ايماقتار • 04 تامىز، 2020

ءماجىلىس دەپۋتاتتارى اۋىل تۇرعىندارىن جۇمىسپەن قامتۋ ماسەلەلەرىن تالقىلادى

35 رەت كورسەتىلدى

ءماجىلىس دەپۋتاتتارى بالايىم كەسەباەۆا مەن ابزال ەراليەۆ قىزىلوردا وبلىسى شيەلى اۋدانىنىڭ تۇرعىندارىمەن كەزدەستى.

ساپار بارىسىندا ماجىلىسمەندەر حالىقتى جۇمىسپەن قامتۋ، مەملەكەتتىك باعدارلامالاردى ىسكە اسىرۋ جانە كوروناۆيرۋستىق ينفەكتسيانىڭ تارالۋىمەن كۇرەس ماسەلەلەرىنە نازار اۋداردى.

اۋدان تۇرعىندارىمەن اڭگىمەلەسكەن دەپۋتاتتار كوروناۆيرۋس ىندەتى ورىن العان قيىن كەزەڭدە شاعىن جانە ورتا كاسىپكەرلىكتى قولداۋ، ازاماتتاردى الەۋمەتتىك قورعاۋ جانە جۇمىسپەن قامتۋ ماسەلەلەرى ەل باسشىلىعى مەن دەپۋتاتتاردىڭ ەرەكشە باقىلاۋدا ەكەنىن اتاپ ءوتتى. دەپۋتاتتار شيەلى اۋدانىندا تەمىر جول ارقىلى وتەتىن جولدىڭ قۇرىلىس الاڭىندا بولدى، بۇگىندە وندا 160-تان استام ادام جۇمىس ىستەۋدە. جەرگىلىكتى تۇرعىنداردىڭ ايتۋىنشا، جاڭادان قۇرىلىسى جۇرگىزىلىپ جاتقان كوپىر جول پويىزدار قوزعالىسى كەزىندە وتكەلدەگى كەپتەلىس ماسەلەسىن شەشەدى. مەردىگەرلەر نىساندى 10 جەلتوقسانعا دەيىن پايدالانۋعا بەرۋدى جوسپارلاپ وتىر.

سونىمەن قاتار، شيەلى اۋدانىنىڭ كوكشوقى ىقشام اۋدانىنا بارعان دەپۋتاتتار اۋلا اۋماقتارىن اباتتاندىرۋمەن اينالىساتىن "شيەلى جولشى" جشس-نىڭ جۇمىسشىلارىمەن كەزدەستى. بۇگىنگى تاڭدا كاسىپورىندا 20 ادام جۇمىس ىستەۋدە.ولاردىڭ 10-ى جۇمىسپەن قامتۋ ورتالىعى ارقىلى جۇمىسقا ورنالاستىرىلعان. جالپى، وبلىستا "جۇمىسپەن قامتۋدىڭ جول كارتاسى" باعدارلاماسى بويىنشا 21 جوبا جۇزەگە اسىرىلىپ، ونىڭ اياسىندا 700-دەن استام ادامدى جۇمىسپەن قامتۋ جوسپارلانعان. سونداي-اق، دەپۋتاتتار ب.كەسەباەۆا مەن ا.ەراليەۆ اۋدانارالىق اۋرۋحانا مەن پروۆيزورلىق ورتالىققا بارىپ، كوروناۆيرۋسپەن كۇرەسۋ شارالارىمەن تانىستى. دارىگەرلەردىڭ ايتۋىنشا، قازىر اۋدانداعى ەپيدەميولوگيالىق جاعداي تۇراقتالعان. العاشقى كۇندەرى اۋرۋحاناعا 100-دەن استام ناۋقاس تۇسكەن. بۇگىندە جۇقپالى اۋرۋلار اۋرۋحاناسىندا 39، ال پروۆيزورلىق ورتالىقتا 35 ناۋقاس ەم قابىلداۋدا. وسى رەتتە، دارىگەرلەر 80 مىڭ حالقى بار اۋداندا كوروناۆيرۋستىق پنەۆمونيا دياگنوزىندا نەگىزگى بولىپ سانالاتىن وكپەنىڭ بىردە-ءبىر توموگرافيالىق اپپاراتى جوق ەكەنىن اتاپ ءوتتى. سونىمەن قاتار، دارىگەرلەر اۋداندا قاۋىپتى ينفەكتسيانى انىقتايتىن جەكە زەرتحانانىڭ جوقتىعىن، سونداي-اق، اۋدانداعى جۇقپالى اۋرۋلار اۋرۋحاناسىنىڭ جاڭا عيماراتىنىڭ سالىنۋىنا دەپۋتاتتاردىڭ ىقپال ەتۋىن سۇرادى.

اۋىل دارىگەرلەرىنىڭ تىلەكتەرى مەن ۇسىنىستارىن تىڭداعان ءماجىلىس دەپۋتاتتارى ۇكىمەتكە ءتيىستى ساۋالدار جىبەرىپ، ولاردى تەزىرەك شەشۋ ءۇشىن شارالار قابىلدايتىندىقتارىن ايتتى. ودان ءارى دەپۋتاتتاردىڭ وبلىستاعى باسقا دا ەلدى مەكەندەرگە بارۋى جوسپارلانعان. ول ەڭ الدىمەن، مەديتسينا جانە دەنساۋلىق ساقتاۋ سالاسىنداعى الەۋمەتتىك ماسەلەلەردى انىقتاۋعا جانە جەدەل شەشۋگە باعىتتالعان.

سوڭعى جاڭالىقتار

ۇقساس جاڭالىقتار