الەمدى الاڭداتقان ەكونوميكالىق داعدارىس قازاقستاندى دا شارپىپ جاتقانى بەلگىلى. كارانتين كەزىندە اسىرەسە قاراپايىم حالىقتىڭ جاعدايىن نازاردان تىس قالدىرۋعا بولمايدى.
– ۇكىمەت ەلدە الەۋمەتتىك تۇراقتىلىقتى ساقتاپ, جۇمىسپەن قامتۋدى قولداۋعا باعىتتالعان شارالاردى ىسكە اسىرۋدا. ەكونوميكالىق داعدارىسقا قارسى تۇرۋ ءۇشىن بيۋدجەتتەن 5 ترلن 938 ملرد تەڭگە قارجى ءبولىندى. ونىڭ 3 ترلن 462 ملرد تەڭگەسى رەسپۋبليكالىق بيۋدجەت ەسەبىنەن, ال 2 ترلن 476 ملرد تەڭگە بيۋدجەتتەن تىس قاراجات ەسەبىندە قاراستىرىلدى. بۇل قارجى الدا كۇتىپ تۇرعان ماسەلەلەردىڭ الدىن الۋعا جۇمسالادى. سونداي-اق 250 مىڭ جۇمىس ورنىن اشۋعا مۇمكىندىك بەرەدى, – دەدى ب.شولپانقۇلوۆ.
ونىڭ ايتۋىنشا, بۇگىندە كوروناۆيرۋسپەن قارسى كۇرەس ءۇشىن رەسپۋبليكالىق بيۋدجەتتەن 191,9 ملرد تەڭگە بولىنگەن. جاعدايعا بايلانىستى الداعى ۋاقىتتا بۇدان دا كوپ قارجى قاراستىرىلۋى مۇمكىن.
ءباسپاسوز ءماسليحاتى بارىسىندا سپيكەرلەر كاسىپكەرلەردىڭ الاڭداۋىنا ەش سەبەپ جوقتىعىن ايتتى. ۇلتتىق ەكونوميكا ۆيتسە-ءمينيسترى ءمادي تاكيەۆ بيزنەس وكىلدەرىنىڭ سالىقتان بوساتىلعانى سالانى دەمەۋگە سەپتىگىن تيگىزەتىنىن جەتكىزدى.
– ءبىز عانا ەمەس, جالپى الەم دۇرلىگۋدە. ەكونوميكالىق تۇراقتىلىقتى ساقتاپ قالۋ ءۇشىن كاسىپكەرلەرگە كوبىرەك كوڭىل ءبولىپ جاتىرمىز. مەملەكەتتىك كوميسسيا ماۋسىم ايىندا بيزنەستى قولداۋ جوسپارىن قابىلدادى. نەسيەلەردى تولەۋ بويىنشا كۇنتىزبەلەردى كەيىنگە شەگەردى. ارنايى ءتارتىپ قارجى نارىعىن رەتتەۋ اگەنتتىگىمەن 15 ماۋسىمدا جۇيەلەنگەن بولاتىن. بانكتەر مەن ميكروكرەديتتىك ۇيىمدار سوعان ساي جۇمىس ىستەيدى, – دەدى ول.
