سوزىلمالى اۋرۋلارمەن اۋىرمايتىن 60 جاسقا دەيىنگىلەردىڭ ىندەت جۇقتىرعانى تەستپەن انىقتالىپ جاتسا, ۇيلەرىندە وقشاۋلانۋى ءتيىس. تۇنشىعۋ بەلگىلەرى بولماسا جەدەل-جاردەم قىزمەتىنە حابارلاسىپ, مازالاۋعا بولمايدى.
قارت قۇرلىقتا قان قىسىمىڭىز كوتەرىلىپ, دەنە قىزۋىڭىز 40-تان اسسا دا جەدەل-جاردەم كۇتپەڭىز. كەلمەيدى. سەبەبى, مۇنداي جەڭىل-جەلپى اۋرۋدان گورى بريگادا ورتكە ورانىپ, جول اپاتىنا ۇشىراعاندارعا, اسا اۋىر حالدەگىلەردى قۇتقارۋعا اسىعادى. ونىڭ ءوزى بىزدەگىدەي تەگىن ەمەس, اقىلى.
"ماسەلەن, مۇندا فەلدشەردى شاقىرۋ - 40 ەۋرو, ۇيىڭىزگە دارىگەر كەلسىن دەسەڭىز 100 ەۋرو, بىزشە 47 مىڭ تەڭگەدەي تولەۋىڭىز قاجەت. پاتەرىڭىزدەن 5 شاقىرىم جەردەگى اۋرۋحاناعا جەتكىزگەنىنە كەم دەگەندە تاعى 100 ەۋرو بەرەسىز. سودان بولار, ۇنەمشىل بەلگيالىقتار جەدەل-جاردەم قىزمەتىنە جۇگىنبەي, جاندارى قاتتى قينالىپ تۇرسا دا اۋرۋحاناعا وزدەرى جەتۋگە تىرىسادى. ەشقايسىسى ۇيلەرىندە ءوز بەتىنشە ەمدەلمەيدى. سەبەبى, ءدارىحانالاردا انتيبيوتيك بەيبەرەكەت ساتىلمايدى. بۇعان بەلگيادا جۇمىس بابىمەن ۋاقىتشا تۇرىپ جاتقان قازاقستاندىقتار دا بەيىمدەلگەندەرىن ايتادى, - دەيدى تەلەارنانىڭ وسى ەلدەگى مەنشىكتى ءتىلشىسى.
