دەنساۋلىق ساقتاۋ باسقارماسىنىڭ باسشىسى ۆياچەسلاۆ دۋدنيكتىڭ ايتۋىنشا, وبلىس ورتالىعىنا كەلىپ تۇسكەن ءدارى-دارمەكتەردىڭ دەنى – قىزۋ تۇسىرەتىن, ۆيرۋسقا قارسى, انتيباكتەريالدى پرەپاراتتار. وبلىس اكىمدىگى دارىحانالىق جەلىلەر مەن فارماتسەۆتيكالىق فيرمالاردىڭ ديستريبيۋتورلارىنا كومەك كورسەتۋ ءۇشىن 300 ملن تەڭگە كولەمىندە قوماقتى قاراجات بولگەن. سونىڭ ناتيجەسىندە جەرگىلىكتى فيرمالار مەديكامەنتتىڭ مول قورىن جەتكىزىپ الدى.
قارجىلاي كومەك العانداردىڭ ءبىرى وبلىس اۋماعىندا «تسۆەتنايا» دەپ اتالاتىن 30-دان استام ءدارىحاناسى بار «ۆيتايم» جشس.
– اكىمدىك پەن جەكەمەنشىكتىڭ اراسىنداعى ىنتىماقتاستىق ءوز ناتيجەسىن بەرىپ وتىر. بۇگىندە ەل ىشىندە ءدارى تاپشىلىعىنا بايلانىستى دۇربەلەڭ باسىلدى. ءبىز بىرنەشە كۇننىڭ ىشىندە اۋداندار مەن قالالارداعى ءدارىحانالارىمىزدىڭ ءبىرىن قالدىرماي تۇرعىندارعا قاجەت الەۋمەتتىك ماڭىزعا يە ءدارى-دارمەكپەن تولتىرىپ قويدىق. ولاردىڭ باعالارى دا بۇرىنعىداي, – دەيدى سەرىكتەستىك باسشىسى ەكاتەرينا اۆدەەۆا.
قوستاناي وبلىسى
