كوپتىڭ كومەگى كوڭىلگە دەمەۋ

قوعام • 27 شىلدە، 2020

كوپتىڭ كومەگى كوڭىلگە دەمەۋ

19 رەت كورسەتىلدى

بۇگىندە الەمدى ابىگەرگە سالىپ وتىرعان كوروناۆيرۋس ىندەتىمەن كۇرەس كەزىندە جامبىلدىق ازاماتتار دا بەلسەندىلىك تانىتۋدا. جەرگىلىكتى كاسىپكەرلەردىڭ جانە وزگە دە قايىرىمدى جانداردىڭ اتسالىسۋىمەن قازىرگى كەزدە تاراز قالاسىنداعى №5 ەمحاناعا ءدارى-دارمەكتەر مەن مەديتسينالىق بۇيىمداردىڭ ءىرى پارتياسى جەتكىزىلگەن.

حاميت ەسامان

ونىڭ ىشىندە دەنە قىزۋىن تۇسىرەتىن دارىلەر، قابىنۋعا قارسى ءدارى-دارمەكتەر، انتيبيوتيكتەر جانە ءبىر رەتتىك شپريتستەر بار. جالپى قۇنى 27 ملن تەڭگەنى قۇرايدى. اتالعان مەديتسينالىق بۇيىمدار تىزىمگە سايكەس وبلىس بويىنشا كومەككە مۇقتاج جاندارعا تاراتىلۋدا.

«وبلىس اكىمى بەردىبەك ساپارباەۆ كاسىپكەرلەرمەن ارنايى كەزدەسىپ، جەرلەستەرىمىز ءۇشىن قولدان كەلەتىن بارلىق مۇمكىندىكتى جاساۋعا شاقىردى. كەيىنىرەك وبلىستىق دەنساۋلىق ساقتاۋ باسقارماسىنان ازاماتتار قوڭىراۋ شالىپ، ينفەكتسيالىق اۋرۋحانا ءۇشىن وتتەگى تۇتىكتەرىن ساتىپ الۋعا كومەكتەسۋىمدى سۇرادى. ءوزىم جاقسى تانيتىن ءبىراز كاسىپكەرلەرگە حابارلاسىپ، وسى ۇسىنىستى جەتكىزدىم. ولار مەنى بىردەن قولدادى. ءسويتىپ ءبارىمىز 11 كونتسەنتراتور اپپاراتىن الۋعا قاراجات جينادىق»، دەيدى «التايس گرۋپپ» جشس باس ديرەكتورى الىمبەك جۇماباەۆ.

بۇدان بولەك، قاجەتتى مولشەردە ءدارى-دارمەك ساتىپ الۋ ءۇشىن قايىرىمدى جانداردىڭ قولداۋىمەن 48 ملن تەڭگەگە جۋىق قاراجات جينالىپتى. جالپى العاندا، جامبىلدىق 20 ءىرى كومپانيانىڭ باسشىلارى قاۋىپتى ىندەتپەن كۇرەسكە 70 ملن تەڭگە كولەمىندە قارجى بولگەن.

«تاراز» الەۋمەتتىك-كاسىپكەرلىك كورپوراتسياسى» مەكەمەسىنىڭ باسقارما توراعاسى ولجاس قارجاۋوۆتىڭ ايتۋىنشا، اتالعان كورپوراتسيا ۇيلەستىرۋشى رەتىندە شىمكەنت قالاسىنداعى «زەردە» مەديتسينالىق قويماسىمەن زاتتاردى جەتكىزىپ بەرۋ بويىنشا كەلىسسوز جۇرگىزگەن. سونداي-اق ولار تاۋارلاردى تاسىمالداۋدى بارىنشا قامتاماسىز ەتىپتى. جامبىلدىق كاسىپكەرلەر مەن قوعام بەلسەندىلەرىنىڭ، جالپى قايىرىمدى جانداردىڭ جەدەل جۇمىلىپ، جۇيەلى ارەكەت ەتۋىنىڭ ناتيجەسىندە كوپتەگەن ناۋقاستىڭ لايىقتى دەڭگەيدە ەم الۋىنا جاعداي جاسالىپ وتىر. بۇل ورايدا جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ قاۋىپتى ىندەتپەن كۇرەستە كۇش بىرىكتىرۋدىڭ ماڭىزدىلىعىن ايتا كەلىپ، كوپتىڭ كومەگى تالايدىڭ كوڭىلىنە دەمەۋ بولىپ وتىرعانىن جەتكىزدى.

جامبىل وبلىسى