وڭتۇستىك كورەيا ساراپشىلارىنىڭ ايتۋىنشا, بۇگىندە ءوز ەلدەرىندە كوروناۆيرۋسقا قاتىستى جاعداي تۇراقتى ەكەن. سونداي-اق, جەرگىلىكتى تۇرعىنداردىڭ اراسىندا جاڭا جاعدايلار تىركەلمەگەن. ولار مۇنداي جاعدايعا مەديتسينا قىزمەتكەرلەرىنىڭ ناقتى جانە ۇيلەسىمدى ءىس-ارەكەتتەرىنىڭ, ازاماتتاردىڭ تۇسىنىستىگىنىڭ ارقاسىندا قول جەتكىزىپ وتىرعانىن مالىمدەدى. اتالعان مەملەكەتتە بارلىق جەردە مەديتسينالىق ماسكا كيۋ جانە الەۋمەتتىك قاشىقتىقتى ساقتاۋ ماڭىزدى قاعيداعا اينالعان. دارىگەرلەر سيمپتومسىز ناۋقاستاردى, كوروناۆيرۋستىڭ جەڭىل تۇرىمەن جانە ينفەكتسيانىڭ اۋىر تۇرىمەن اۋىراتىن ناۋقاستارعا ءبولىپ, ولاردى ءارتۇرلى ستاتسيونارلاردا ەمدەگەن. سونىمەن قاتار, وڭتۇستىككورەيالىق دارىگەرلەردىڭ ايتۋىنشا, اۋرۋدىڭ ەرتە دياگنوستيكاسى جاقسى ناتيجە بەرگەن جانە دارىگەرلەر ءوزىن ناشار سەزىنگەندەردىڭ بارلىعىنان كوروناۆيرۋسقا تەست العان. ارىپتەستەرىن تىڭداعان جامبىلدىق دارىگەرلەر ولارعا بىرقاتار سۇراقتار بەردى. مىسالى, وبلىستىق قان ورتالىعىنىڭ وكىلدەرىن وڭتۇستىك كورەيا مەملەكەتىندەگى كوروناۆيرۋسپەن اۋىرىپ جازىلعان ادامداردىڭ يممۋندىق پلازما دونورلىعىنىڭ قولدانىسى قىزىقتىردى. ال, ماماندار بۇل ءادىستىڭ كوروناۆيرۋسپەن اۋىراتىن ناۋقاستاردى ەمدەۋ كەشەنىندە بەلسەندى قولدانىلاتىنىن ايتتى. سونداي-اق, وڭتۇستىك كورەيا دارىگەرلەرى ءوز ەلدەرىندەگى جاعدايدىڭ تۇراقتانعانىنا قاراماستان, كۇزدە كۇتىلەتىن پاندەميانىڭ ەكىنشى تولقىنىنا دايىن ەكەندىكتەرىن دە اتاپ ءوتتى. ول ءۇشىن اتالعان مەملەكەتتە قوسىمشا اۋرۋحانالار اشىلىپ, دارىگەرلەر دايىندىقتان وتۋدە ەكەن.
سەمينار سوڭىندا ەكى ەلدىڭ دارىگەرلەرى ماعىنالى وي-پىكىرلەرى ءۇشىن ءبىر-بىرلەرىنە العىس ايتتى. سونىمەن قاتار, بۇل سەمينار كوروناۆيرۋسقا قارسى كۇرەستەگى ءوزارا بەرىك ىنتىماقتاستىقتىڭ باستاۋى بولاتىنىنا سەنىم ءبىلدىردى.
جامبىل وبلىسى
