قالالىق قوعامدىق دەنساۋلىق باسقارماسىنىڭ باسشىسى كامالجان نادىروۆ سونىڭ ناتيجەسىندە, جۇمىس جۇيەلەنە باستاعانىن, بۇعان دەيىن كلينيكالار پروۆيزورلىق جانە ينفەكتسيالىق ستاتسيونارلارعا بولىنگەن بولسا, بۇگىندە پاتسيەنتتەر جاعدايىنىڭ اۋىرلىق دارەجەسىنە قاراي بولىنەتىنىن جەتكىزدى.
ء«بىز ونى ءۇش ساناتقا بولدىك. ءبىرىنشى ساناتتا – ەڭ جاقسى ماتەريالدىق-تەحنيكالىق بازاسى بار كلينيكالار, وندا وزىق رەانيماتسيا قىزمەتى, قاجەتتى ماماندار جيىنتىعى بار. ەكىنشى ساناتتاعى كلينيكالاردا ماماندار بار, بىراق رەانيماتسيالىق توسەكتىك ورىن سانى از. ءۇشىنشى ساناتتاعى كلينيكالارعا ءبىز اۋرۋىنىڭ اۋىرلىق دارەجەسى سالىستىرمالى تۇردە جەڭىل جانە ورتاشا پاتسيەنتتەردى جاتقىزامىز. مۇنداي اعىندار بويىنشا ءبولۋ پاتسيەنتتەردىڭ مارشرۋتىن جۇيەلى تۇردە قۇرۋعا مۇمكىندىك بەردى», دەدى قالانىڭ باس دارىگەرى.
ونىڭ ايتۋىنشا, بۇگىندە قالادا توسەكتىك ورىن سانى مەن ساۋىعىپ شىققان پاتسيەنتتەر سانىنىڭ ارتقانى بايقالادى. «بۇرىن بىزدە توسەكتىك ورىنداردىڭ بوس بولماۋى اۋرۋلار ەڭ كوبەيگەن ساتتە 90%-عا جەتكەن بولسا, قازىر بۇل كورسەتكىش 50%-دان از. ءاربىر ەكىنشى توسەكتىك ورىن بۇگىندە بوس, بىراق وسىعان قاراماستان, ءبىز توسەكتىك ورىندى كوبەيتۋدى جالعاستىرىپ جاتىرمىز», دەدى ك.نادىروۆ.
سونداي-اق بمسك دەڭگەيىندە مەديتسينالىق كومەك كورسەتۋ تاسىلدەرى وزگەردى, تەك كۆي-مەن اۋىرعان پاتسيەنتتەرمەن عانا جۇمىس ىستەيتىن ارنايى ءموبيلدى بريگادالار قۇرىلدى.
«بۇگىنگى تاڭدا 72 ءموبيلدى بريگادا بار, دارىگەرلەر مەن ورتاشا مەديتسينالىق قىزمەتكەرلەر سانى 400 ادامعا جەتتى. بۇرىن 200 ادام بولعان. ءموبيلدى بريگادالاردىڭ مىندەتى – پاتسيەنتتەردى بمسك دەڭگەيىندە بارىنشا ۇستاۋ, ياعني اسقىنۋلاردىڭ دامۋىنا جانە كەلەسى دەڭگەيگە – ستاتسيونارلىق دەڭگەيگە جەتكىزبەۋ», دەدى ول.
ەندى جەدەل جاردەم پاتسيەنتتەرگە كەلگەندە, ولاردىڭ ازىرلەنگەن چەك-پاراعى بويىنشا پاتسيەنتتىڭ اعىمداعى جاعدايىن وبەكتيۆتى باعالاۋعا بولادى. اۋرۋدىڭ اۋىرلىق دارەجەسىنە بايلانىستى جەدەل جاردەم ناۋقاستى قانداي اۋرۋحاناعا جاتقىزۋ تۋرالى شەشىم قابىلدايدى. وسى ارادا ايتا كەتۋ كەرەك, COVID-19-بەن كۇرەسكە تارتىلعان مەديتسينالىق ۇيىمداردىڭ سانى ارتىپ كەلەدى. بۇگىندە قالادا شامامەن 6 مىڭ توسەكتىك ورىن بار, وندا 4 440 مەديتسينالىق قىزمەتكەر جۇمىس ىستەيدى.
ء«بىز سونىمەن قاتار مەديتسينا كادرلارىن جۇمىلدىرۋ ماسەلەسىن قاراستىرۋدامىز, ويتكەنى ءبىزدىڭ الدىمىزدا توسەكتىك ورىن سانىن كەم دەگەندە 7 700-گە دەيىن جەتكىزۋ مىندەتى تۇر. بۇگىندە
1 500-گە جۋىق دارىگەردى قابىلدادىق. ولار دايىندىقتان ءوتىپ, ينفەكتسيالىق قاۋىپسىزدىك, پاتسيەنتتەردى ەمدەۋ ماسەلەلەرى بويىنشا وقىتىلىپ جاتىر. بۇل تۇرعىدا مامانداردى دايىندايتىن ارنايى وقۋ-كلينيكالىق ورتالىق قۇرىلدى», دەدى باس دارىگەر.
سونىمەن قاتار قالا باسشىلىعى توسەكتىك ورىن سانىن ارتتىرۋ ءۇشىن بارلىق نۇسقالاردى پىسىقتاۋدا. قالاداعى «Halyk Arena» مۇزايدىن سارايىنىڭ بازاسىندا گوسپيتال اشىلدى, وندا 1 مىڭ توسەكتىك ورىن ورنالاسقان. سونداي-اق سول جەرگە مەديتسينالىق گازدار, وتتەگى جەتكىزىپ, تولىققاندى رەانيماتسيالىق ءبولىم اشۋ جوسپاردا بار.
«مەديتسينالىق مەكەمەلەردەن باسقا دا نىسانداردى زەردەلەدىك. اتاپ ايتقاندا, باستاپقىدا پسيحونەۆرولوگيالىق اۋرۋلاردى ەمدەۋ ورتالىعى رەتىندە سالىنىپ جاتقان الەۋمەتتىك نىسانداردىڭ بىرىنە توقتالدىق. بارلىق ينفراقۇرىلىمدى زەرتتەپ, ونى مەديتسينالىق نىسان رەتىندە قايتا بەيىندەۋ وتە قولايلى ەكەنىن تۇسىندىك. بۇگىندە ءتيىستى جۇمىستار جۇرگىزىلۋدە. بۇل 500 توسەكتىك ورىندىق تولىققاندى ستاتسيونار بولادى, ونى قىركۇيەك ايىندا پايدالانۋعا بەرۋدى جوسپارلاپ وتىرمىز. وندا ينفەكتسيالىق قاۋىپسىزدىكتىڭ بارلىق تالاپتارى ساقتالادى», دەيدى.
الماتى
