3 ملرد تەڭگەنىڭ ءدارى-دارمەگى جەتكىزىلۋدە
ىندەت بەلەڭ العان ءبىراز مەملەكەتكە باستاپقىدا ەلىمىز گۋمانيتارلىق كومەك جىبەرىپ, قولداۋ كورسەتتى. ەندى بۇل جامانات دەرت وزىمىزدە ءورشي باستاعاندا شەكارا اسىپ بىزگە دە قاجەتتى دۇنيە جەتتى. اسىرەسە باۋىرلاس ەلدەردەن ءدارى-دارمەك تيەلگەن بورتتاردىڭ كەلىپ جاتقانى ۇلكەن كومەك بولدى. وسىعان قاتىستى جان-جاقتى ماعلۇماتقا ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا قانىقتىق.
دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا قازاقستانعا ءدارى-دارمەك تۇرىندەگى گۋمانيتارلىق كومەك شىلدە ايىنىڭ سوڭىنا دەيىن كورسەتىلەتىنىن اتاپ ءوتتى. ونىڭ ايتۋىنشا, ۇكىمەت امبۋلاتورلىق جەلىگە اسا قاجەتتى ءدارى-دارمەكتەردى جەتكىزۋ ءۇشىن بىرنەشە ۇشاق ۇيىمداستىردى. 21 اتاۋدان تۇراتىن ءتىزىم ءتۇزىلدى. بۇل – دەنە قىزۋىن تۇسىرەتىن, ۆيرۋسقا قارسى دارىلەر.
شىلدەنىڭ سوڭىنا دەيىن بىرقاتار رەيسپەن بولشەك ساۋدا جەلىسىن قامتاماسىز ەتۋ ءۇشىن ايلىق قاجەتتىلىككە جارايتىن ءدارى-دارمەكتەر جەتكىزۋ جونىندە كەلىسىم جاسالدى. وتكەن سەنبىدە رەسەيدەن ەكى بورت كەلدى. دارىلىك زاتتاردىڭ 3 ملن-نان اسا قورابى جەتكىزىلدى. بۇل دارىلەردىڭ ءبارى وڭىرلەر مەن ءۇش ءىرى قالا اراسىندا تەڭدەي ءبولىندى. ولاردى سەرتيفيكاتتاۋ ءراسىمى جەدەل جۇرگىزىلىپ, جەلىلەرگە تۇسە باستادى.
سونىمەن قاتار ءۇندىستاننان دا ارنايى رەيس ۇشىپ كەلەدى. بۇعان قوسا رەزەرۆ ءۇشىن تاعى ەكى بورتپەن قاجەتتى پرەپاراتتار اكەلىنەدى.
قازىرگى ۋاقىتتا بىرىڭعاي ديستريبيۋتور ارقىلى اۋرۋحانالارعا 3 ملرد تەڭگەگە جۋىق سومانى قۇرايتىن مەديتسينالىق ءدارى-دارمەكتەر تاسىمالدانىپ جاتىر. سونداي-اق ءۇش ايعا جەتەتىن رەزەرۆ قۇرۋ ءۇشىن وتاندىق وندىرۋشىلەردەن دە, يمپورتتاۋشىلاردان دا ءدارى-دارمەك ساتىپ الۋ راسىمدەرى جۇرگىزىلۋدە. الداعى ۋاقىتتا بىرىڭعاي ديستريبيۋتور ناۋقاستاردىڭ بولجامدى سانى بويىنشا جىل سوڭىنا دەيىن بارلىق اۋرۋحانالار ءدارى-دارمەكپەن قامتىلۋى ءۇشىن قويمالاردى تولتىرادى.
بۇگىندە بىرىڭعاي ديستريبيۋتوردىڭ ساتىپ الۋى اياسىندا وتاندىق وندىرۋشىلەردەن 59,8 ملرد تەڭگە سوماسىنا جانە يمپورتتىق وندىرۋشىلەردەن 154,3 ملرد تەڭگە سوماسىنا ءدارى-دارمەك ساتىپ الىندى. بارلىق پرەپاراتتار كەپىلدى تەگىن مەديتسينالىق كومەك كورسەتەتىن ستاتسيونارلار مەن ەمحانالارعا جەتكىزىلەدى.
15 مەملەكەتتەن گۋمانيتارلىق كومەك كەلدى
ءباسپاسوز ءماسليحاتىنا قاتىسقان سىرتقى ىستەر ءمينيسترىنىڭ ورىنباسارى ەرجان اشىقباەۆ قانشا مەملەكەتتەن قانداي كولەمدە كومەك كەلگەنى تۋرالى ەگجەي-تەگجەيلى ايتىپ بەردى.
