وتكەن سەنبى كۇنى شەرۋدىڭ جاڭا تولقىنى باستالىپ, وعان ون مىڭعا جۋىق ادام قاتىسقان. «ەركىندىك», «بۇل – ءبىزدىڭ جەر» دەپ ۇرانداتقان حاباروۆسك تۇرعىندارىن قولداۋشىلار رەسەي فەدەراتسياسىنىڭ باسقا دا ايماقتارىنان تابىلدى. شەرۋ ءجۇرىپ جاتقان وڭىرلەر اراسىندا ۆلاديۆوستوك, وڭتۇستىك ساحالين, ماسكەۋ, كراسنودار, ياكۋتسك, ءنوۆوسىبىر, كراسنويارسك, يركۋتسك بار. ولار «حاباروۆسك, ءبىز بىرگەمىز», «حاباروۆسك – باتىرلار قالاسى» دەپ ۇرانداتۋدا. اقپارات اگەنتتىكتەرىنىڭ جازۋىنشا, ۆلاديۆوستوكتاعى شەرۋدە ادام قاراسى قالىڭ. نارازىلار ساياسي تۇتقىنداردىڭ ىسىنە الاڭداۋشىلىق تانىتۋمەن قوسا, مەملەكەت باسشىلىعىنىڭ وتستاۆكاعا كەتۋىن تالاپ ەتەتىنىن اشىق ايتىپ جاتىر. ءتىپتى شەرۋلەردە «پۋتين جوق رەسەيدە تۇرعىمىز كەلەدى» دەگەن جازۋلاردى كەزدەستىرۋگە بولادى.
كەشە سانكتسيالانباعان ميتينگتەرگە قاتىسقان 14 ماسكەۋلىك جاۋاپقا تارتىلدى. سونىمەن بىرگە يۋري دولگورۋكي ەسكەرتكىشىنىڭ الدىندا 30 ادام ۇستالدى. ولار باس پروكۋراتۋراعا حاباروۆسكىدەگى جاعدايدى نازارعا الىپ, ماسەلەنى انىقتاپ, رەتتەۋگە ءوتىنىش جازباق بولعان. سونىمەن بىرگە ساياسي تۇتقىنداردىڭ ءىسىن قايتا قاراپ, ميتينگ وتكىزۋگە شەكتەۋلەردى الىپ تاستاۋدى تالاپ ەتكەن.
سوڭعى دەرەكتەرگە سۇيەنسەك, حاباروۆسك ايماعىنىڭ وزىندە اكتسيالارعا 50 مىڭ ادام قاتىسىپتى. ال ۇكىمەت قازىر اشىق الاڭداردى جاۋىپ, كوشەگە شىققانداردى كارانتين ءتارتىبىن بۇزدى دەگەن ايىپپەن جاۋاپقا تارتۋدا. ال 9 شىلدەدە ۇستالعان حاباروۆسكىنىڭ بۇرىنعى گۋبەرناتورى سەرگەي فۋرگالدىڭ ءىسى ءالى ناقتىلانعان جوق. 20 شىلدەدە ونى مەملەكەت باسشىسى ۆلاديمير پۋتين قىزمەتىنەن بوساتىپ, ورنىنا مەملەكەتتىك دۋما دەپۋتاتى ميحايل دەگتيارەۆتى تاعايىندادى. حاباروۆسكى تۇرعىندارى ۋاقىتشا تاعايىندالعان باسشىنىڭ وتستاۆكاعا كەتۋىن تالاپ ەتۋدە.
