سۋرەتتى تۇسىرگەن وقاس امانعالي
باتىس قازاقستان وبلىسىنىڭ ءبىر توپ كاسىپكەرى بۇگىن وبلىستىق كوپبەيىندى اۋرۋحاناعا 2 وتتەگى كونتسەنتراتورى مەن 400 پۋلسوكسيمەتر اپپاراتىن سىيعا تارتتى.
"بۇل جابدىقتار covid-19 ىندەتىمەن كۇرەستە دارىگەرلەرگە وتە قاجەت كومەكشى قۇرال", دەيدى اۋرۋحانا ديرەكتورى ارمان بايدەۋوۆ.
دۇنيەنى دۇرلىكتىرگەن پاندەمياعا قارسى كۇرەس ەلىمىزدە جالپىحالىقتىق مايدانعا اينالدى. جۇرت بولىپ جۇمىلىپ, دارىگەرلەرگە دەم بەرۋشى, اۋرۋحانالارعا كومەكتەسىپ جاتقان اعايىن كوپ.
"كوروناۆيرۋس پاندەمياسىنا قارسى كۇرەسكە ءبىزدىڭ كاسىپكەرلەرىمىز تاعى دا جۇمىلدى. بۇگىن بىزگە اكەلىپ وتىرعان 10 ليترلىك وتتەگى كونتسەنتراتورلارى – اۋرۋحاناعا اۋىر جاعدايدا تۇسكەن ناۋقاستار ءۇشىن وتە قاجەتتى قوندىرعىلار. پۋلسوكسيمەتر قۇرالى بولسا ناۋقاستىڭ قانى قۇرامىنداعى وتتەگى مولشەرىن انىقتاپ, ءدال دياگنوستيكا قويۋعا تاپتىرماس كومەكشى. ءدال قازىر ءبىزدىڭ وبلىستىق اۋرۋحاناداعى پروۆيزورلىق ستاتسيوناردا 148 ناۋقاس جاتىر. ولاردىڭ 80 پايىزى وتتەگى كونتسەنتراتورىنا قوسىلعان. ال 10-15 پايىزى وكپەنى جاساندى جەلدەتەتىن اپپاراتتىڭ كومەگىنە مۇقتاج. ايتا كەتەتىن ءجايت, ناۋقاستاردىڭ كوبى ۇيدە ەمدەلىپ, 10-12 كۇن ۋاقىت وتكىزىپ, اۋرۋدى اسقىندىرىپ ءبارىبىر بىزگە كەلەدى. وسى جەردە عانا ناقتى دياگنوزى انىقتالىپ, كاسىبي مەديتسينالىق جاردەم الادى", دەيدى وبلىستىق كوپبەيىندى اۋرۋحانا ديرەكتورى.
مەديتسينالىق جابدىقتار رەسەي فەدەراتسياسىنان اكەلىنگەن. كورشى مەملەكەتپەن اراداعى كەلىسىمدەرگە سايكەس, قاجەتتى قۇرالدار جەڭىلدىكپەن, جەدەل جەتكىزىلۋدە.
– ەلدە وسىنداي قيىن جاعداي بولىپ جاتقاندا ءبىز, كاسىپكەرلەر, قاراپ قارا المادىق. ءبىز ەلمەن بىرگەمىز. "بار بولساڭ, ەلگە پايداڭ ءتيسىن" دەگەن اتالى ءسوزدى ەسكەرىپ, ءوز الىمىزشە ازدى-كوپتى قاراجات ءبولىپ, ىندەتكە قارسى كۇرەستە كەرەكتى قۇرال-جابدىقتاردى جەتكىزىپ جاتىرمىز. وسى باستاما وزگە ارىپتەستەرىمىزگە دە ۇلگى بولسا دەيمىز. ىندەتتى بىرگە ەڭسەرەيىك! – دەيدى كاسىپكەرلەر اتىنان ءسوز العان ديدار اسەتوۆ.
باتىس قازاقستان وبلىستىق ىشكى ساياسات باسقارماسى باسشىسىنىڭ ورىنباسارى دارحان قانىبەك ۇلىنىڭ ايتۋىنشا, باتىس قازاقستان وبلىسى بويىنشا "اقجايىق" قورىنا وسى كەزگە دەيىن وبلىس كاسىپكەرلەرىنەن 100 ملن تەڭگەنىڭ ۇستىندە قاراجات اۋدارىلعان. مۇنىڭ ءبارى ورتالىقتاندىرىلعان ساتىپ الۋ جۇيەسى بويىنشا كوروناۆيرۋس ىندەتىمەن كۇرەسكە قاجەتتى ءدارى-دارمەك پەن جابدىقتار الۋعا جۇمسالۋدا. جاقىندا عانا 160 وتتەگى كونتسەنتراتورى ماسكەۋ قالاسىنان ورالعا جەتكىزىلىپ, ءتيىستى ەمدەۋ مەكەمەلەرىنە تاراتىلدى.
باتىس قازاقستان وبلىسى
