قوعام • 27 شىلدە، 2020

مۇحتار قۇل-مۇحاممەد: مىڭداعان وتانداسىمىزدىڭ ومىرىنە قاۋىپ تونە جازدادى

79 رەت كورسەتىلدى

تاياۋدا الماتىدا جالعان ءدارى-دارمەكتەر دايارلايتىن استىرتىن تسەح تابىلعانى بەلگىلى. تەكسەرە كەلگەندە سول دارىلەرگە ارنالعان قوراپ شىعاراتىن باسپاحانا مەن ولاردى ساقتايتىن قويما دا تابىلىپ، 100 توننادان استام كۇماندى پرەپاراتتار تاركىلەندى. بۇل تۋرالى پارلامەنت سەناتىنىڭ ءباسپاسوز قىزمەتى حابارلايدى، دەپ جازادى Egemen.kz

بۇكىل ەل بولىپ حالقىمىزدىڭ القىمىنان العان تاجالمەن ارپالىسىپ جاتقاندا مۇنداي سوراقىلىقتىڭ ورىن الۋى قوعامنىڭ اشۋ-ىزاسىن تۋدىرۋدا. سوندىقتان پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد دابىل قاعىپ، ەلىمىزدىڭ باس پروكۋرورىنا حات جولدادى.

سەنات دەپۋتاتى بار قازاق ءبىر-بىرىنە دوس-باۋىر رەتىندە كومەك قولىن سوزىپ جاتقان قازىرگى كەزدە حالىقتى الداعىسى كەلگەن كاسىپكەرلەردىڭ ءىس-ارەكەتىنە دەر كەزىندە توسقاۋىل قويۋ كەرەكتىگىنە نازار اۋدارعان.

"قازىر ءاربىر دارىلىك پرەپارات پەن مەديتسينالىق بۇيىم ەسەپكە الىنىپ، دارىگەرلەرىمىز ءاربىر سىرقاتتىڭ دەنساۋلىعى مەن ءومىرىن ساقتاپ قالۋ ءۇشىن جانقيارلىقپەن كۇرەسىپ جاتقان كەزدە مۇنداي سۇمپايى كاسىپكەرلەردىڭ اشكوزدىگى مەن ارامزالىعى جاعانى ۇستاتادى. ولاردىڭ ارام پيعىلىنىڭ اۋقىمى ءبىزدىڭ مىڭداعان وتانداسىمىزدىڭ ومىرىنە قاۋىپ ءتوندىرىپ، ەلىمىزدىڭ دەنساۋلىق ساقتاۋ جۇيەسىنە وراسان زور نۇقسان كەلتىرە جازدادى"، دەلىنگەن حاتتا.

سونىمەن قاتار سەناتور دارىلىك زاتتار مەن مەديتسينالىق بۇيىمداردى ساتۋ، تاراتۋ جانە ساقتاۋمەن اينالىساتىن مەكەمەلەردى، مۇنداي استىرتىن تسەحتىڭ قانشا ۋاقىت جۇمىس ىستەپ، فالسيفيكات ونىمدەردىڭ قانشا مولشەرىن تاراتىپ ۇلگەرۋ مۇمكىندىگىن دە ارنايى تەكسەرۋ كەرەكتىگىنە باسا ءمان بەرگەن.

ءشان مانىندە، قازاقتىڭ جاقسىسى مەن جايساڭىن كۇن سايىن ورتامىزدان ج ۇلىپ اكەتىپ جاتقاندا، الگىندەي ارامزالاردىڭ ارەكەتتەرى جاعدايدى ودان ءارى ۋشىقتىرا تۇسەدى. ەگەر، ايتەۋىر سىرقات جاننىڭ دەرتىنە شيپا بولار دەپ ساعاتتاپ كەزەكتە تۇرىپ العان ءدارىسى الدامشى زات بولىپ شىقسا، نە بولادى؟ سوندىقتان دەپۋتاتتىڭ جانايقايىنان قۇزىرلى ورگاندار ناتيجە شىعارادى دەپ سەنەمىز.

سوڭعى جاڭالىقتار

ۇقساس جاڭالىقتار