رۋحانيات • 29 شىلدە، 2020

شوعىردا شوقتىعى بيىك

224 رەت كورسەتىلدى

ول دا وتىزدى القىمدادى. القىنبادى. تالپىنعانى – توعىشاردىڭ تۋىن قۇلاتىپ، جەمقوردىڭ جەلكەنىن قيۋ. الاقانداي ەلىنىڭ الاتاۋداي ارمانىن ورىنداپ، ۇلتىنىڭ بار بولسا بارىن باعامداۋ، جوق بولسا جوعىن تۇگەندەۋ. تارتىنعانى... تارتىنعانى ودان دا كوپ: ادامگەرشىلىكتەن اتتاماۋ، اۋىز جالاسقان سىبايلاستى جاقتاماۋ. الىسقا بارماي-اق جاقىننان قايتىپ وتىرمىز. اڭىزداعى الپامىستى ەمەس، ەل باسقارۋ ىسىنە ەرتە ارالاسقان، بۇگىندە سىبايلاس جەمقورلىققا قارسى ءىس-قيمىل اگەنتتىگى ستراتەگيا جانە جەدەل باسقارۋ دەپارتامەنتىنىڭ باسشىسى نۇرلان يبراگيم ۇلى جاقسىمبەتوۆتى ايتىپ وتىرمىز.

كولگىرسىپ قايتەيىك. ونىڭ كوزىن كورىپ، قول الىسىپ امانداسقان ەمەسپىن. قايسىبىر كەزدەسۋلەردە جۇزدەسسەك جۇزدەسكەن دە شى­عارمىز. ءازىر ەستە جوق. دۇنيە ءجۇزىن دۇرلىكتىرگەن پاندەميا، ءجۇرىس-تۇرىستى جۇتاڭداتقان كارانتين بولماعاندا ەمەن-جارقىن اڭگىمەلەسەر مە ەدىك؟ كىم ءبىلسىن... تەلەفون ارقىلى تىلدەستىك. سالماقتى داۋىس، سابىرلى ءۇن. تۇتقانىڭ بەرگى جاعىندا تۇرىپ-اق ازاماتقا ءتان بايىپتى اڭعاردىق. «جىلقى – كىسىنەسكەنشە، ادام – تۇسىنىسكەنشە» ەكەن عوي. ءبىزدىڭ ء«بىر كورگەن – ءبىلىسىمىز» وسىلاي باستالدى. 

قىزىلدى-جاسىلدى دۇنيەگە جۇرت قىزىقسا دا، ول قىزىققان جوق. باقاي ەسەپ پەن قۋلىق-سۇمدىقتان باسىن اۋلاق سالدى. وزەككە تۇسكەن جەگىقۇرتتاي جەمقورلىق جايلاعان زاماندا ادالدىق پەن ار-ۇجداننىڭ اق تۋىن كوتەرىپ تۇراتىن جاس­تار قاجەت-اق ەدى. سول تۋدى نۇرلان يبرا­گيم ۇلىنىڭ قولىنان كورگەندەي بولدىق. ازات كۇنگە قاراپ ەلجىرەپ، ەركە جەلگە ەلتىپ جەلبىرەپ تۇردى سول بايراق. سوعان جىبىگەن جۇرەكتە دە، ونى ۇستاپ تۇرعان بىلەكتە دە قاسيەت بار. بۇگىنگى بۋىنعا ۇلگى، ەرتەڭگى ۇرپاققا وسيەت بار.

