكەن استىققا وراق ەرتە ءتۇستى

59 رەت كورسەتىلدى

بيىل ەلىمىزدىڭ استىقتى وڭىرلەرىنىڭ ءبىرى – سولتۇستىكتىڭ ديقاندارى وراققا ەرتە شىقتى، - دەپ حابارلايدى Egemen.kz

جاپپاي بولماسا دا ەگىستى كوكتەمدە ەرتە اياقتاعانداردىڭ استىعى جەتىلىپ قالعان. جازدىڭ ىستىق بولۋى استىقتىڭ تەز جەتىلىپ، پىسۋىنە قولايلى بولدى. مۇنداي جاز سولتۇستىكتە وتە سيرەك بولادى، بۇرىن ديحانداردىڭ اۋزىنان «اۋا-رايىنىڭ قولايسىزدىعى» دەگەن ءسوزدى ءجيى ەستيتىن ەدىك. بيىل وندايدى ەشكىم دە ايتپايدى. حالىقتى جامان ىندەت قىسىپ جاتقاندا تابيعات-انا جەڭىلدىك قىلىپ، جاناشىرلىق بىلدىرگەندەي. كوكتەمگى ەگىس ناۋقانىندا دا اۋا-رايى بيىل قولايلى بولعان ەدى. ەندى تەك شىعىمدىلىعى جوعارى استىقتى توكپەي-شاشپاي جيناپ الۋ مىندەتى ديحاندارداردىڭ الدىندا تۇر.

وبلىستىڭ اۋىلشارۋاشىلىعى جانە جەر قاتىناستارى باسقارماسىنىڭ باستىعى ەربولات بەكشەنوۆتىڭ ايتۋىنا قاراعاندا ءداندى داقىلداردىڭ 53 پايىزى قازىردىڭ وزىندە ءپىسىپ، وراقتى قارسى الۋعا دايىن تۇر. استىقتىڭ باعاسى دا بىلتىرعىدان ارتىق بولماقشى. قازىردىڭ وزىندە بيدايدىڭ باعاسى بىلتىرعى ورتاشا باعادان 38 پايىزعا ارتىق بولىپ مولشەرلەنىپ وتىر. ەگەر بىلتىر بيداي باعاسىنىڭ ءبىر تونناسى 59،7 مىڭ تەڭگە بولسا، بيىل ول 82،5 مىڭ تەڭگەگە جەتىپتى. ارپانىڭ باعاسى دا بىلتىرعىدان 30 پايىزعا ارتىق بولماق.

بيىل ديحاندار استىقتى باپتاۋدا دا ۇزدىك ناتيجەلەرگە قول جەتكىزگەن. جىل سايىن اۋا-رايىنىڭ قولايسىزدىعى سەبەپتى ارامشوپتەن حيميالىق قۇرالدارمەن قۇتىلۋعا تولىق مۇمكىندىك بولماسا، بيىل وسى جۇمىس تا جاپپاي جۇرگىزىلىپ، استىقتىڭ شىعىمدىلىعىنا ۇلكەن ۇلەس قوستى.

قازىر شارۋالار ءشوپ دايىنداۋ ناۋقانىن دا اياقتاپ كەلە جاتىر. وبلىس بويىنشا بارلىعى 750 توننا پىشەن دايىنداۋ مەجەلەنسە، قازىر سونىڭ 70 پايىزدان ارتىعى ورىندالعان.

سولتۇستىك ديحاندارىنىڭ الدىندا تۇرعان تاعى ءبىر مىندەت – مينەرالدىق تىڭايتقىشتاردى وزىمىزدە شىعارۋ. قازىر شارۋالار ونىڭ 117 مىڭ تونناسىن ساتىپ الۋعا كەلىسىمشارتتار جاساسىپ قويعان. وبلىس اكىمى قۇمار اقساقالوۆتىڭ ايتۋىنا قاراعاندا مينەرالدى تىڭايتقىشتاردى اۋىلشارۋاشىلىعى وندىرىسشىلەرىنىڭ وزدەرىنىڭ شىعارۋىنا مۇمكىندىك بار. «ەگەر بىرنەشە شارۋا بىرىگىپ، شاعىن زاۋىت ساتىپ الىپ، مينەرالدى تىڭايتقىشتار شىعارۋمەن اينالىسساڭىزدار ونىڭ باعاسى الدەقايدا تومەندەر ەدى. قازىر سىزدەر ونىڭ تونناسىن 140 مىڭ تەڭگەگە الاسىزدار، ال شاعىن زاۋىتتار ءونىمى تەك 58 مىڭ تەڭگە بولار ەدى. بۇل باعىتتا ازىرگە 6 ميني-زاۋىت قانا جۇمىس ىستەپ تۇر»، دەدى ول اۋىلشارۋاشىلىعى ماماندارىمەن وراق الدىندا بولعان كەزدەسۋدە.

وبلىستاعى بارلىق جەر كولەمى 9 ملن. 804 مىڭ گا بولسا سونىڭ جەتى ملن 243  مىڭ  گا نەمەسە 73 % اۋىلشارۋاشىلىعىنا قولدانىلاتىن جەرلەر. ونىڭ ىشىندە 5 ملن گەكتارعا جاقىنىنا استىق ەگىلەدى، ال 2 ملن گەكتاردايى جايىلىم. بۇگىنگى تاڭدا وبلىستا 2891 شارۋا جانە فەرمەرلىك قوجالىقتار، 776 ءتۇرلى سەرىكتەستىكتەر وسىناۋ القاپتا ەڭبەك ەتىپ ءجۇر. سونىڭ ىشىندە 57 مىڭ گەكتار جەرگە استىق ەگەتىن 22 اۋىلشارۋاشىلىعى كووپەراتيۆتەرى دە بار.

