وزگەنىڭ ءومىرى ءۇشىن باسىن قاتەرگە تىگە ءجۇرىپ ىندەت تىرناعىنا ءىلىنىپ, ءوزى جۇمىس ىستەيتىن ينفەكتسيالىق بولىمدە كوز جۇمعان مەدبيكەنىڭ ءبىرى – ەلەنا نوۆوسەلوۆا. بۇعان دەيىن جىتىقارا مەكتەپتەرىنىڭ بىرىندە مەدبيكە بولىپ جۇرگەن ەلەنا قالاعا توتەنشە جاعداي رەجىمى ەنگىزىلىسىمەن كورونوۆيرۋس ىندەتىنە قارسى كۇرەسكە بەل شەشىپ كىرىسكەن ارىپتەستەرىنىڭ الدىڭعى قاتارىندا بولدى. ءساۋىر ايىنىڭ سوڭىندا ەڭ العاشقىلاردىڭ ءبىرى بولىپ كوروناۆيرۋس بەلگىسى انىقتالعان ناۋقاستار جاتاتىن ارنايى بولىمگە اۋىسىپ كەلدى.
– ەلەنا اناتولەۆنا كوپ جىلدىق ەڭبەك تاجىريبەسى بار بىلىكتى مامان ەدى. ارىپتەستەرىنەن ەشقاشان كومەگىن ايامايتىن. جۇمىس بارىسىندا, ءيا باسقا كەزدە بولسىن اينالاسىنا ۇنەمى شۋاق شاشىپ, اسىرەسە جاس مەدبيكەلەرگە قامقور بولىپ جۇرەتىن. ناۋقاستىڭ جاي-كۇيىن قاباعىنان تانيتىن ناعىز دارىگەر مامان ەدى. لەنا اپايدى بۇكىل ۇجىم بولىپ ەرەكشە قۇرمەت تۇتتىق. ەلەنا اناتولەۆنا 1965 جىلى 31 مامىردا جىتىقارا قالاسىندا دۇنيەگە كەلدى. 30 جىل عۇمىرىن تۋعان جەرىندەگى اۋداندىق اۋرۋحانا قابىرعاسىندا وتكىزگەن بىلىكتى مەدبيكە ءومىرىنىڭ سوڭىنا دەيىن انتىنا ادال بولىپ, اقتىق دەمى قالعانشا كوروناۆيرۋس ينفەكتسياسىنا قارسى كۇرەستى, – دەيدى اۋداندىق اۋرۋحانانىڭ باس دارىگەرى رۇستەم ايتباەۆ.
اق جەلەڭدى ابزال جاننىڭ ەرلىگىن مەملەكەت ەلەۋسىز قالدىرعان جوق. ەلەنا اناتولەۆنا نوۆوسەلوۆا قىزمەتتىك بورىشىن وتەۋ كەزىندەگى تاباندىلىعى مەن جانكەشتىلىگى جانە مەملەكەت پەن حالىققا سىڭىرگەن ولشەۋسىز ەڭبەگى ءۇشىن ەل پرەزيدەنتى قاسىم-جومارت توقاەۆتىڭ جارلىعىمەن «قۇرمەت» وردەنىنە لايىق دەپ تانىلدى. جوعارى مەملەكەتتىك ماراپاتتى اۋدان اكىمى اباي ىبىراەۆ مارقۇمنىڭ قىزى ۆيكتورياعا تابىس ەتتى. سالتاناتتى راسىمگە وردەن يەسىنىڭ وتباسى مەن تۋىستارى, دەنساۋلىق ساقتاۋ ءبولىمى مەن ءبىلىم بەرۋ ءبولىمىنىڭ باسشىلارى قاتىستى.
– كوروناۆيرۋسقا قارسى كۇرەسىپ جاتقان دارىگەردىڭ ءار كۇنى – ەرلىك. ءبىز ەلەنا اناتولەۆنانىڭ جارقىن بەينەسىن ەشقاشان ۇمىتپايمىز. ول بويىنداعى ىزگىلىك شۋاعىن وزىمەن بىرگە الا كەتكەن جوق. كوزى تىرىسىندە ارالاسىپ, بىلىسكەن اينالاسىنداعى ادامدارعا اماناتتاپ قالدىرىپ كەتتى. كەڭ جۇرەكتى, ىسىنە ادال دارىگەردىڭ ونەگەلى ءومىرى مەن ۇمىتىلماس ءىسىن ماقتان تۇتىپ, كەيىنگى ۇرپاققا ۇلگى ەتەتىن بولامىز. بۇگىندە اۋرۋحانا ۇجىمى كوروناۆيرۋسقا قارسى كۇرەستى جالعاستىرۋدا. پروۆيزورلىق, ينفەكتسيالىق ستاتسيوناردا توسەك-ورىندار مەن ءدارى-دارمەك جەتكىلىكتى. ءار ادامنىڭ قاۋىپسىزدىگى قاراستىرىلعان. ادامداردىڭ جاۋاپكەرشىلىگىن ارتتىرۋ كەرەك. جاسىرىن جيىن, تاسادا توي-تومالاق وتكىزۋ دەگەندى مۇلدە دوعارۋ كەرەك. بۇگىنگى تاڭداعى ەڭ باستى ماسەلە وسى بولىپ تۇر. ارقايسىمىز اباي بولىپ, ءوزىمىزدى ءوزىمىز كۇتىپ, اينالاداعى جاقىن ادامداردىڭ جاعدايىن ويلاۋىمىز كەرەك. بۇكىل قاۋىپسىزدىك شاراسىن قولدانۋ كەرەك, – دەدى اۋدان اكىمى.
– بالا كەزىمىزدە اعام پەتر ەكەۋمىزگە ۇيدە كوبىنە اكەمىز قارايتىن. انام كوبىنە جۇمىستا جۇرەتىن. ۋاقىت دەگەن ءومىر عوي. انام قامشىنىڭ سابىنداي قىسقا عۇمىرىنىڭ كوبىن اۋرۋحاناداعى ناۋقاستارعا ارنادى. ۇيگە قاتتى شارشاپ كەلەتىن. وعان ءبىز دە ۇيرەنىپ كەتتىك. ءبىزدىڭ باسىمىزعا تۇسكەن اۋىر قايعىعا بۇكىل ەل ورتاقتاسىپ جاتىر. ەل ىشىندەگى بىرلىك, باۋىرمالدىق دەگەندى ادام وسىندايدا تۇسىنەدى ەكەن. مەملەكەت باسشىسى قاسىم-جومارت توقاەۆتىڭ ءوزى اسىل اناشىمنىڭ ەڭبەگىن جوعارى باعالاپ, «قۇرمەت» وردەنىن بەرىپ جاتىر. بۇل – ءبىزدىڭ وتباسىمىز ءۇشىن ۇلكەن ماقتانىش. بالكىم انام سياقتى مەديتسينا قىزمەتكەرى بولماسپىن, بىراق ءوز وتانىن شىن سۇيەتىن ادال ازامات بولۋ –پارىزىم, – دەدى كوپشىلىك الدىندا تولقي سويلەگەن مارقۇمنىڭ قىزى ۆيكتوريا.
ءيا, ولگەندەر وردەن تاقپايدى. بىراق بۇل وردەن قىزمەت بابىندا ءجۇرىپ پاندەميا قۇربانىنا اينالعان قايسار مەدبيكەگە دەگەن ەل قۇرمەتىنە قويىلعان ەسكەرتكىش.
قوستاناي وبلىسى,
جىتىقارا قالاسى