«سىرتقى ىستەر مينيسترلىگى دەنساۋلىق ساقتاۋ مينيسترلىگىمەن بىرلەسىپ, ىندەت تاراعان كەزدەن باستاپ سىرتقى حالىقارالىق ارىپتەستەرىمىزدەن ءتيىستى قايىرىمدىلىق كومەكتى ەلگە جەتكىزۋ جۇمىستارىن جۇرگىزىپ كەلەدى. بۇل جۇمىس وتە اۋقىمدى. ارينە وسى ورايدا ەڭ الدىمەن ارىپتەستەرىمىز – قحر, اقش, رەسەي, ءباا, جاپونيا, تۇركيا, وڭتۇستىك كورەيا, قاتار, وزبەكستان جانە باسقا دا ەلدەرگە, ددۇ سياقتى حالىقارالىق ۇيىمدارعا, كومپانيالارعا, شەتەلدىك قايىرىمدىلىق قورلارىنا, جەكەلەگەن ازاماتتارعا كورسەتكەن قولداۋى ءۇشىن شىنايى ريزاشىلىعىمىزدى جەتكىزگىم كەلەدى. بىرىنشىدەن, ىندەت جاھاندىق بولعاننان كەيىن ءبىز جۇمىسىمىزدى, ياعني ءدارى-دارمەك ساتىپ الۋ نەمەسە شەتەلدەن قاجەتتى مەديتسينالىق قۇرىلعىلاردى, زاتتاردى اكەلۋ ماسەلەسىن دۇنيە جۇزىندەگى ۇلكەن باسەكەلەستىك جاعدايىندا ىسكە اسىرىپ جاتىرمىز. مۇنى ەسكەرگەن ءجون. ەكىنشىدەن, گۋمانيتارلىق كومەك قانشالىقتى اۋقىمدى بولسا دا, الدىمەن ەڭ ۇلكەن جۇك ۇكىمەتىمىزگە, رەسپۋبليكالىق بيۋدجەتكە ءتۇسىپ وتىر. دەنساۋلىق ساقتاۋ مينيسترلىگىنە, دەنساۋلىق ساقتاۋ جۇيەسىندەگى ارىپتەستەرىمىزگە زور جاۋاپكەرشىلىك ارتىلىپ وتىرعانى انىق», دەدى ەرجان اشىقباەۆ.
ءسىم وكىلىنىڭ دەرەگى بويىنشا ەلىمىزگە گۋمانيتارلىق كومەك رەتىندە
5 ملن 200 مىڭعا جۋىق مەديتسينالىق ماسكا, 98 وكپەنى جاساندى جەلدەتۋ اپپاراتى, 260 مىڭ تەست جۇيەسى, 3 مىڭعا جۋىق تەپلوۆيزور مەن تەرمومەتر اكەلىندى.
«گۋمانيتارلىق كومەك رەتىندە ءدارى-دارمەكتى ءبىز جالپى سانى جەتى تاراپتان العان ەدىك. ولار – ءۇندىستان, پاكىستان, رەسەي, جاپونيا جانە تۇركيا, سونداي-اق تۇركيالىق ەكى كومپانيا. وسى ءدارى-دارمەكتىڭ ىشىندە ەڭ ەلەۋلى ۇلەس – گيدروكسيحلوريد ءدارىسىنىڭ 90 مىڭ داناسى, حلوروحين ءدارىسىنىڭ 100 مىڭ داناسى, اۆيگاننىڭ 10 200 داناسى, اتسەتيلتسيستەيننىڭ 10 200 داناسى جانە پلاكۆەنيلدىڭ 10 مىڭ داناسى. قالعان پرەپاراتتار 100, 150, 300, 500, 1500 دانادان كەلگەن. ءدارى-دارمەككە رۇقسات قاعازى الىنعاننان كەيىن قويمادا جاتىپ قالعان ەمەس. ءتيىستى مەكەمەلەرگە تاراتىلدى. وسى رەتتە قاتاردان كەلگەن جۇكتىڭ ىشىندە ءدارى-دارمەك بولماعانىن ايتا كەتەيىن. سوندىقتان ەكى نارسەنى شاتاستىرمايىق. كەلگەن ءدارى-دارمەكتىڭ ءبارى دە بىردەن ورتاق ديستريبيۋتور ارقىلى مەديتسينالىق مەكەمەلەرگە جەتكىزىلىپ تۇرادى», دەدى ەرجان اشىقباەۆ.
وكپەنى جاساندى جەلدەتۋ اپپاراتى شىعارىلادى
قىسىلتاياڭ كەزەڭدە مەملەكەتتەردىڭ ءبىر-بىرىنە قولعابىس ەتكەنى – قۇپتارلىق ءىس. بىراق الەۋمەتتىك جەلىلەردە ءبىراز جۇرت ءوزىمىزدى جارىلقاماي تۇرىپ, قازاقستاننىڭ تاجىكستانعا گۋمانيتارلىق كومەك جونەلتەتىنىنە قىنجىلىس ءبىلدىردى. سۇراق-جاۋاپ بارىسىندا جۋرناليستەر وسىنىڭ انىق-قانىعىن سۇراپ, دەنساۋلىق ساقتاۋ ۆيتسە-ءمينيسترى بۇل كومەكتىڭ قاراستىرىلعانىن راستادى.
