رۋحانيات • 07 شىلدە، 2020

رەكوردتار كىتابىنا كۇيمەن كىردى

30 رەت كورسەتىلدى

بىلتىر امانگەلدى اۋدانىندا وتكەن استانا مەرەيتويى مەن ۇلتتىق دومبىرا كۇنىنە ارنالعان مەرەكەدە مىڭ دومبىراشى حالىق كۇيى «كەلىنشەك» پەن قۇرمانعازىنىڭ «بالبىراۋىنىن» قوسىلا ورىنداپ، بۇكىل باتپاققارا دالاسىن كۇيمەن تەربەتكەن ەدى. وڭىرگە بەلگىلى ونەرپاز ولجاس قىلدىباەۆ ديريجەرلىك ەتكەن كۇيشىلەر مىڭدىعىنىڭ قۇرامىندا 5-سىنىپ وقۋشىسىنان باستاپ 90 جاس­تى القىمداپ قالعان قاريالارعا دەيىن بولعان.

«وسى ءىس-شارانى بەينەتاسپاعا ءتۇسىرىپ، قۇجاتتارىن رەتتەپ حالىق­ارالىق ۇيىمنىڭ سو­چيدەگى كەڭسەسىنە جولدادىق. رە­كورد­تى تەكسەرۋشىلەر قۇجات­تار­دىڭ دۇرىستىعىن قاراپ، قا­تىسۋشىلاردى مۇقيات ساناپ شىقتى. رەكوردقا نەگىز بولعان باستى نارسە – 17 مىڭ عانا حالقى بار اۋداننان 1000 دومبىراشى شىعىپ، ءبارى قو­سىلىپ 2 كۇيدى ناقىشىنا كەلتىرىپ ورىنداۋى. سوندىقتان ولار ءبىزدىڭ ءىس-شارانى گيننەستىڭ رەكوردتار كىتابىنا ەنگىزىپ وتىر. بۇل تۋرالى سەرتيفيكات تاياۋ­دا عانا قولىمىزعا ءتيدى»، دەدى اۋداندىق ىشكى ساياسات ءبولىمىنىڭ باسشىسى نۇرلىبەك ءتاجين.

اۋىل كۇيشىلەرىنىڭ رەكوردتار كىتابىنا ەنگەنىن كۋالاندىراتىن حالىقارالىق سەرتيفيكاتتا «ەڭ كوپ دومبىراشىنىڭ قاتىسۋىمەن اۋىلدىق مەكەندە ورىندالعان قازاقتىڭ ءداستۇر­لى اسپاپتىق پەساسى. گيننەس رەكور­دىنا 1000 ورىنداۋشى تىركەلدى. رەكوردتى ۇيىمداستىرۋشى: قوستاناي وبلىسى، امانگەلدى اۋدانىنىڭ اكىم­دىگى»، دەپ جازىلعان.

ءبولىم باسشىسىنىڭ ايتۋىنشا، بيىل ەلوردا مەرەيتويى قارساڭىندا اۋداننىڭ مىڭنان استام دومبىراشىسى 5 كۇي ورىنداۋدى جوسپارلاپ قويعان. الايدا شەكتەۋ شارالارىنىڭ كۇشەيۋىنە بايلانىستى، بۇل شارا كەيىنگە قالدىرىلىپ وتىر.

 

قوستاناي وبلىسى،
امانگەلدى اۋدانى،
امانگەلدى اۋىلى

سوڭعى جاڭالىقتار

قحل: ۆيزا بەرمەي جاتىر

حوككەي • بۇگىن، 15:18

COVID-19 ادامنان يتكە جۇققان

كوروناۆيرۋس • بۇگىن، 14:15

قيىن كەزەڭ ارتتا قالدى - مينيستر

قازاقستان • بۇگىن، 11:14

ۇقساس جاڭالىقتار