ماڭعىستاۋ وبلىسىنا قاراستى اقتاۋ قالاسىندا كىندىگى كەسىلىپ، تۇندىگى تۇرىل­گەن ازامات م.لومونوسوۆ اتىنداعى ماس­كەۋ مەملەكەتتىك ۋنيۆەرسيتەتىنىڭ «مەم­­لەكەتتىك باسقارۋ» فاكۋلتەتىن ءتامام­داپ، ەڭبەك جولىن قۇقىق قورعاۋ ورگان­دارىنىڭ ساپىندا باستادى. ودان سوڭ ەكونوميكالىق جانە سىبايلاس جەمقورلىققا قارسى كۇرەس اگەنتتىگىنىڭ (قارجى پوليتسياسى) اقپاراتتىق-تالداۋ دەپارتامەنتىندە ەكى جىل قىزمەت ەتىپ، كەيىن «سامۇرىق-قازىنا ينۆەست» جشس ينۆەستيتسيالىق-تالداۋ دەپارتامەنتىنىڭ باس مەنەدجەرى بولىپ تا جۇمىس ىستەپ كوردى. العان بەتىنەن قايتقان جوق. سىباي­لاس جەمقورلىققا قارسى ءىس-قيمىل ۇلتتىق بيۋروسىندا تەر توگىپ، «پروەكت-كونسالت» جشس-ىندە ساراپشى بولدى.

الدىنا ناقتى ماقسات قويا بىلگەن ار­مان­شىل جاستىڭ سونى سوقپاعى وسىلاي قالىپتاستى. مەملەكەتتىك قىزمەت ىستەرى جانە سىبايلاس جەمقورلىققا قار­سى ءىس-قيمىل اگەنتتىگى توراعاسىنىڭ كەڭەس­شىسى، سىبايلاس جەمقورلىققا قار­سى ءىس-قيمىل اگەنتتىگى كادر جۇمىسى دەپار­تامەنتىنىڭ باسشىسى لاۋازىمدارىن ابى­رويمەن ات­قار­دى. بۇگىندە – اتالعان اگەنت­تىكتىڭ سترا­تەگيا جانە جەدەل باسقارۋ دەپار­تامەن­تىنىڭ باسشىسى. سونداي-اق قازاق، ورىس، اعىلشىن تىلدەرىن جەتىك مەڭگەرگەن تالاپ­تى جاس ەلگە سىڭىرگەن ەڭبەگى ەسكەرى­لىپ، «قۇرمەت» وردەنىمەن ماراپاتتالدى.

وتىزعا جەتپەي وردا بۇزعان ازاماتقا وسىمەن شەكتەلۋگە دە بولار ەدى. باعى مەن بابىن قاتار سىناپ، مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسقان پرەزيدەنتتىك جاستار كادرلىق رەزەرۆى جوباسىنا قاتىسۋعا بەل بۋدى. بايقاسا، بەكەر ەمەس ەكەن. 13 مىڭ ازاماتتىڭ اراسىنان «جۇزدەن – جۇيرىك، مىڭنان – تۇلپار» كورى­نىپ، ىرىكتەلگەن 300 جاستىڭ قاتارىنان تابىلدى.

– بۇل جوبانىڭ ءبىر كۇندىك باستاما ەمەس، ەلىمىزدەگى باسقارۋ جۇيەسىن جاڭ­عىرتۋدىڭ ۇزاق مەرزىمگە باعىتتالعان جاڭا تەتىگى ەكەنى ايقىن بولعاندىقتان جا­نە ونىڭ تالاپتارىنا ءبىلىمىم، جاسىم، جۇمىس تاجىريبەم سايكەس كەلگەندىكتەن قاتىس­تىم. سەبەبى مۇندا باستى مىندەت – بىلىكتى باسشىلاردىڭ جاڭا بۋىنىن قالىپتاستىرىپ، جاستاردى حالىققا ادال قىزمەت ەتۋگە ىنتالاندىرۋ، – دەيدى نۇر­لان جاقسىمبەتوۆ.

