حالىق قامىن كوزدەگەن ساۋابى مول ىسكە «Haluq Sauda» دەگەن اتاۋ بەرىلگەن. ونىڭ باستى ۇيلەستىرۋشىسى «اقتوبە» الەۋمەتتىك-كاسىپكەرلىك كورپوراتسياسى» اق بولىپ وتىر. قازىر وبلىس ورتالىعىندا جوبا اياسىندا العاشقى دۇكەن-قويمالار اشىلعان. مۇندا ازىق-ت ۇلىك تاۋارلارىنىڭ سان الۋان تۇرلەرى, سونىڭ ىشىندە الەۋمەتتىك ماڭىزعا يە 19 ءتۇرلى ازىق-ت ۇلىك تاۋارى ساتىلادى. جوبانى ىسكە اسىرۋ كەزىندە حالىققا نەگىزىنەن جەرگىلىكتى ونىمدەردى جەتكىزۋگە باسىمدىق بەرىلگەن. ونىڭ ءبارى تۇرعىندارعا شەكتەۋسىز ۇسىنىلادى.
«اقتوبە» اكك قاناتقاقتى جوبانى ءوزىنىڭ ەنشىلەس ۇيىمدارىمەن قويان-قولتىق بىرلەسە جۇرگىزۋدە. بۇل ءىستىڭ باسى-قاسىندا جۇرگەندەر بۇگىنگى تاڭدا دۇكەن-قويما ۇلگىسىندە اشىلعان ورىنداردى الداعى ۋاقىتتا «Haluq Sauda» ءبىرتۇتاس دۇكەندەر جەلىسىنە ۇلاستىرۋدى ۇيعارعان. ونىڭ مەرزىمى الداعى قىركۇيەك ايىنىڭ باسىنا بەلگىلەنگەن. الدىن الا جاسالعان ەسەپتەرگە قاراعاندا, ءبىر دۇكەن ورتا ەسەپپەن ءار شاعىن اۋداننىڭ 30-40 مىڭ تۇرعىنىنا قىزمەت كورسەتپەك. وڭىرلىك تۇراقتاندىرۋ قورىنىڭ ونىمدەرىن اتالعان ساۋدا ورىندارى ارقىلى وتكىزۋ كوزدەلگەن.
تاعى ءبىر ۇتىمدى تۇسى, تۇرعىندار باعاسى ارزان ازىق-تۇلىك ونىمدەرىن ۇلكەن قالانى ارالاپ, ىزدەپ جۇرمەي, ءوز ۇيىنە تاياۋ ورنالاسقان «Haluq Sauda» جەلىسىنەن ساتىپ الا الادى. وعان قاراستى ساۋدا نۇكتەلەرىنىڭ ۇزدىكسىز جۇمىس ىستەۋىنە ازىق-ت ۇلىك وندىرۋشىلەر دە مۇددەلى بولماق. ويتكەنى ولار ءوز ونىمدەرىن وسى جەلى ارقىلى وتكىزبەك. ءتۇيىپ ايتقاندا, اتالعان جوبا جەرگىلىكتى تاۋار وندىرۋشىلەردىڭ تۇرالاپ قالعان اكتيۆتەرىن جانداندىرۋعا جول اشىپ وتىر.
قاناتقاقتى جوبانىڭ اۋقىمى مەيلىنشە كەڭ. سونىڭ ءبىرى – ونلاين ساۋدا جاساۋعا ارنالعان يننوۆاتسيالىق نەگىزدەگى ءموبيلدى قوسىمشا. ونىڭ باستى وزگەشەلىگى – ازىق-ت ۇلىكتى جەدەل جەتكىزىپ بەرەتىنى. ۇيدەن شىقپاي-اق تاۋارلارعا تاپسىرىس بەرىپ, تولەم جاساۋعا بولادى. ءسويتىپ موبيلدىك قوسىمشانى پايدالانۋ ارقىلى اقتوبەدە ەلەكتروندى ساۋدا الاڭى مەن قىزمەتىن جاساقتاۋدىڭ العىشارتى قالانعان. اسىرەسە, بۇل قىزمەت قازىرگى ىندەت كەزىندە تاپتىرمايتىن ءتاسىل ەكەنى دە تالاسسىز.
ەلىمىزدىڭ قاي وڭىرىندە دە الەۋمەتتىك ماڭىزى بار ازىق-تۇلىك باعاسىنىڭ قىمباتتاۋىنا تۇرعىندار نارازىلىق تانىتادى. سوندىقتان دا بۇل ماسەلەنى جەرگىلىكتى وكىلەتتى ورگاندار ۇدايى نازاردا ۇستاۋى قاجەت. سوعان سايكەس بۇگىندە وبلىستا باعاسى نارىقتان تومەن ازىق-ت ۇلىك قورى جاساقتالىپ جاتىر. قورداعى باعا نارىقتاعى باعانىڭ وسۋىنە تاۋەلسىز, وزگەرىسسىز كۇيىندە قالا بەرەدى.
بيىل وبلىستا تۇراقتاندىرۋ قورىن جاساقتاۋعا وبلىس بيۋدجەتىنەن 540 ملن تەڭگە بولىنگەن. ول بۇعان دەيىنگى مولشەردەن اجەپتاۋىر ارتىق. تۇرعىنداردى قاجەتتى ءارى جەتكىلىكتى ازىق-ت ۇلىك ونىمدەرىمەن قامتاماسىز ەتۋ ءۇشىن وڭىردە بىرقاتار ءىرى اگروقۇرىلىممەن فيۋچەرستىك كەلىسىمشارت جاسالعان. بۇل تۋرالى «اقتوبە» الەۋمەتتىك-كاسىپكەرلىك كورپوراتسياسى» اق باسقارماسىنىڭ توراعاسى ەرمەك يمانتاەۆ ايتىپ بەردى.
قىسقاسى, اقتوبە ايماعىندا قولعا الىنعان «Haluq Sauda» قاناتقاقتى جوباسى حالىق قامىن كوزدەۋدەن تۋعان قادام دەۋگە تولىق نەگىز بار. ەڭ باستىسى, اتالمىش جوبا الەۋمەتتىك ماڭىزى جوعارى ازىق-ت ۇلىك باعاسىنىڭ تۇراقتى بولۋىنا قاجەتتى ءبىر تۇتقاعا اينالا الاتىنى انىق.
اقتوبە
