وزبەكستاننان قازاقستانعا وتپەك بولعان كولىكتە قۇجاتى جوق 2 ملن تەڭگەنىڭ تاۋارى تابىلعان. تۇركىستان وبلىسى بويىنشا مەملەكەتتىك كىرىستەر دەپارتامەنتى ءباسپاسوز قىزمەتىنىڭ مالىمەتىنشە, كەدەنشىلەر ءتۇن ىشىندە وزبەكستاننان قازاقستانعا باعىت العان اۆتوكولىكتى تەكسەرگەن.
ونى سكانەرلەۋ كەزىندە ىشىندە دەكلاراتسيالانباعان تاۋار بولعانى انىقتالعان. جاۋاپ الۋ بارىسىندا كولىك جۇرگىزۋشىسى شەكارا ارقىلى «AKARA BIO پرەپاراتىن» (اكاريتسيد) پەستيتسيدتەرىن زاڭسىز الىپ وتپەك بولعانىن جەتكىزگەن. ونداعى 50 قاپتامانىڭ ارقايسىسىندا بەس ليترلىك 4 ىدىستان بولعان. زاڭسىز تاۋاردىڭ قۇنى 1 454 545 مىڭ تەڭگەنى قۇراعان.
ايتا كەتەيىك, وسىدان بىرنەشە كۇن بۇرىن ءدال سول كەدەن بەكەتى ارقىلى تاعى ءبىر قازاقستان ازاماتى دەكلاراتسيالانباعان تەمەكى بۇيىمدارىن الىپ وتپەك بولعان ەدى. «كەدەندىك تەكسەرۋ كەزىندە وزبەكستانعا باعىت العان اۆتوكولىكتەن جاسىرىلعان 600 قوراپ «Heets» تەمەكىسىنىڭ ستيكتەرى تابىلدى.
قۇجاتتارىن تەكسەرۋ كەزىندە قازاقستان ازاماتىنىڭ تاۋاردى رەسەي فەدەراتسياسىنان الىپ كەلە جاتقانى انىقتالعان. بۇل فاكتىلەر بويىنشا بارلىق ماتەريالدار تەرگەۋ ءىس-شارالارىن جۇرگىزۋ ءۇشىن قۇقىق قورعاۋ ورگاندارىنا وتكىزىلدى» دەلىنگەن حابارلامادا.
