مەموراندۋم اياسىندا "سامۇرىق-قازىنا" ۇلتتىق ءال-اۋقات قورى 100 جەدەل جاردەم كولىگىن, 1000 وتتەگى كونتسەنتراتىن, 50 وكپەنى جاساندى جەلدەتۋ اپپاراتىن, 1000 پۋلسوكسيمەتر جانە 3000 "اۆيفاۆير" ۆيرۋسقا قارسى ءدارىسىن ساتىپ الىپ, قر دەنساۋلىق ساقتاۋ مينيسترلىگىنە تاپسىرۋدى باستادى. كومەكتىڭ بۇل تۇرلەرى قر دەنساۋلىق ساقتاۋ مينيسترلىگىمەن كەلىسىلە وتىرىپ, كومەكتىڭ تاپشىلىعىنا قاراي جىبەرىلەدى.
"بۇل شارالاردىڭ بارلىعىن ەل پرەزيدەنتى توقاەۆ قاسىم-جومارت كەمەل ۇلى قولدادى. وزدەرىڭىز بىلەتىندەي, جاقىندا ەلباسىمەن كەزدەسۋ ءوتىپ, وندا ول قوردىڭ ىشكى قورىنان نۇر-سۇلتان جانە الماتى قالالارىندا ەكى مەديتسينالىق ورتالىق سالۋعا قاراجات ءبولۋدى تاپسىردى. بۇل ورتالىقتار حالىققا مەديتسينالىق قىزمەت كورسەتۋ ءۇشىن عانا ەمەس, سونىمەن قاتار عىلىمي-زەرتتەۋ الەۋەتىن شوعىرلاندىرۋعا ارنالعان بولادى. اتالعان جۇمىستى ءبىز باستادىق, قاراجاتتى رەزەرۆكە سالدىق", - دەپ اتاپ ءوتتى احمەتجان ەسىموۆ.
ءسوز سوڭىندا قور باسشىسى قر دەنساۋلىق ساقتاۋ مينيسترلىگىنەن مەديتسينا ورتالىقتارى بويىنشا تەحنيكالىق تاپسىرما الۋدى تەزدەتۋدى, ال اتالعان قالالاردىڭ اكىمدەرىنەن ءتيىستى كوممۋنيكاتسيالارى بار جەر ۋچاسكەلەرىن ءبولۋدى سۇرادى.
"قر دەنساۋلىق ساقتاۋ مينيسترلىگى اتىنان قوردىڭ كورسەتكەن كورپوراتيۆتىك الەۋمەتتىك جاۋاپكەرشىلىگىنە جانە جۇقپالى اۋرۋلاردىڭ, ونىڭ ىشىندە كوروناۆيرۋستىڭ ورشۋىنە قارسى كۇرەستە ۇلتتىق دەنساۋلىق ساقتاۋ جۇيەسىن نىعايتۋعا ىقپال ەتكەنىنە العىس بىلدىرۋگە رۇقسات ەتىڭىزدەر. مەموراندۋم قازىرگى ەپيدەميولوگيالىق قاۋىپ-قاتەرلەرگە دەر كەزىندە جانە قاجەتتى شارالار قابىلداۋعا مۇمكىندىك بەرەتىنىنە سەنىمدىمىن",- دەدى الەكسەي تسوي.
ەستەرىڭىزگە سالا كەتەيىك, "سامۇرىق-قازىنا" قورى توتەنشە جاعدايدىڭ العاشقى كۇنىنەن باستاپ كوروناۆيرۋسپەن كۇرەسكە بەلسەندى قاتىسۋدا. ەلباسىنىڭ تاپسىرماسىن ورىنداۋ ءۇشىن قور نۇر-سۇلتان جانە الماتى قالالارىندا ينفەكتسيالىق اۋرۋلاردىڭ الدىن الۋ جانە باقىلاۋ بويىنشا ەكى كلينيكا قۇرىلىسىن قارجىلاندىراتىن بولادى. اعىمداعى جىلدىڭ ناۋرىز ايىندا قور 6 ملن قورعاۋ ماسكالارىن ساتىپ الۋدى قارجىلاندىردى, سونداي-اق ەكونوميكانىڭ ءوسۋىن نىعايتۋ, وتاندىق تاۋار وندىرۋشىلەردى قولداۋ جانە دەنساۋلىق ساقتاۋ سالاسىن دامىتۋ بويىنشا شارالار قابىلدادى.
