بەلگيا پرەمەر-ءمينيسترى سوفي ۆيلمەس بريۋسسەلدەۇلتتىق قاۋىپسىزدىك كەڭەسىنەن كەيىن وتكىزگەن بريفينگتە وسى سارسەنبىدەن باستاپ 12 جاسقا تولماعان بالالاردى ەسەپكە الماعاندا ەرەسەكتەردىڭ ءبىر-بىرمەن ارالاس-قۇرالاستىقتى 5 ادامنان اسىرماۋى قاجەتتىگىنە توقتالدى. سونداي-اق دۇكەندەرگە بارۋعا دا شەكتەۋ قويىلعان. بالاسىن ەرتكەن ءبىر ادامعا نەمەسە مۇگەدەكتى الىپ جۇرسە عانا ەكى جاننىڭ قاتار دۇكەنگە كىرۋىنە بولادى, ال 1,5 مەتر اراقاشىقتىقتى ساقتاي المايتىن جەردىڭ بارىندە تۇمشا تاعۋ مىندەتتەلەدى. مۇنىمەن قاتار بەلگيا ۇكىمەتى ەلدەگى كومپانيالارعا مۇمكىن بولعان كەزدىڭ بارىندە مەيلىنشە قاشىقتان جۇمىس ىستەۋ جايىندا كەڭەس بەرگەن.
وسى كەڭەستە ەلدەگى پورتتى قالا انتۆەرپەنءنىڭ دە جاعدايى قاراستىرىلدى. ال انتۆەرپەن قالاسىنىڭ باسشىلىعى ۋاقىت وزدىرماي كومەندانتتىق ساعات ەنگىزۋ تۋرالى شەشىم قابىلدانعان. قازىر انتۆەرپەن تۇرعىندارىمەن قاتار پروۆينتسيا حالقى ساعات 23.00 دەن تاڭعى 6.00-گە دەيىن ۇيلەرىنەن شىقپاۋى ءتيىس. تەك اۋرۋحاناعا نەمەسە جۇمىسقا باراتىن ادامعا عانا رۇقسات.
ۇنەمى بىرگە ءجۇرىپ, تىعىز ارالاساتىن ادامداردىڭ, ونىڭ ۇستىنە 5 جاننان ارتپايتىن بولسا مەيرامحانا, ءدامحانا, بارلارعا بىرگە بارىپ تاماقتانۋىنا بولادى. ال ولاردىڭ يەلەرى كەلگەن كليەنتتەرى تۋرالى ءمالىمەتتەردى ءتىزىپ ونى, 1 اي كولەمىندە ساقتاۋى ءتيىس.
كوپشىلىك جينالاتىن شارالار تۇگەلدەي توقتاتىلىپ, فيتنەس ورتالىقتار جۇمىسىن قاڭتارعان. پروۆينتسيا گۋبەرناتورى كەتي برەكس "بۇل 4 اپتاعا سوزىلادى. ءوزىڭىزدىڭ جانە جاقىندارىڭىزدىڭ دەنساۋلىعىنا بەيجاي قاراماساڭىز, انتۆەرپەنگە ازىرگە كەلمەڭىز. ال انتۆەرپەندىكتەر سىزدەر دە باسقا وڭىرلەرگە بارماڭىزدار", دەگەن ءوتىنىشءىن ايتقان.
انتۆەرپەندەگى 550 مەيرامحانا مەن بارلاردى ارالاپ كورگەن پوليتسيا سولاردىڭ ىشىنەن تۇمشالاۋدى تالاپ ەتپەگەن 34 ء–ىن جاۋىپ تا تاستاپتى.
