بۇل جوبانىڭ باستى ەرەكشەلىگى رەسپۋبليكامىزدىڭ تۇكپىر-تۇكپىرىندەگى ەرىكتىلەرگە ءوز ەركىمەن جوباعا قاتىسىپ, بەلسەندىلىگىن ارتتىرۋعا مۇمكىندىك بەرۋىندە. تۋعان حالقىنىڭ تاريحىن زەرتتەۋ ورتاق ماقساتىنا اينالعان تالانتتى جاستار ءبىر-ءبىرىنىڭ شىعارماشىلىعىن شىڭداپ, رۋحاني كەمەلدەنۋىنە ىقپال ەتە وتىرا, مادەني مۇرانىڭ ساقتالۋىنا اقپاراتتىق ىزدەنىس قوسا الادى. سونىمەن بىرگە, ەڭ باستىسى, تاريح, مادەنيەت ەسكەرتكىشتەرىن جانە مەموريالدىق كەشەندەردى قالپىنا كەلتىرۋ جانە ساقتاۋ جونىندەگى جوبالارعا قاتىسىپ, تاريحىمىزدىڭ ۇرپاقتان-ۇرپاققا مۇرا بولىپ قالۋىنا قولعابىس ەتەدى.
جاقىندا تۇركىستاندىق ۆولونتەرلەر وتىرار, كۇلتوبە, سايرام, يسفيدجاپ, ورداباسى, ۇزىن اتا, ۇكاش اتا, ساۋران, اپپاق يشان مەدرەسەسى سىندى تاريحي ورىندارىندا, اقسۋ-جاباعىلى, قاراتاۋ قورىقتارىندا رەستاۆراتسيالىق, قالپىنا كەلتىرۋ بويىنشا جۇمىستارىن باستادى. قازىرگى تاڭدا وسى جوباعا قاتىسۋعا ءوتىنىش بىلدىرگەن ۆولونتەرلەر سانى 300-گە جەتتى. بۇل – نەگىزىنەن رەسپۋبليكا بويىنشا جوعارى كورسەتكىش. ايماقتاعى جاستاردىڭ تاريحقا قىزىعۋشىلىعىمەن قاتار, قاسيەتتى جەرلەردى قۇرمەت تۇتىپ, قادىرلەۋىنىڭ نىشانى ىسپەتتەس.
تۇركىستان وبلىسى قوعامدىق دامۋ باسقارماسى «جاستار رەسۋرستىق ورتالىعىنىڭ» باسشىسى امالبەك ءومىرتايدىڭ ايتۋىنشا, مۇنداي جوبالار جاسوسپىرىمدەر مەن جاستاردىڭ نازارىن مادەني مۇرالارعا اۋدارۋ, ۇلتتىق قۇندىلىق پەن ۇلتتىق كود تۋرالى جاستاردىڭ تۇسىنىكتەرىن جانداندىرۋعا ايرىقشا اسەر ەتەدى.
«جوباعا ۇسىنىس بىلدىرگەن ۆولونتەرلەر سانىنىڭ كوپتىگى دە جاستاردىڭ مادەنيەت پەن تاريحقا دەگەن قىزىعۋشىلىعىن اڭعارتسا كەرەك. ءوزىم دە جاس ۆولونتەرلەرمەن بىرگە ساۋران, بايدىبەك اۋداندارىنداعى شارالارعا قاتىسىپ, سونداعى جۇمىس بارىسىمەن تانىستىم. ءوز ۇلەسىمدى دە قوستىم. ويتكەنى ءبىز ۇلتتىق مادەنيەتىمىز ارقىلى عانا ءوزىمىزدىڭ ءتۇپ-تامىرىمىزدى سەزىنىپ, بولاشاققا باعدار الامىز», دەيدى ورتالىق باسشىسى.
وسى كەزگە دەيىن «Birgemiz: Asyl mura» باعىتىنىڭ ء«وز ەلىڭدى تانىپ ءبىل» جوباسى اياسىندا بايدىبەك اۋدانىندا ورنالاسقان اپپاق يشان مەشىت-مەدرەسەسىنە, بايدىبەك بي, دومالاق انا, قوس انا كەسەنەلەرى, بورالداي پەتروگليفتەرىنە ۆولونتەرلەرگە ارنالعان ەكسكۋرسسيا ءوتتى. ونىڭ اياسىندا جاستار بۇل مەكەندەردە تازالىق جۇمىستارىن جۇرگىزىپ, قابىرعالاردى ارلەۋگە, قورشاۋ ايماعىن سىرلاۋعا اتسالىستى.
«ازىرەت-سۇلتان» رەسپۋبليكالىق قورىق مۇراجايىنا قاراستى كونە ساۋران قالاسىندا ەرىكتىلەرمەن سەنبىلىك جۇمىستارى جۇرگىزىپ, اتالعان مۋزەيگە قارايتىن «كۇلتوبە» ارحەولوگيالىق قازبا ورنى دا ۆولونتەرلەرگە تانىستىرىلدى. تەك تۇركىستان وبلىسىنىڭ ايماعى عانا ەمەس, كورشىلەس جامبىل وبلىسى جۋالى اۋدانىنداعى «جىلقىشى توبە» قورىمىنداعى ارحەولوگيالىق قازبا جۇمىستارىنا ءوڭىرىمىزدىڭ ۆولونتەر جاستارى بارىپ, ونداعى جۇمىستارعا بەلسەندى اتسالىسىپ, قازبا جۇمىستارىنا قاتىسىپ كەلدى.
تۇركىستاندىق ۆولونتەرلەر ءالى دە بولسا قارقىندى جۇمىس ىستەپ, تاريحي-مادەني ورىنداردى گۇلدەندىرە تۇسپەك نيەتتە. تەك تازالىق پەن رەتكە كەلتىرۋ جۇمىستارىنان وزگە الداعى ۋاقىتتا تاريحي ايماقتاردا اشىق اسپان استىنداعى تەاترلاندىرىلعان قويىلىمدار دايارلاۋ دا جوسپاردا بار. ونىڭ دايىندىق جۇمىستارىنا كىرىسىپ, قازىرگى ۋاقىتتا كۇلتوبە اۋماعىنداعى قويىلىم ستسەناريلەرى دايارلانىپ جاتىر.
بۇل جۇمىستاردىڭ ءبارى جالپىۇلتتىق جوبانىڭ اياسىندا تاريحي نىسانداردى ساقتاۋ مەن قالپىنا كەلتىرۋگە ىقپال ەتىپ قانا قويماي, جاستاردىڭ ولارعا دەگەن قىزىعۋشىلىعىن وياتۋعا اسەر ەتىپ وتىر دەگەن سەنىمدەمىز.
رىسگۇل دوسجانوۆا,
ۆولونتەر
