ۇستىمىزدەگى جىلعى 5 قازاندا ماسكەۋدە الەكساندر پوۆەتكين مەن ۆلاديمير كليچكو اراسىنداعى ماتچتىڭ اندەركارتى, ياعني قوسىمشاسى رەتىندە وتكىزىلگەن راۆا بەلبەۋى ءۇشىن اۋىر سالماقتا رۋسلان چاگاەۆ پەن سەرب يوۆو پۋداردىڭ تالاسىندا بۇلاردىڭ الدىڭعىسى جەڭىسكە جەتكەن بولاتىن. مىنە, سول ۇتىپ العان بەلبەۋىن بوكسشى شەشەنستاننىڭ پرەزيدەنتى رامزان كادىروۆقا سىيلادى. بۇل تۋرالى piter.tv سايتى حابارلادى.
وسى ۇرىستا رۋسلان قارسىلاسىن 117-109, 115-111 جانە 118-108 دەگەن ەسەپتەرمەن تىزە بۇكتىردى. ول يوۆو پۋداردى ەكىنشى جانە سەگىزىنشى راۋندتاردا نوكداۋنعا ءتۇسىردى. ءوزىنىڭ كاسىپقويلار رينگىندەگى 32-ءشى جەڭىسىنە جەتكەن بوكسشى قزىر شەشەن رەسپۋبليكاسىنىڭ ءبىرىنشى پرەزيدەنتى احمات-حادجى كادىروۆتىڭ قۇرمەتىنە قويىلعان «كادىر» سپورت كلۋبىنىڭ تۋى استىندا ونەر كورسەتەدى.
شەشەنستاننىڭ وازىرگى پرەزيدەنتى, احمات-قاجىنىڭ بالاسى رامزان كادىروۆ ءوزىنىڭ الەۋمەتتىك جەلىسىنە سول كەزدەرى بىلاي دەپ جازىپتى:
«اسسالامۋ الايكۋ, دوستار! جەر دەگەن شەكتەۋلى عوي, اقيقات سوسىن قاشاندا جانىڭا جاقىن جۇرەدى. بوكسشى رۋسلان چاگاەۆ جەڭىسكە جەتە باستاعاندا, ونى بىرەۋلەر وزبەك دەدى, بىرەۋلەر تاتار دەدى, تاعى باسقالارىن ايتتى. بىراق ول شىن مانىندە شەشەن بولىپ شىقتى! ءيا, تاپ سولاي, ول – شەشەن! ءبىزدىڭ تاريحشىلارىمىز بەن مۇراعات قىزمەتكەرلەرى ونىڭ اتا-بابالارىنىڭ شەجىرەسى جونىندە جان-جاقتى دەرەكتەر تاپتى. بىزگە وسىنداي لايىقتى ادامنىڭ, ناعىز ەركەكتىڭ جانە تازا مۇسىلماننىڭ شەشەن بولعانى سۇمدىق جاقتى, ونى بۇل جاڭالىقتى بىلگەنگە دەيىن دە قاتتى قۇرمەتتەپ كەلگەنىمىزگە قاراماستان. ءبىز ەندى جەرىمىزگە قوش كەلدىڭ, رۋسلان, دەيمىز».
رۋسلان چاگاەۆ:
«مەن احمات-قاجى قادىروۆتىڭ اتىنداعى كلۋبتىڭ اتىنان سايىسقا تۇسەتىن بولعاندىقتان, ونى ۇياتقا قالدىرماۋىم كەرەك. مەن سوندىقتان دايىندىق تۇسىندا دا, ۇرىس كەزىندە دە وسى كلۋبتىڭ اتىن شىعارۋعا بارىمدى سالدىم».
«گروزنىي» تەلەارناسى حابارلاعانداي, رۋسلان چاگاەۆ جەڭىستى جەكپە-جەگىنەن كەيىن شەشەنستانعا ۇشىپ كەلگەن, ونى اۋەجايدا رەسپۋبليكا باسشىسى رامزان كادىروۆتىڭ ءوزى كۇتىپ العان. قۇرمەت كورسەتۋ ەسەبىندە بوكسشى ءوزىنىڭ سوڭعى العان بەلبەۋىن شەشەن رەسپۋبليكاسىنىڭ باسشىسىنا سىيلاعان.
رۋسلان چاگاەۆ:
«رامزان, باۋىرىم, تاعى دا ۇلكەن راحمەت. بۇل بەلبەۋ ادىلىندە ساعان تيەسىلى. بۇل ءبىرىنشى دارەجە. الدا ءالى باستىسى بولادى, مەن ونى جەڭىپ العاندا الەم چەمپيونى اتانامىن. وسىنىڭ ءبارى سەنىڭ ارقاڭدا. سەنى ماعان سەنىم ۇيالاتتىڭ, كۇش بەردىڭ, اللانىڭ ارقاسىندا ەندى ساعان دا, ماعان دا جاقسى بولىپ تۇر. راحمەت ساعان».
رامزان كادىروۆ:
«سەنىڭ بۇل ۇرىستى ۇتقانىڭا مەن شىنىندا قۋانىشتىمىن. بۇدان دا ىلگەرى ءجۇرۋ ءۇشىن جانە باسپالداقپەن جوعارى كوتەرىلۋ ءۇشىن بۇل بىزگە كەرەك ەدى. مەن وزىڭمەن ءبىرىنشى كەزدەسكەندە-اق وزىڭە تابىنۋشى ەكەنىمدى ايتقانمىن. مەن رۋسلان چاگاەۆتىڭ قايتىپ ورالىپ, بۇكىل الەمگە ءوزىنىڭ چەمپيون بولعانىن كورسەتۋىن قالادىم. مۇنىڭ بارىنە جاراتقاننىڭ قالاۋىمەن, ءوز كۇشىڭمەن جەتتىڭ. ءالى دە جەتە بەرەسىڭ! مەن ءبىز سەنىمەن بىرگە جاقىن ارالىقتا گروزنىيدا كەرەمەت جاقسى ۇرىس وتكىزدىرەمىز دەپ ويلايمىن. سەنى كۇتەتىن تەك وزبەكستان مەن شەشەن رەسپۋبليكاسى عانا ەمەس, سونىمەن قاتار رەسەيدە دە, بۇكىل الەمدە دە سەن كەرەكسىڭ! تاعى دا قۇتتىقتايمىن! سەنىڭ چەمپيون بولاتىنىڭا سەنىمدىمىن!»
