فۋتبولشى اندرەي ءارشاۆيننىڭ كەيىن دەرەگى بىلىنگەن داريا ەسىمدى جاڭا قۇربىسىنىڭ سانكت-پەتەربۋرگتەگى ءبىر جول-كولىك وقيعاسىنا قاتىستى تاعى دا اتى شىعىپ جاتىر. بۇل تۋرالى «فونتانكا.رۋ» سايتى حابارلادى.
نەگىزىنەن كولىكتەردىڭ سوقتىعىسىنا وسى ايەل كىنالى سياقتى. بىراق ول وقيعانىڭ باسقا قاتىسۋشىلارىمەن ءبىراز داۋلاسقانعا ۇقسايدى. ونىمەن قويماي, تانىمال فۋتبولشىنىڭ قۇربىسى دەگەن مارتەبەسىن دە اجەپتاۋىر بۇلداعان سىڭايلى.
وقىرماننىڭ ەسىندە بولار, ءبىز وسىدان بىرنەشە كۇن بۇرىن ازەربايجاندا تارايتىن اقپارات اگەنتتىكتەرى ارقىلى بىلگەن دەرەگىمىز بويىنشا, ا.ءارشاۆيننىڭ ءبىر ازەربايجان قىزىمەن اۋەيى بولىپ جۇرگەنى تۋرالى حابار ۇسىنعانبىز. شىنى كەرەك, ول كەزدە بۇل بويجەتكەننىڭ اتى-ءجونىن ءوزىمىز دە بىلە بەرمەيتىن ەدىك. ال ەندى ءبىلىپ وتىرمىز. جوعارىدا باياندالعان جول-كولىك وقيعاسى جايلى اقپاردى اقتارىپ وتىرىپ, ونىڭ ەسىمى داريا ەكەنىنە كوز جەتكىزدىك. جانە ول ەشقانداي دا بويجەتكەن ەمەس, ەكى بالا تاپقان ايەل بولىپ شىقتى.
ا.ارشاۆين سونىڭ الدىندا عانا ۇزىن بويلى, قارا شاشتى سۇلۋمەن پيتەردە وتكەن فەدور بوندارچۋكتىڭ «ستالينگراد» اتتى ءفيلمىنىڭ تۇساۋكەسەرىنە بارادى. فۋتبولشى «زەنيتتىڭ» رەسمي بەينە بەتتەرىندە جاڭا كانيزاگىمەن بىرگە كورىنە قويماعانىمەن, ولار وزدەرىن سۋرەتكە ءتۇسىرىپ جاتقان فوتوگرافتان جاسىرىنا قويمايدى. كەيىن جۋرناليستەر فۋتبولشىنىڭ جاڭا اۋەيىسىنىڭ جاسى 35-تە ەكەنىن, سپورت ءجۋرناليسى بولىپ ىستەيتىنىن, كۇيەۋىمەن اجىراسقانىن, ەكى بالا تاربيەلەپ جاتقانىن ءبىلىپ الادى.
ينتەرنەت جەلىسىنە سالىنعان سۋرەتتەرگە قاراعاندا, اندرەي مەن داريا كوپتەن بەرى ءبىر-بىرىمەن قاتىسىپ جۇرگەن سياقتى. راس, بۇل ەكەۋىنىڭ باسكەتبول ماتچىن كورىپ وتىرعان كەزىندە باسىلىپ الىنعان سۋرەتتەرى بيىلعى مامىردا تۇسىرىلگەن. الايدا, بۇلاردىڭ ونىڭ ارعى جاعىندا ءبىراز بۇرىن ارالاسىپ كەتكەنى بايقالادى. بۇل تانىستىق اندرەيدىڭ لوندون «ارسەنالىنا» كەتۋىنەن دە بۇرىن باستالعان ءتارىزدى. ولاي بولسا, 32 جاسار فۋتبولشىنى ازاماتتىق نەكەدەگى ايەلىنەن الىپ كەتكەن دە وسى بولۋى ابدەن ىقتيمال.
ال ارشاۆين وزىمەن 9 جىل بىرگە تۇرىپ, ءۇش بالا تۋىپ بەرگەن جۇبايى يۋليادان بۇدان شامالى عانا بۇرىن كەتىپ قالعان بولاتىن.
ساكەن مايلىباي.