جاس كەلسە، ىسكە! جاستار كادرلىق رەزەر­ۆى مەملەكەتتىك قىزمەت سالاسىن جاڭار­تۋعا، جاڭعىرتۋعا وزىق ويلى، زاماناۋي كوشباسشىلاردى تارتۋعا مۇمكىندىك بەرەدى. ال وعان جاڭا فورماتسيادا باسقا­رۋ­شى بولۋعا قابىلەتتى، تالانتتى جانە كرەاتيۆتى جاس قازاقستاندىقتار عانا تاڭ­داپ الىناتىنىن ەسكەرسەك، بۇل جوبادا نۇرلان يبراگيم ۇلىنىڭ باعى جانباۋى مۇمكىن ەمەس ەدى. سەبەبى ول پرەزيدەنتتىك جاستار كادرلىق رەزەرۆىنە وتپەس بۇرىن دا قازاقستاننىڭ سىبايلاس جەمقورلىققا قارسى ساياساتىنىڭ دامۋىنا، اتاپ ايت­قاندا 2015-2025 جىلدارعا ارنالعان سىبايلاس جەمقورلىققا قارسى ستراتەگيا­سىن ازىرلەۋگە، سىبايلاس جەمقورلىققا قارسى قىزمەتتە اشىقتىق پەن ايقىندىق قاعيداتتارىن كەشەندى جىلجىتۋعا، سون­داي-اق ونىڭ ازاماتتىق قوعام ينستيتۋتتارىمەن ءوزارا كەڭ ءىس-قيمىلىنا بەلسەندى ارالاس­قان بولاتىن.

– جوباعا تەك قاتىسۋشى ەمەس، مەملە­كەت­تىك قىزمەتشى رەتىندە ءوزىمنىڭ ءبىلىمىم مەن تاجىريبەمنىڭ، بىلىكتىلىگىمنىڭ سىنالاتىن جانە باعالاناتىن ماڭىزدى ءساتى دەپ قارا­دىم. ۇلكەن سىننان سۇرىنبەي ءوتىپ، ءوز قابىلەتىمدى دالەلدەگەن 300 جاستىڭ ءبىرى بولعاندىقتان حالىق ەلىمىزدىڭ دامۋىنا زور ۇلەس قوسىپ، قالتقىسىز قىزمەت ەتەدى دەپ ءۇمىت كۇتەدى. سول سەبەپتى بۇل باستاما مەن ءۇشىن مەملەكەتتىك يدەيالاردى، ءوزىمنىڭ تىڭ ويلارىمدى ىسكە اسىرۋعا بەرىلگەن مول مۇمكىندىك، – دەيدى ول اعىنان جارىلىپ.

ايتۋىنشا، الەمنىڭ دامىعان وزىق مەملەكەتتەرىنىڭ قاتارىنان قازاق­ستان­دى كورگىسى كەلەدى. ءبىلىمى مەن كۇش-جىگەرىن، قۇزىرەتىن ەلىمىزدىڭ سىبايلاس جەم­قورلىققا قارسى ساياساتىن ساپالى ىسكە اسىرۋعا جۇمساۋدى ويلايدى. «بالدىرعاندارىم جەمقورلىق جايلا­ماعان وتاندا ءومىر ءسۇرۋى ءۇشىن تىنباي­ ەڭبەك ەتەمىن»، دەيدى. ەڭ باستىسى ونىڭ ماق­­سات-مۇددەسى – حالىقتىڭ ارمان-مۇرا­تى­مەن ۇندەسەدى.

پرەزي­دەنتتىك جاستار كادرلىق رەزەر­ۆىنە مەملەكەت باسشىسىنان باستاپ، قارا­پايىم حالىققا دەيىن ۇكىلى ءۇمىت ارتىپ وتىر. ەلى­مىزدى بيىككە جەتەلەيتىن، جاڭاشا دا­مۋعا باستايتىن بىلىكتى جاستاردىڭ جاڭا شوعىرى قالىپتاستى دەگەن سەنىم بار. الاي­دا، شوعىردا دا شوقتىعى بيىك جان­دار بولادى ەمەس پە؟ سول شوقتىق جەڭ ۇشى­­نان جالعاسقان جەمقورلىقتى جەڭسەم دەپ جۇرگەن نۇرلان جاقسىمبەتوۆكە تيە­سى­لى!

 

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار