ناتيجەسىندە ايماقتا جالپى ۇزىندىعى 597,7 شاقىرىم بولاتىن اۆتوموبيل جولى جوندەلەدى. مۇنىڭ سىرتىندا, بيىل اۋىلدىق ەلدى مەكەندەردە ءجۇرىپ جاتقان جول جوندەۋ جۇمىستارى ەرەكشە قارقىندى. جاز باستالعالى امانكەلدى, التىنسارين, اۋليەكول, قارابالىق, قاراسۋ, قوستاناي اۋداندارىنداعى كۇرە جولدار وڭدالىپ, بۇرىن-سوڭدى اسفالت كورمەگەن كوشەلەرگە تاس توسەلىپ جاتىر.
قازىر قوستاناي مەن توبىل قالاسىن جالعاپ جاتقان وبلىستىق ماڭىزى بار اۆتوموبيل جولىنىڭ بويىندا جاڭا كوپىر سالىنىپ جاتىر. بۇل ماڭدا قازىر جەرگىلىكتى تۇرعىندار «كورەي كوپىرى» دەپ اتاپ كەتكەن كونە كوپىر تۇر. ودان بىرنەشە ەسە كەڭ ءارى قاۋىپسىزدىك تالاپتارى تولىق ەسكەرىلگەن زاماناۋي جاڭا كوپىر ەسكى كوپىردىڭ وڭ جاق قاپتالىنان تۇسەدى. قازىر توبىل وزەنىنىڭ ۇستىندە قۇرىلىس قايناپ جاتىر. باس مەردىگەر – «قازاقجولقۇرىلىس» جشس. سەرىكتەستىك قۇرىلىس جۇمىستارىن جاز شىعا باستاپ كەتتى.
جوباعا سايكەس كوپىردىڭ قاراما-قارسى باعىتتاعى كولىك جولى جولاقتارى تورتەۋ بولادى. جوسپار بويىنشا نىسان باستاپقى ورنىنان ەداۋىر وڭعا قاراي جىلجيدى. بۇرىنعى تار وتكەل سەكىلدى ەسكى كوپىردىڭ بۇرىلىس-بۇلتارىسى كوپ ەدى. جاڭا كوپىر وبلىس ورتالىعىنىڭ شىعىس تۇسىنان شىعاتىن كوبەەۆ كوشەسىنە تىك جالعاسىپ كەتەتىن بولادى.
– جوبا ينفراقۇرىلىمدى دامىتۋدىڭ 2020-2025 جىلدارعا ارنالعان «نۇرلى جول» مەملەكەتتىك باعدارلاماسى اياسىندا جۇزەگە اسىرىلىپ جاتىر. قۇنى – 4,4 ملرد تەڭگە. كوپىر مۇلدە جاڭا كەيىپكە ەنەدى دەسەك بولادى. بيىل مۇنداعى جەلىلەر اۋىستىرىلىپ, كوپىرگە 140 تىرەك تاسى ورناتىلادى. ەكى قالانى قوساتىن كوپىردىڭ ۇزىندىعى 261 مەتر بولادى. ەگەر بۇرىن ەسكى كوپىردىڭ ەنى 10 مەتر بولسا, جاڭاسىنىڭ ەنى 24,5 مەترگە دەيىن كەڭەيتىلەدى.
جاياۋ جۇرگىنشىلەرگە ارنالعان تروتۋار سالىنىپ, ديودتى جارىقشامدار ورناتىلادى. بۇعان قوسا قاۋىپسىزدىك شارالارىن قامتاماسىز ەتۋ ءۇشىن بەينەباقىلاۋ كامەرالارىن قويۋ قاراستىرىلعان. كوپىر قۇرىلىسىن 2021 جىلدىڭ سوڭىنا تامان اياقتاۋدى جوسپارلاپ وتىرمىز, – دەدى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى الەكسەي كوستيۋكوۆ.
بيىل جاز وبلىستىڭ وڭتۇستىك اۋداندارىنداعى ەلدى مەكەندەردى جالعايتىن اۋليەكول-جالداما اۆتوموبيل جولى دا ورتاشا جوندەۋدەن ءوتىپ جاتىر. كۇرە جولدى قالپىنا كەلتىرۋگە 3,9 ملرد تەڭگە بولىنگەن. 100 شاقىرىمدىق اۆتوكولىك جولىنا جوندەۋ جۇرگىزىپ جاتقان مەردىگەر كومپانيا نىساندى كۇزگە دەيىن اياقتاۋدى كوزدەپ وتىر. سونداي-اق كوپتەن كۇتىم كورمەي وي-شۇقىرى كوبەيىپ توزىپ كەتكەن «قارابۇتاق-قوستاناي» تاس جولى جوندەلۋدە. قازىر رۋدنىي قالاسىنان دەنيسوۆ اۋىلىنا دەيىنگى ارالىقتا جول-قۇرىلىس جۇمىستارى جۇرگىزىپ جاتىر.
قوستاناي وبلىسى
