ايماقتار • 13 شىلدە، 2020

باتىس قازاقستاندا ىندەت قۇرباندارىن ازا تۇتتى

141 رەت كورسەتىلدى

مەملەكەت باسشىسىنىڭ جارلىعىنا سايكەس ۇلتتىق ازا تۇتۋ كۇنى باتىس قازاقستان وبلىسىندا دا بىرنەشە شارامەن اتالىپ ءوتتى دەپ حابارلايدى Egemen.kz.

تۇڭعىش پرەزيدەنت الاڭىنداعى مەملەكەتتىك تۋ تۇعىرىندا، وبلىستىق پەريناتالدىق ورتالىق جانە وبلىستىق اكىمدىك عيماراتى الدىندا وتكەن شارادا جينالعان ءوڭىر باسشىلارى، جۇرگىنشىلەر جانە دارىگەرلەر covid-19 قۇرباندارىن جانە وسى ىندەتپەن كۇرەستە قازا تاپقان ارىپتەستەرىن ءبىر مينۋت ءۇنسىز تۇرىپ ەسكە الدى.

0

نۇر-سۇلتان ۋاقىتىمەن ءدال 12 ساعاتتى سوققان ساتتە باتىس قازاقستان وبلىسىنىڭ اكىمى عالي ەسقاليەۆ، وبلىستىق ءماسليحات حاتشىسى مالىك قۇلشار، وبلىس اكىمىنىڭ ورىنباسارلارى ورال قالاسىنداعى اباي الاڭىنا قارسى تۇستا قاۋىپسىز اراقاشىقتىقتى ساقتاپ تۇرىپ، ىندەت قۇرباندارىن ەسكە الدى.

- بۇگىن بۇكىل ەلىمىز ازا تۇتىپ جاتىر. قاتەرلى اۋرۋدان قازا تاپقان وتانداستارىمىزدى قايعىرا ەسكە الامىز. ارينە، وسىنداي بەيبىت كەزدە ەلدىڭ بەرەكەسىن العان پاندەميا تالاي ازاماتىمىزدى ارامىزدان ج ۇلىپ كەتكەنى كوڭىلىمىزگە قاياۋ تۇسىرەدى. مارقۇمداردىڭ قازاسىنىڭ ارتى قايىرلى بولسىن دەيمىز. ءبىزدىڭ ەندىگى باستى مىندەتىمىز – قازىر اۋىرىپ جاتقان قازاقستاندىقتاردىڭ جازىلۋىنا جۇمىلىپ، ءدارى-دارمەكپەن، مەديتسينالىق قۇرالدارمەن جابدىقتاپ، مەملەكەتتىك دەڭگەيدە كومەك كورسەتۋ. ۆيرۋس جۇقتىرعان وتانداستارىمىز، اسىرەسە وسى ىندەتپەن كۇرەستە العى شەپتە جۇرگەن ءبىزدىڭ دارىگەرلەرىمىز تەزىرەك جازىلىپ كەتۋىن تىلەيمىز، - دەدى وبلىستىق ءماسليحات حاتشىسى مالىك يمانقۇل ۇلى.

11

بۇل كۇنى قازاقستان مۇسىلماندارى ءدىني باسقارماسى باتىس قازاقستان وبلىسى بويىنشا وكىلدىگى وبلىستىق ورتالىق مەشىتتە "قۇران-حاتىم" ءتۇسىرىپ، ساۋابىن ەلىمىزدە ىندەت سالدارىنان مارقۇم بولعان قانداستارىمىزدىڭ رۋحىنا باعىشتادى. وسىنداي شارا جەرگىلىكتى پراۆوسلاۆ شىركەۋىندە دە ءوتتى.

باتىس قازاقستان وبلىستىق پەريناتالدىق ورتالىق الدىندا ءۇنسىز شەرۋ جاساعان دارىگەرلەر جاقىندا عانا ومىردەن وتكەن ورتالىق باسشىسى، جوعارى دارەجەلى دارىگەر، ەلىمىزدىڭ دەنساۋلىق ساقتاۋ سالاسى ۇزدىگى نيكولاي دميتريەنكونىڭ سۋرەتىن ۇستاپ تۇردى.

2

نيكولاي بوريس ۇلى سانالى عۇمىرىن دەنساۋلىق ساقتاۋ سالاسىنا، ادامداردى اۋرۋدان ەمدەپ، اجالدان قۇتقارۋعا ارناعان ايتۋلى مامان ەدى. 1976 جىلى اقتوبە مەديتسينالىق ينستيتۋتىن ءبىتىرىپ، ەڭبەككە ارالاسقاننان بەرى ورال قالاسىنداعى پەرزەنتحانالاردا ەڭبەك ەتكەن. 44 جىل ءومىرىن دەنساۋلىق ساقتاۋ سالاسىنا ارناعان دارىگەر سوڭعى 15 جىلدان بەرى باتىس قازاقستان وبلىستىق پەريناتالدىق ورتالىعىن باسقارىپ، دەنساۋلىعىندا اقاۋى بار جۇكتى كەلىنشەكتەر مەن سابيلەردىڭ ءومىرىن قۇتقارۋمەن اينالىستى. ارىپتەستەرى نيكولاي دميتريەنكونى بىلىكتى مامان، شەبەر ۇيىمداستىرۋشى، ءادىل باسشى رەتىندە جاقسى كورەتىن.

وسىنداي شارا باتىس قازاقستان وبلىستىق جەدەل مەديتسينالىق جاردەم ستانساسىنىڭ الدىندا دا ءوتتى.

رەسمي دەرەك بويىنشا covid-19 پاندەمياسىنان باتىس قازاقستان وبلىسىندا 22 ادام قايتىس بولعان. ال ىندەت باستالعالى وڭىردە 3086 ادام جازىلىپ، قاتارعا قوسىلعان.

 باتىس قازاقستان

سوڭعى جاڭالىقتار

ۇقساس جاڭالىقتار