مەملەكەت قارجىسىنا جوندەلىپ جاتقان جول, يا وڭدالىپ جاتقان نىسان سول ماڭايداعى جۇمىسسىزدىق ماسەلەسىنىڭ شەشىلۋىنە دە ىقپال ەتۋى ءتيىس. باعدارلامانىڭ وڭىردە جۇزەگە اسىرىلۋ بارىسى وبلىس اكىمدىگىندە تالقىلاندى. جيىندا جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى وبلىستاعى كۇرە جولداردىڭ وڭدالۋى بارىسىندا ەڭبەككە تارتىلعان تۇرعىندار تۋرالى ەسەپ بەردى.
ا.كوستيۋكوۆتىڭ مالىمەتىنشە, «جۇمىسپەن قامتۋدىڭ جول كارتاسى» باعدارلاماسى بويىنشا ايماقتا جىل باسىنان بەرى 5,4 ملرد تەڭگە يگەرىلگەن. باعدارلاما بويىنشا جالپى سانى 5064 ادامدى ەڭبەكپەن قامتۋ جوسپارلانعان. قازىردىڭ وزىندە 939 ادام جۇمىسقا تۇرىپتى.
– وتىز شاقتى نىساندا قۇرىلىس-مونتاج جۇمىستارى ءالى باستالا قويعان جوق. تاياۋ كۇندەرى اۋليەكول, بەيىمبەت مايلين, قامىستى اۋداندارىندا 3 جوبا قولعا الىنادى. التىنسارين اۋدانىندا 2, ال وبلىس ورتالىعىندا 25 جوبانى جۇزەگە اسىرۋدى باستايمىز. بۇل جوبالار 2 مىڭنان استام ادامدى جۇمىسپەن قامتۋعا مۇمكىندىك بەرەدى. ولاردىڭ دەنى جۇمىسپەن قامتۋ ورتالىقتارى ارقىلى جۇمىسقا ورنالاساتىن بولادى. مۇنىڭ سىرتىندا, جول جوندەۋ جۇمىستارىنا پايدالانىلاتىن ماتەريالداردىڭ 90%-ى جەرگىلىكتى كاسىپورىنداردان ساتىلىپ الىنادى, – دەدى ا.كوستيۋكوۆ.
وبلىس اكىمى ارحيمەد مۇحامبەتوۆ جول قۇرىلىسىنا جاۋاپتى مەكەمە باسشىلارىنا مەردىگەرلەرمەن كەلىسىمشارت جاساۋدا اسا مۇقيات بولىپ, جول جوندەۋ جۇمىستارىنىڭ ورىندالۋ ساپاسىن قاتاڭ باقىلاۋدى تاپسىردى.
قوستاناي
