سىرشىل اقىن ساعي جيەنباەۆ وتكەن عاسىردا «قارتتارىم, امان ساۋ ءجۇرشى!» دەپ ەدى. ۇرپاق ساباقتاستىعىندا قارتتاردىڭ ورنىن كەيىنگى تولقىن جالعاستىرىپ, ونىڭ ءىزىن جاستار باسىپ جاتادى. بۇل بۇلجىماي ورىندالىپ كەلە جاتقان ءومىر زاڭى. الاپات سوعىستىڭ مايدانگەرلەرى بۇل كۇندە ساۋساقپەن سانارلىق قانا قالدى.
سىرشىل اقىن ساعي جيەنباەۆ وتكەن عاسىردا «قارتتارىم, امان ساۋ ءجۇرشى!» دەپ ەدى. ۇرپاق ساباقتاستىعىندا قارتتاردىڭ ورنىن كەيىنگى تولقىن جالعاستىرىپ, ونىڭ ءىزىن جاستار باسىپ جاتادى. بۇل بۇلجىماي ورىندالىپ كەلە جاتقان ءومىر زاڭى. الاپات سوعىستىڭ مايدانگەرلەرى بۇل كۇندە ساۋساقپەن سانارلىق قانا قالدى.ال ولاردىڭ جول سورابىن سوعىس سۇراپىلىندا بالالىعىنان ايىرىلعان قايسار جاندار باستى. كوڭىل كوزى اشىقتار ەندى سولاردى ەلەپ-ەسكەرىپ جاتىر.
التىن كۇزبەن بىرگە ارقا توسىندەگى استانادا ەلىمىزدىڭ وبلىستارى بارلارىمەن كوزگە ۇرىپ, جارمەڭكە وتكىزۋدى داستۇرگە اينالدىردى. بۇل قازىر ادەمى جالعاسىن تاۋىپ جاتىر. سولارمەن بىرگە ەلوردانى كورۋگە نيەت تانىتقان, سول جاعالاۋداعى كوز تارتار كورىكتى عيماراتتاردى, ايبارلى رۋحاني دۇنيەلەرگە ريزا كەيىپپەن قاراپ, تەلەديدارداعى, سۋرەتتەردەگى كورىنىستەر اقيقات ەكەن دەپ جۇرگەن اۋىل قارتتارىمەن ديدارلاسىپ قالعانىمىز بار.
– ءبىز باتىس قازاقستان وبلىسى, جاڭاقالا اۋدانىنان كەلدىك. اكىمىمىز لاۆر حايرەتدينوۆ: «استانانى كورىڭىزدەر, تاماشالاڭىزدار. سودان كەيىن ەلگە كەلىپ بار جاقسىلىقتى جەتكىزىڭىزدەر», – دەپ ءار اۋىلدان توعىز قارت الىپ كەلىپ ەدى, كورىپ كوڭىلىمىز تولىپ, وسىنىڭ ءبارى تاۋەلسىزدىكتىڭ ارقاسىندا جەتكەن جەتىستىگىمىز ەكەنىنە يلاندىق. ەلباسى نۇرسۇلتان نازارباەۆتىڭ دارا دا دانا ىسىنە كوڭىل توعايدى, – دەيدى قاليمولدا زاينۋللين. ول اۋىلدىڭ دا اجارى اشىلىپ كەلە جاتقانىنا ناقتى مىسالدار كەلتىردى. ال ونىمەن قاتارلاس كەلە جاتقان سەيدەعالي قويشىعاليەۆ «سەكسەن ۇشكە اياق باسقان شاقتا استانانى كورۋ باقىتىنا يە بولدىق. تەلەديداردان باتىس ەلدەرىنىڭ استانالارىن قاق جارىپ اعىپ جاتقان وزەندەردى كورىپ, تاڭعالۋشى ەدىك. ءبىزدىڭ استانامىز دا ەسىلدىڭ ەكى جاعىنا ورىن تەۋىپتى. «بايتەرەك», «حان شاتىر», نازارباەۆتىڭ ورتالىق مۇراجايى كەلىستى-اق تۇر. ەلدەن اقساقالدار كەلىپتى دەپ سەنات, ءماجىلىس دەپۋتاتتارى قابىلداپ, قۇرمەت كورسەتتى. قارتىن قادىرلەگەن اتا سالتتى كورىپ, ءبىر مارقايىپ قالدىم», – دەيدى. تاعى ءبىر اقساقال: «وسىنداي يگىلىكتى ىسكە ۇيىتقى بولىپ, ءبىزدى قاتاردان قالدىرماعان اكىم ءىنىمىز لاۆر راشيد ۇلىنا العىسىمىز ەرەن. سەكسەننىڭ ۇستىنە شىعىپ سەلكىلدەپ جۇرگەندە, ەڭسەلى ەلورداعا اكەلىپ, وسىنشا ىزگى نيەتكە كەنەلتتى. ءبىز استانادان كورگەن ءاربىر اقيقاتتى سۋرەتكە ءتۇسىرىپ الىپ ءجۇرمىز. بارعان سوڭ اۋدان جۇرتشىلىعىنا تانىستىراتىن بولامىز», – دەسە, تابىلدى ماساتوۆ ەل دامۋىنا جاڭاقالا اۋدانى ازاماتتارىنىڭ قوسىپ وتىرعان ۇلەسىنەن دايەكتەر كەلتىردى. مولداعالي تاجيەۆ اۋداندا اتقارىلعان جۇمىستاردى العا تارتتى. «اسىرەسە, اۋىل-اۋىلعا جەتكەن كوگىلدىر وتىن مەن «اقبۇلاق» باعدارلاماسى اياسىندا تازا سۋعا قولىمىز جەتتى», – دەيدى ول.
كونەنىڭ كوزىندەي, ءومىردىڭ وزىندەي قارتتارمەن ديدارلاسقاندا التىن تامىر اۋىلمەن قاۋىشقانداي بولدىق.
سۇلەيمەن مامەت,
«ەگەمەن قازاقستان».
