جوبالىق كەڭسە ازاماتتاردان كەلىپ تۇسكەن تەمىر جول كولىگى سالاسىنداعى پروبلەمالىق ماسەلەلەردى زەردەلەۋ كەزىندە بارلىق توپتاعى مۇگەدەك جاندار ءۇشىن ونلاين رەجيمدە جەڭىلدەتىلگەن ت/ج بيلەتتەرىن ساتىپ الۋ مۇمكىندىگى جوق ەكەنىن انىقتادى.
مۇمكىندىگى شەكتەۋلى ازاماتتارعا ءاربىر بيلەت ساتىپ الۋ كەزىندە مۇگەدەكتىكتى راستاۋ ءۇشىن ۆوكزالعا بارۋعا تۋرا كەلدى, بۇل ءوز كەزەگىندە قالا بويىنشا قوزعالۋعا بايلانىستى قوسىمشا قولايسىزدىقتار مەن شىعىندار تۋدىرادى.
«ادال جول» جوبالىق كەڭسەسى ەڭبەك جانە حالىقتى الەۋمەتتىك قورعاۋ مينيسترلىگىمەن جانە "قتج" ۇك" اق-مەن بىرلەسىپ دەرەكتەر بازاسىن بىرىكتىرۋ جولىمەن جوعارىدا اتالعان ماسەلەنى شەشۋگە باستاما جاسادى.
ناتيجەسىندە, اعىمداعى جىلعى 26 ماۋسىمنان باستاپ "قتج" ۇك" اق-نىڭ سايتىندا مۇمكىندىكتەرى شەكتەۋلى جاندارعا بيلەتتەردى ونلاين ساتۋ بويىنشا قىزمەت ەنگىزىلدى.
بيلەتتى ونلاين رەجيمدە ساتىپ الۋ ءۇشىن مۇگەدەكتىكتى ءبىر رەت راستاپ, "جولاۋشىلار تاسىمالى" اق-نىڭ كاسسالارىنان "مەيىرىم" ەلەكتروندى ديسكونت-كارتاسىن الۋ قاجەت. ونى پايدالانۋ ارقىلى جولاۋشىلارعا ۇيدەن شىقپاي-اق, bilet.railways.kz سايتىندا جەڭىلدەتىلگەن بيلەتتەردى ونلاين ساتىپ الۋ مۇمكىندىگى قولجەتىمدى.
وزىمەن بىرگە مىندەتتى تۇردە جەكە باستى كۋالاندىراتىن جانە مۇگەدەكتىكتى راستايتىن قۇجاتتار بولۋى ءتيىس.