سوڭعى جىلدارى اۋىلشارۋاشىلىعى وندىرىسشىلەرىن مەملەكەتتىڭ قولداۋى دا ەسەلەپ ارتىپ وتىر. سوڭعى ءۇش جىلدا وبلىستىڭ اۋىلشارۋاشىلىعىن قولداۋعا 116 ملرد. تەڭگە باعىتتالدى. سونىڭ ىشىندە بىلتىر 39،5 ملرد. تەڭگەنىڭ كومەگى بولعان. ال بيىل ول رەكوردتىق كورسەتكىشكە جەتىپ، 48،4 ملرد. تەڭگەنىڭ دەڭگەيىنە ءبىر-اق شىقتى، نەمەسە بىلتىرعىدان 22،5% ارتىق. اۋىلشارۋاشىلىعىنا قۇيىلىپ جاتقان ينۆەستيتسيا كولەمى دە ارتىپ كەلەدى. سوڭعى ءۇش جىلدا ول 72 ملرد. تەڭگەدەن 107،6 ملرد. تەڭگەگە جەتىپ، 1،5 ەسە ارتتى. بيىل دا ول 24 پايىزعا ارتىپ، 44،9 ملرد. تەڭگەگە جەتۋى كوزدەلگەن. وسىنىڭ ءوزى بارلىق رەسپۋبليكالىق كولەمنىڭ تورتتەن ءبىرى بولىپ وتىر.

سونىڭ ارقاسىندا قىزىلجارلىق ديحانداردىڭ كوبى بيىل تابيعي جاعدايعا بەيىمدى تۇقىمنىڭ ەليتالىق سۇرىبىن الۋعا قول جەتكىزدى. بۇل سۇرىپ شىعىمدىلىعىمەن قوسا وسىمدىكتەردىڭ ءتۇرلى اۋرۋىنا دا توتەپ بەرە الادى. مىنە، وسى سۇرىپتاردى ەندى جاپپاي قولدانۋ ماقساتى الدا تۇر. وسىدان ءۇش جىل بۇرىن ول ءاربىر جيىرماسىنشى تونناعا سايكەس بولسا، بيىل ءاربىر ونىنشى تونناعا سايكەس كەلگەن ەدى.

ارينە، بارلىق سۇرىپتار دا شىعىمدى بولۋى ءۇشىن ارامشوپكە قارسى قولدانىلاتىن حيميالىق قوسپالاردى ارتتىرماسا بولمايدى.  بۇل تاراپتا دا قىزىلجارلىقتار قازىر ۇلكەن تابىسقا جەتىپ وتىر. اتاپ ايتقاندا پەستيتسيدتەر مەن بيواگەنتتەرگە بولىنگەن اقشانىڭ 40 پايىزعا ارتتىرىلۋىمەن بيىل ولار 2،3 ملن گەكتار جەرگە سەبىلىپ، 130 مىڭ تونناسى پايدالانىلدى. بۇل سوڭعى جىلدارداعى ەڭ ۇزدىك كورسەتكىش.

ارينە، ديحاننىڭ قولىنا قولبايلاۋ بولاتىن تەحنيكالاردىڭ ەسكىلىگى، ولارعا قوسالقى بولشەكتەر تابۋدىڭ قيىندىعى. بۇل ىسكە دە مەملەكەت تە،  ديحانداردىڭ ءوزى دە قاراجات ءبولۋدى ارتتىرا تۇسۋدە. سونىڭ ارقاسىندا قىزىلجارلىقتار سوڭعى ءۇش جىلدا 89 ملرد. تەڭگەگە 4،7 مىڭ دانا ءتۇرلى تەحنيكالار ساتىپ الۋعا قول جەتكىزدى. بۇل ءىستىڭ بيىلعى قارقىنى دا جوعارى. ۇستىمىزدەگى جىلدىڭ جەتى ايىندا عانا 31،5 ملرد. تەڭگەنىڭ 1334 دانا تەحنيكاسى ساتىلىپ الىندى.

مەملەكەتتىڭ قولداۋى، تابيعاتتىڭ قولايلىلىعى ءسويتىپ ەسىل ءوڭىرى ديحاندارىنىڭ قۋانىشىن ارتتىرۋدا. تەك ەندى كۇز قولايلى بولىپ، شىعىمدى استىقتى قامباعا توكپەي-شاشپاي قۇيىپ الۋ ماقسات بولىپ وتىر. ول ءۇشىن ءاربىر قولايلى كۇن ءتيىمدى پايدالانىلۋى كەرەك.

 

سولتۇستىك قازاقستان وبلىسى

 

سوڭعى جاڭالىقتار

سپورت جاڭالىقتارىنا شولۋ

سپورت • بۇگىن، 09:11

سۋرەتشىلەر ءۇيى اشىلدى

ايماقتار • بۇگىن، 09:08

بال بۇلاق بولىپ اقتى

ايماقتار • بۇگىن، 09:07

وڭايلىقپەن ەم قونبايدى

مەديتسينا • بۇگىن، 09:05

ۇقساس جاڭالىقتار