اۋاداي قاجەت انتيبيوتيكتەردىڭ ايماققا جەتكىزىلگەنىنە 2-3 كۇن بولدى. الەۋمەتتىك ماڭىزى زور پرەپاراتتاردىڭ ىشىندە ىشكى بۇلشىق ەتكە ءدارى سالۋ ءۇشىن ەرىتىندى دايىنداۋعا ارنالعان 58 مىڭ قۇتى تسەفترياكسون, 36,5 مىڭ تسەفازولين, 20 مىڭ قاپتاما اتسەتيلين, 3 مىڭ قاپتاما تاميفلۋ مەن تەرافليۋ, سونداي-اق ەم الىپ جاتقان ناۋقاستاردىڭ قانى ۇيىپ قالماۋ ءۇشىن قولدانىلاتىن 200 قاپتاما كلەكسان ءدارىسى بار.
«ستوفارم» سەرىكتەستىگىنىڭ كوممەرتسيالىق ديرەكتورى سەرگەي اتكيننىڭ ايتۋىنشا, شەتەلدىك دارىلەر ءبىر تاۋلىكتىڭ ىشىندە وبلىستىڭ بارلىق ءدارىحاناسىنا تاراتىلىپ, ساۋداعا شىعارىلا باستاعان.
– بۇگىندە تۇرعىندار ءۇشىن ازيتروميتسين ءدارىسى دە قولجەتىمدى ەكەنىن ايتا كەتۋ كەرەك. قوردا بارلىعى 6 مىڭ قاپتاما بار. سونداي-اق ۆيرۋسقا قارسى گروپرينوسين دەپ اتالاتىن ءدارىنىڭ 3,5 مىڭ قاپتاماسى تاراتىلۋدا. قازىر ءدارى-دارمەكتەردى ايماقتاعى 300-گە جۋىق دارىحاناعا بارىنشا تەزىرەك تاراتىپ بەرۋگە كۇش سالۋدامىز. ايتەۋىر حالىققا ءدارى تاپشىلىعىن سەزدىرمەۋ ءۇشىن قولدان كەلگەننىڭ ءبارىن ىستەپ جاتىرمىز, – دەدى س. اتكين.
مۇنىڭ سىرتىندا, ايماقتاعى ءىرى ءدارىحانا جەلىلەرىنە قارجىلاي قولداۋ كورسەتىلە باستادى. وتكەندە عانا وبلىس اكىمى ارحيمەد مۇحامبەتوۆ كوتەرمە ساۋدا فيرمالارى مەن ءىرى ءدارىحانا جۇيەلەرىنىڭ باسشىلارىمەن كەزدەستى. كەزدەسۋ بارىسىندا ءدارىحانا جۇيەلەرىنە قايتارىمدى قارجىلاي كومەك بەرۋ تۋرالى شەشىم قابىلدانعان.
– بۇل ماقساتقا بىردەن 300 ملن تەڭگە ءبولىنىپ, دارىحانالارعا وبلىس تۇرعىندارىن اسا ءزارۋ دارىلەرمەن قامتاماسىز ەتۋ مىندەتى جۇكتەلىپ وتىر. ونىڭ قاتارىنا قىزۋ تۇسىرەتىن, ۆيرۋسقا قارسى قولدانىلاتىن پرەپاراتتار, سونداي-اق قان قويۋلانۋىن تەجەيتىن انتيبيوتيكتەر جاتادى. ءدارىحانا يەلەرى قارىزعا بەرىلگەن قارجىنى ەشبىر وسىماقىسىز جىل سوڭىنا دەيىن قايتارىپ بەرە الادى, – دەدى تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ورال بەكماعامبەتوۆ.
دەنساۋلىق ساقتاۋ باسقارماسىنىڭ مالىمەتىنشە, تاياۋ كۇندەرى وبلىسقا رەسەيدەن شىققان ءدارى-دارمەكتىڭ جاڭا لەگى كەلىپ جەتۋى ءتيىس. الەۋمەتتىك ماڭىزى بار بۇل دارىلەردىڭ ءبارى تۇرمىسى تومەن وتباسىلارعا تاراتىلىپ بەرىلەدى.
قوستاناي وبلىسى
