ەلوردا • 17 شىلدە، 2020

ەلوردانىڭ دەنساۋلىق ساقتاۋ مەكەمەلەرىندە 360-تان استام جاس مامان جۇمىسىن باستايدى

ەلوردانىڭ مەديتسينالىق وقۋ ورىندارىنىڭ 360-تان استام ستۋدەنتى COVID-19 ناۋقاستارى ەمدەلەتىن ەمحانالاردا جۇمىس ىستەي باستايدى. ولارعا ەلوردالىق دارىگەرلەرمەن بىردەي ەڭبەك جانە دەمالىس جاعدايى قاراستىرىلعان. بۇل تۋرالى قالا اكىمدىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

ايىم ءداۋىت

ەلوردانىڭ مەديتسينالىق مەكەمەلەرىنە 363 جاس مامان، ونىڭ ىشىندە 226 ينتەرن، 113 رەزيدەنت، 18 باكالاۆر، 5 ماگيسترانت جانە ءبىر دوكتورانتۋرا تۇلەگى جۇمىسقا ورنالاستىرىلدى. جاس ماماندار قالالىق اۋرۋحانالار، ەمحانالار، ديسپانسەرلەر مەن قالالىق جەدەل جاردەم ستانتسياسىنا جۇمىسقا ورنالاسادى.

قازىرگى ۋاقىتتا جاس مامانداردىڭ 43-ءى قالالىق جۇقپالى اۋرۋلار ورتالىعى مەن "رامادا پلازاداعى" پروۆيزورلىق ستاتسيوناردا ورتا جانە كىشى مەديتسينا قىزمەتكەرلەرى (مامان سەرتيفيكاتى جوق) رەتىندە جۇمىس جاساۋدا.

"مەن ەلوردالىق جاڭا جۇقپالى اۋرۋلار اۋرۋحاناسىندا مەيىربيكە بولىپ ىستەيمىن. ءبىزدىڭ دارىگەرلەردىڭ قاتتى كۇيزەلگەنىن كورىپ وتىرمىز. سوندىقتان، وسى قيىن كۇندەردە ءبىز جۇمىسقا شىعىپ، كوروناۆيرۋس ينفەكتسياسىمەن اۋىراتىن ناۋقاستارعا كومەكتەسۋدەمىز. ءبىز دارىگەرلەردىڭ باسشىلىعىمەن ءارتۇرلى پروتسەدۋرالىق تاپسىرمالاردى ورىندايمىز. ءبىز ءدارى تامىزعىش قويىپ، ەكپە جاساپ، ناۋقاستاردىڭ جاعدايىن قاداعالايمىز"، دەيدى جاس مامان جاندوس ناسىباەۆ.

سونىمەن قاتار نۇر-سۇلتاندا مەديتسينا ۋنيۆەرسيتەتى مەن كوللەدجىنىڭ 200-دەن استام تۇلەگى پاندەميا جاعدايىندا جۇمىس ىستەۋگە وقىتىلدى. دارىگەرلەر جاس ارىپتەستەرىمەن تاجىريبەلەرىمەن ءبولىستى. قازىرگى ۋاقىتتا ولاردىڭ بارلىعى جۇمىسقا الىنعان جانە COVID-19-بەن كۇرەسۋگە اتسالىسۋدا.

"بۇگىندە بارلىق مەديتسينا قىزمەتكەرى كوروناۆيرۋس ينفەكتسياسىمەن كۇرەستە الدىڭعى قاتاردا. جاس ماماندار، ستۋدەنتتەر دە شەتتە قالماي، ءبىزدىڭ دارىگەرلەرگە بەلسەندى كومەكتەسۋدە. تاجىريبەلىك ساباقتىڭ اياسىندا ولار كوروناۆيرۋس ينفەكتسياسىمەن اۋىراتىن ناۋقاستارعا كومەك كورسەتۋ ءۇشىن قالانىڭ مەديتسينالىق مەكەمەلەرىنە بارادى. جالپى، مەديتسينا ۋنيۆەرسيتەتى مەن كوللەدجىنىڭ 500-دەن استام تۇلەگى COVID-19-بەن كۇرەسۋگە اتسالىسادى"، دەدى نۇر-سۇلتان قالالىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءاليا رۇستەموۆا.

ءار مەديتسينا ۇيىمىندا جاس ماماندارعا كەڭەس بەرەتىن اعا مامان بار. بارلىق ماماندار قاجەتتى جەكە قورعانىس قۇرالدارىمەن قامتاماسىز ەتىلەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز