سۋرەتتى تۇسىرگەن جانبولات كەنجەعۇل, "EQ"
وتكەن جۇمادا حالىقارالىق تۇركى اكادەمياسىنىڭ ۇيىمداستىرۋىمەن ۇلتتىق دومبىرا كۇنىنە ارنالعان «دومبىرا مادەنيەتى: ءداستۇر ساباقتاستىعى جانە ءبىلىم بەرۋدەگى ماسەلەلەر» اتتى ونلاين-كونفەرەنتسيا ءوتتى. القالى جيىن اياسىندا حالىقارالىق تۇركى اكادەمياسى مەملەكەت باسشىسىنىڭ تىكەلەي تاپسىرماسى بويىنشا دايىنداپ شىعارعان «دومبىرا» وقۋ قۇرالىنىڭ تۇساۋكەسەر ءراسىمى ءوتتى. وسكەلەڭ ۇرپاققا ارنالعان وقۋلىقتىڭ اۆتورى بەلگىلى كۇيشى, قازاق ۇلتتىق ونەر ۋنيۆەرسيتەتىنىڭ پروفەسسورى – جانعالي ءجۇزباي.
– دومبىرا – قازاقتىڭ جانى. ۇلتتىق اسپاپتى وسكەلەڭ ۇرپاققا ۇيرەتۋ ءھام ونى ارنايى مەكتەپ باعدارلاماسىنا ەنگىزۋ – بۇل ۇلتتىق بولمىستى ساقتاۋعا باعىتتالعان تاعىلىمى مول قادامداردىڭ ءبىرى دەپ سانايمىن. پرەزيدەنتىمىز قاسىم-جومارت توقاەۆتىڭ 2019 جىلدىڭ 7 ماۋسىمىندا «ۇلتتىق دومبىرا كۇنى» مەرەكەسىندە دومبىرانى ارنايى ءپان رەتىندە مەكتەپتەرگە ەنگىزۋ كەرەكتىگى جونىندەگى پىكىرى نەگىزىندە وسىنداي وي تۋىنداپ, كىتاپ جازۋ ءىسىن قولعا العان بولاتىنبىز. بولاشاق ءۇشىن پايدالى ەڭبەك دەپ ويلايمىن, – دەدى كىتاپ اۆتورى.
ونلاين فورماتتا وتكەن كونفەرەنتسياعا قازاق ۇلتتىق ونەر ۋنيۆەرسيتەتىنىڭ پرورەكتورى, ونەرتانۋ عىلىمدارىنىڭ دوكتورى تويجان ەگىنباەۆا, قازاقستاننىڭ ەڭبەك سىڭىرگەن قايراتكەرى, تانىمال كۇيشى جانعالي ءجۇزباي, قۇرمانعازى اتىنداعى قازاق ۇلتتىق كونسەرۆاتورياسى ءداستۇرلى مۋزىكا فاكۋلتەتىنىڭ دەكانى, ونەرتانۋ عىلىمدارى Phd دوكتورى ەرجان جامەڭكەەۆ, نۇر-سۇلتان قالالىق مەملەكەتتىك اكادەميالىق فيلارمونياسىنىڭ باس ديرەكتورى ەرلان داكەنوۆ, قازاقستاننىڭ ەڭبەك سىڭىرگەن قايراتكەرى, كومپوزيتور, ونەرتانۋ عىلىمدارىنىڭ ماگيسترى القۋات قازاقباي, نۇر-سۇلتان قالاسىنداعى وقۋشىلار سارايىنىڭ باس ديرەكتورى ەربول ىرگەباي, تاتتىمبەت اتىنداعى ونەر كوللەدجىنىڭ ديرەكتورى سەرجان مۇسايىنوۆ, «قازاقكونتسەرت» مەملەكەتتىك كونتسەرتتىك بىرلەستىگىنىڭ «حالىق قازىناسى» ۇجىمىنىڭ جەتەكشىسى ەرلان رىسقالي جانە بەلگىلى عالىمدار, بىرقاتار سالالىق, وقۋ ورىندارى مەن ونەر سالاسىنداعى ۇيىمداردىڭ باسشىلارى مەن وكىلدەرى قاتىستى.
ايتا كەتۋ كەرەك, قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆتىڭ 2019 جىلدىڭ 7 ماۋسىمىندا «ۇلتتىق دومبىرا كۇنى» مەرەكەسىندە دومبىرانى ارنايى ءپان رەتىندە مەكتەپتەرگە ەنگىزۋ كەرەكتىگى جونىندەگى پىكىرى جاريالانعان بولاتىن. وسىعان وراي جالپى ءبىلىم بەرەتىن مەكتەپتەردە قاسيەتتى اسپابىمىزدى وقىتۋ جۇمىستارى قارقىن الىپ, «دومبىرا» پانىنە ارنالعان وقۋ قۇرالىنا قاجەتتىلىك تۋىندادى.
