ماسكەۋدە ۇزاققا سوزىلعان ناۋقاستان كەيىن جاسى 77-گە كەلگەن شاعىندا كەڭەس وداعىنىڭ باس حاتشىسى لەونيد يليچ برەجنەۆتىڭ كۇيەۋ بالاسى يۋري چۋربانوۆ قايتىس بولدى. بۇل تۋرالى «ۋترو.رۋ» حابارلادى.
يۋري چۋربانوۆ ءوزىنىڭ كەزەكتى تۋعان كۇنىنە تۋرا ءبىر اي ۋاقىت قالعاندا, 7 قازان كۇنى ومىردەن ءوتتى. ال جەرلەۋ ءراسىمى 10 قازان كۇنى بولدى. ونىڭ دەنەسى استانانىڭ ميتينو قورىمىنا قويىلدى.
«چۋربانوۆتى جەرلەۋدە بولدىم. ميتينو قورىمى. 77-سىنە دەيىن ءبىر اي جەتپەي قالدى. قالاي دەگەندە دە, ول ءبىر كەزەڭنىڭ تۇلعاسى. جانى ءجاننات بولسىن!» , - دەپ جازىپتى ءوزىنىڭ ميكروبلوگىنا گوسدۋمانىڭ دەپۋتاتى الەكساند حينشتەين. ونىڭ سوزىنە قاراعاندا, مارقۇمدى ەسكە الۋعا 20-عا جەتپەيتىن ادام كەلگەن. «ول بيلىك باسىندا تۇرعاندا «دوستارى» اينالاسىندا ءورىپ جۇرەتىن ەدى. ايانىشتى, بىراق, وكىنىشكە وراي, تيپتىك قۇبىلىس», - دەگەندى قوستى ول.
«Piter.tv» حابارلاعانداي, چۋربانوۆ 2005 جانە 2008 جىلدارى ەكى رەت ينسۋلت العان. وسىدان كەيىن سال بولىپ جاتىپ قالعان.
يۋري چۋربانوۆ 1936 جىلى 11 قاراشادا ماسكەۋ قالاسىندا تۋعان. كاسىپتىك-تەحنيكالىق ۋچيليششەنى بىتىرگەننەن كەيىن «زناميا ترۋدا» اۆياتسيالىق توراپتار زاۋىتىندا قۇراستىرۋشى-سلەسار بولىپ جۇمىس ىستەدى. كەيىن كاسىپورىن كومسومول ۇيىمىنىڭ حاتشىسى بولىپ سايلاندى. 1964 جىلى م.ۆ.لومونوسوۆ اتىنداعى مگۋ-دىڭ زاڭ فاكۋلتەتىن ءبىتىردى.
1967 جىلى كسرو ىشكى ىستەر مينيسترلىگىنىڭ ەڭبەك تۇزەۋ مەكەمەلەرى باس باسقارماسىنىڭ ساياسي ءبولىمى باستىعىنىڭ ورىنباسارى بولدى. 1971 جىلى مينيسترلىكتىڭ ىشكى ىستەر اسكەرلەرى ساياسي باسقارماسى باستىعىنىڭ ورىنباسارى قىزمەتىنە جوعارىلاسا, تاعى ءتورت جىلدان كەيىن باستىعى لاۋازىمىن الدى.
يۋ.چۋربانوۆ 1977 جىلى كسرو ىشكى ىستەر ءمينيسترىنىڭ ورىنباسارى دارەجەسىنە جەتتى. بۇل قىزمەتتى 1980 جىلعا دەيىن اتقاردى. سوسىن كسرو ىشكى ىستەر مينيسترلىگى ىشكى ىستەر اسكەرلەرى باس باسقارماسى باستىعىنىڭ ءبىرىنشى ورىنباسارى جانە ورىنباسارى بولدى.
چۋربانوۆ 1987 جىلى وزبەكستاندا 1970-1980-ءشى جىلدارى ورىن العان ەكونوميكالىق جانە جەمقورلىق سيپاتىنداعى قىلمىستىق ىستەردى تەكسەرۋ بارىسىندا قاماۋعا الىندى. ول تۇرمەدەن تەك 1993 جىلى عانا بوساپ شىقتى.
يۋري چۋربانوۆ ءۇش رەت ۇيلەندى. 1971 جىلى ەكىنشى مارتە ءۇيلى بولىپ, گ.برەجنەۆامەن قوسىلدى. ال گالينا لەونيدوۆنا ءۇشىن بۇل ءۇشىنشى رەت نەكەگە تۇرۋ ەدى. 1990 جىلى چۋربانوۆ تۇرمەدە جاتقان كەزدە برەجنەۆتىڭ قىزى ونىمەن اجىراسىپ, دۇنيە-م ۇلىكتى ءبولىسىپ الدى. چۋربانوۆ ءۇشىنشى مارتە 1994 جىلى ۇيلەندى.
ساكەن مايلىباي.
