الەم • 14 شىلدە، 2020

قازاقستان نيۋ-يوركتەگى قارجىگەردى سوتقا بەردى

49 رەت كورسەتىلدى

قازاقستان رەسپۋبليكاسى نيۋ-يوركتىك قارجىگەر دانيەل چەپمەندى جانە ونىمەن بايلانىستى قارجى كومپانيالارىن كەڭ اۋقىمدى الاياقتىقتى جۇزەگە اسىرۋ ماقساتىندا ءسوز بايلاستى دەپ ايىپتاپ، ولارعا قارسى قۇقىقتىق قۋدالاۋ باستادى. قازىرگى تاڭدا، قازاقستاننىڭ نيۋ-يورك شتاتىنىڭ جوعارعى سوتىنا بەرىلگەن شاعىمى قاراستىرىلۋدا. بۇل تۋرالى ادىلەت مينيسترلىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

ەكى مولداۆاندىق وليگارح اناتول ءستاتيدىڭ جانە ونىڭ ۇلى گابريەل ءستاتيدىڭ ("ستاتي") قازاقستانداعى كومپانيالارىندا دانيەل چەپمەن جانە ونىڭ ينۆەستيتسيالىق كومپانيالارى باستى ينۆەستورلار بولدى.

شاعىمعا سايكەس، ستاتي قازاقستاندىق كومپانيالاردىڭ شىعىندارىن ۇلكەيتۋ ارقىلى ولاردى جۇيەلى تۇردە اكتيۆتەردەن ايىرىپ، ءوزىنىڭ حالىقارالىق ينۆەستورلارىنان قاراجات جىمقىردى. ستاتي الاياقتىقتى ىسكە اسىرۋ ءۇشىن جالعان قارجىلىق ەسەپتىلىكتى جاسادى. سودان كەيىن بۇل ەسەپتىلىكتىڭ شىنايىلىعىن مالىمدەيتىن اۋديتورلىق ەسەپتەردى الۋ ءۇشىن ءوزىنىڭ اۋديتورلارى KPMG-گە وتىرىك ايتتى.

سونىمەن قاتار، ءستاتيدىڭ كومپانيالارىنا ينۆەستيتسيا قۇيعان ينۆەستورلاردىڭ اراسىندا Deutsche Bank، Goldman Sachs جانە Standard Chartered Bank سياقتى ۇيىمدار بولدى. ينۆەستيتسيالار بويىنشا سەنىمدى باسقارۋشى Wells Fargo Bank بولدى.

قازاقستان دانيەل چەپمەن شامامەن 2012 جىلى ستاتي الاياقتىعى تۋرالى ءبىلدى، بىراق ءتيىستى شارالار قولدانۋدىڭ ورنىنا، ول ۇرلانعان اقشانى قازاقستانعا قارسى تورەلىك جانە سوت پروتسەستەرى ارقىلى قايتارۋ ءۇشىن مولداۆاندىق بيزنەسمەندەرمەن زاڭسىز كەلىسىمگە كەلدى دەپ مالىمدەيدى.

شاعىمدا "چەپمەن جانە ونىڭ كومپانيالارى قارجى پيراميداسىن جۇزەگە اسىرۋعا قوسىلعان جابىرلەنۋشىلەر سياقتى ارەكەت ەتتى. جابىرلەنۋشىلەر ءستاتيدىڭ قىلمىستىق سحەماسىن بۇزۋدىڭ ورنىنا، ولار ءوزىنىڭ ۇرلانعان اقشاسىن جاڭا جابىرلەنۋشىدەن [قازاقستاننان] الۋ ءۇشىن الاياقتىق سحەمانى قولداۋعا شەشىپ، ۇرلانعان اقشاسىن قىلمىسكەرلەردەن زاڭدى تۇردە قايتارۋعا تىرىسقان جوق"، دەپ ايتىلعان.

وتكەن جىلى KPMG بۇرمالانعان قارجىلىق ەسەپتىلىكتەرى بويىنشا ستاتيگە بەرىلگەن ءوزىنىڭ بارلىق اۋديتورلىق ەسەپتەرىن قايتارىپ الۋىن ستاتيگە ەلەۋلى سوققى رەتىندە قاراستىرۋعا بولادى. KPMG بۇل ەسەپتەرگە "سەنىم ارتۋعا بولمايدى" دەپ مالىمدەدى، سەبەبى ستاتي KPMG-دەگى ءوزىنىڭ اۋديتورلارىنا بىرنەشە رەت وتىرىك ايتقانىن دالەلدەيتىن جاڭا دالەلدەرگە كوز جەتكىزدى.

نيۋ-يوركتەگى سوتتا قازاقستان كەلتىرىلگەن شىعىنداردىڭ ورنىن تولتىرۋ تۋرالى تالاپتار قويىپ، وسى ءىس القابيلەر سوتىنىڭ قاتىسۋىمەن قارالۋى تۋرالى ءوتىنىش بەردى.

قازاقستان رەسپۋبليكاسىنىڭ ادىلەت ءمينيسترى مارات بەكەتاەۆ:

"جابىرلەنۋشىلەر جوعالعان ينۆەستيتسيالاردى قايتارۋدىڭ باسقا تاسىلدەرىن تابۋدىڭ ورنىنا ولاردى الداعان قىلمىسكەرلەرگە قارجىلاي قولداۋ كورسەتۋى تاڭعالارلىق جايت بولىپ تابىلادى. الايدا، دانيەل چەپمەن جانە ونىڭ كومپانيالارى ستاتيمەن قازاقستانعا قارسى بىرىگىپ، ستراتەگيالىق قاتەگە جول بەردى. چەپمەن قازاقستانعا قارسى ءستاتيدىڭ تورەلىك تالقىلاۋى جانە سوت پروتسەستەرى الاياقتىققا نەگىزدەلگەنىن بىلە تۇرا، پروتسەستەردى قولداۋدى ءجون كوردى. ءبىز نيۋ-يوركتەگى سوتقا جانە القابيلەرگە بارلىق دالەلدەردى ۇسىنۋعا دايىنبىز. ءبىز ادىلەتتىلىك اقىرى جەڭەتىنىنە سەنىمدىمىز".

سوڭعى جاڭالىقتار

ۇقساس جاڭالىقتار