«قازىرگى ۋاقىتتا بارلىق ەل ءبىر-بىرىنە كومەك كورسەتۋدە. ەلىمىزگە دە گۋمانيتارلىق كومەكتەر كەلىپ جاتىر. قازاقستان ۇكىمەتى تاجىكستانعا جىلدىڭ سوڭىنا قاراي ءپورتاتيۆتى وكپەنى جاساندى جەلدەتۋ اپپاراتى تۇرىندەگى گۋمانيتارلىق كومەك كورسەتۋ تۋرالى ماسەلەنى قاراستىرىپ جاتقانى راس. بۇل ءپورتاتيۆتى اپپارات پاتسيەنتتى جەدەل جاردەم كولىگىمەن تاسىمالداعاندا قولدانىلادى. ءدال وسىنداي اپپارات ەلىمىزدە جەتكىلىكتى, اقمولا وبلىسىندا شىعارىلادى. بۇگىندە ءوزىمىزدىڭ زاۋىت وندىرىستىك قۋاتىن ارتتىرىپ وتىر. كاسىپورىن تۇركيالىق كومپانيامەن بىرگە ءپورتاتيۆتى وكپەنى جاساندى جەلدەتۋ اپپاراتىنان بولەك قازىر اسا قاجەت بولىپ وتىرعان ستاتسيونارلىق وكپەنى جاساندى جەلدەتۋ اپپاراتىن شىعارۋدى جوسپارلاۋدا. ءوندىرىس تاياۋ ارالىقتا جولعا قويىلادى جانە جىلدىڭ سوڭىنا دەيىن ەلىمىزدىڭ بارلىق اۋرۋحانالارى ءپورتاتيۆتى جانە ستاتسيونارلىق وكپەنى جاساندى جەلدەتۋ اپپاراتتارمەن قامتاماسىز ەتىلەدى», دەدى ليۋدميلا بيۋرابەكوۆا.
فلەشموبقا مينيسترلىك كىنالى ەمەس
سونىمەن قاتار دەنساۋلىق ساقتاۋ مينيسترلىگىنىڭ وكىلى قوعامدا داۋ تۋعىزعان تاعى باسقا دا ماسەلەلەر بويىنشا جاۋاپ بەردى. سونىڭ ءبىرى ىندەتتەن كوز جۇمعانداردى ەسكە الۋعا ارنالعان ازا تۇتۋ كۇنىندە دارىگەرلەردىڭ كوشەگە شىعىپ, قاتارعا تۇرعانى تۋرالى بولدى. ليۋدميلا بيۋرابەكوۆا مۇنداي فلەشموبقا مينيسترلىك باستاماشى بولماعانىن, بۇل مەديتسينا قىزمەتكەرلەرى قاۋىمداستىعى تاراپىنان ۇيىمداستىرىلعانىن اتاپ ءوتتى.
بۇعان قوسا جۋرناليستەر پنەۆمونيانىڭ نەلىكتەن كوروناۆيرۋس ستاتيستيكاسىندا ەسەپكە الىنباي جاتقانىن سۇرادى.
ء«بىز قازىر حالىقارالىق ۇيىمدارمەن, دۇنيەجۇزىلىك دەنساۋلىق ساقتاۋ ۇيىمىمەن كەلىسسوز جۇرگىزىپ جاتىرمىز. بۇگىنگى تاڭدا ددۇ ۇسىنىمىنا سايكەس, ستاتيستيكاعا پتر-ءدىڭ وڭ ناتيجەسى بار جاعدايلار عانا كىرىپ وتىر. سونداي-اق ەلىمىزدىڭ دەنساۋلىق ساقتاۋ مينيسترلىگى ءدال وسى ماسەلەگە بايلانىستى دۇنيەجۇزىلىك دەنساۋلىق ساقتاۋ ۇيىمىنا سۇرانىس جىبەردى. كەلىسسوزدەر ارقىلى ەسەپكە الىنۋى ءتيىس مالىمەتتەرگە قاتىستى ورتاق شەشىمگە كەلەمىز. ءاربىر ەلدىڭ ستاتيستيكا مەن ەسەپكە الۋعا قاتىستى ءوز جولى بار. ءبىز سونى بىرىزدەندىرىپ, بارلىق ەلمەن قاتار جۇرگىمىز كەلەدى», دەدى ۆيتسە-مينيستر.
