الەمدىك ەكونوميكا دامۋىنىڭ قازىرگى كەزەڭىندە شاعىن جانە ورتا بيزنەستى قولداۋ تۇراقتى جۇمىس ورىندارىن قۇرۋ مەن ەكونوميكا ءوسىمىنىڭ نەگىزى سانالادى. بۇل حالىقتىڭ ءال-اۋقاتىنىڭ كوتەرىلۋىنە مۋلتيپليكاتيۆتى اسەر ەتەتىنى بەلگىلى.
– COVID-19 پاندەمياسى كەزەڭىندە حالىققا كەسەل جۇقتىرۋدىڭ الدىن الۋ ءۇشىن كوپتەگەن جۇمىس ىستەلۋدە. سونىڭ ىشىندە قازاقستانداعى شوب سۋبەكتىلەرى ءۇشىن دە بىرقاتار شەكتەۋ شارالارى بەكىتىلگەنى كوپكە ايان. بۇگىندە ولاردى قولداۋ ماقساتىندا ۇكىمەت داعدارىسقا قارسى بىرقاتار شارالاردى ۇسىندى. شوب-تىڭ قارجىعا قول جەتكىزۋىن جەڭىلدەتۋ ماقساتىندا مەملەكەتتىك باعدارلامالاردىڭ شارتتارى وزگەرتىلدى, – دەدى ش.احمەتوۆ.
ونىڭ ايتۋىنشا, كاسىبىن ەندى باستاعان تۇلعالارعا دا ارنايى جەڭىلدىكتەر قاراستىرىلۋدا. بانكتەر نەسيە كۇنتىزبەسىن ۇزارتتى, ەندى سالىق بويىنشا دا كەدەرگىلەر بولمايدى.
ماسەلەن, 2020 جىلدىڭ ءبىرىنشى جارتىجىلدىعىندا «دامۋ» قورى نەسيە سوماسى 239 ملرد تەڭگە بولاتىن 6,8 مىڭ جوباعا قولداۋ كورسەتكەن. قولداۋدىڭ ەڭ قاجەتتى قۇرالدارىنىڭ ءبىرى – سىياقى مولشەرلەمەسىن سۋبسيديالاۋ. بۇل قۇرال بويىنشا كومەكتى كاسىپكەرلەر «بيزنەستىڭ جول كارتاسى-2025», «قاراپايىم زاتتار ەكونوميكاسى», بۇۇ دامۋ باعدارلاماسى مەن «نۇرلى جەر» باعدارلاماسى اياسىندا الا الادى. وسى كەزەڭدە جالپى سوماسى 3 ترلن تەڭگە بولاتىن 16 مىڭنان استام جوبا جۇزەگە اسقان.
ءباسپاسوز ءماسليحاتى بارىسىندا سپيكەرلەر كاسىپكەرلەردىڭ جۇمىسى ىلگەرىلەۋ ءۇشىن بارىنشا قولايلى جاعداي جاسالاتىنىن جەتكىزدى.
– «دامۋ» قورى توتەنشە جاعداي رەجىمى كەزىندە جانە كارانتين ەنگىزىلگەن ساتتەن باستاپ قازاقستاندىق بيزنەس ءۇشىن مەملەكەتتىك قولداۋ شارالارىن كورسەتۋدەن تىنبادى. 16 ناۋرىزدان باستاپ قور جالپى سوماسى 101 ملرد تەڭگە بولاتىن 1 294 جوباعا سۋبسيديا جانە كەپىلدىك بەردى, – دەدى ف.سارسەكەەۆ.
مۇنىمەن قاتار, داعدارىسقا قارسى شارالاردى ىسكە اسىرۋ اياسىندا جانە تج كەزىندەگى شەشىم قابىلداۋ پروتسەسىن وڭتايلاندىرۋ ماقساتىندا «دامۋ» قورى شوب نەسيەلەرىن قايتا قۇرىلىمداۋعا قاتىستى وزگەرىستەردى ماقۇلداۋدىڭ وڭايلاتىلعان تۇرىنە كوشىپ, جوبا قاراۋ مەرزىمىن 5-تەن 1 كۇنگە دەيىن قىسقارتقان. 16 ناۋرىزدان 25 مامىر ارالىعىندا قور جاڭا جوبالارمەن قاتار, جالپى سوماسى 467 ملرد تەڭگە بولاتىن 6 091 جوبانى قاراپ, قايتا قۇرىلىمداۋدى ۇسىنىپ وتىر.
كاسىپكەرلەردى قامتۋ اياسىن كەڭەيتۋ ءۇشىن «دامۋ» قورى «Al Hilal» بانكى مەن «قازاقستان يدجارا» كومپانياسىنا جالپى سوماسى 10,5 ملرد تەڭگە بولاتىن قاراجات سالۋعا كەلىسىم جاساعان. بۇل قارجى كاسىپكەرلەرگە «مۋراباحا» يسلام قارجىلاندىرۋ قاعيداتتارى شارتى بويىنشا بەرىلەدى.
